Read berom 1 Neha-Raane 20 Bible Online

1 Neha-Raane 20 - berom bible

1 Neha-Raane 20

¹E bak rwa swigi, jeng á yane de begwɔ̀m be kyese como, Yowap a sogo na bemat como ko a wɔ̀ hwo mɛ BeAmɔn. Yɛn a kyè ba wɔ rɔnɔ repomo Raba na como. Ko Davit a sangal nedem mɛ e Yɛrusalɛm. Yowap a hwo e ra Raba ko a re rɛ na como.

²Davit a pat kpîn negwɔm yi e ratô gwɔ̀m o — ko nedirik wɛ na wul kilo kuru batat na vɛ benaas (34) ve dyam shinang, ba tɔrɔ wɛ na dyéngere ryat, ko ba tɛ̀ wɛ e ratô Davit. A to hashe pyɛ̂ jugu pyak sizɔng yi e repomo mo.

³A paa bemat de ba sé e hwomo, a tɛ̀ ɛn be ra fwôm sesam gwo yɛ̂t cɔ́gɔt na bewal yìn, kɛ dâk pyɛ́ na begele dyam, kɛ tôw pyɛ́ na tyém, kɛ yông bagat bwos lɔk. Davit a ra ano e mwa bapomo BeAmɔn. E bama mo, yɛ tanga mwa bemat como mɛ ba toyo vɔk e Yɛrusalɛm.

⁴E bama pyɛ́ yane, como ya to hwo na BeFilisti e Gɛzɛr. Ko Sibɛkai wo Husha a mɔrɔ Sipai gwohwak e ji yere BeFilisti de bà sé hwɔ̀k, ko ba vɔk ba re ɛn mwa na como.

⁵Ba to tó como mo cak e tē BeIsrayɛl na BeFilisti, ko Elhanan Yayir a mɔrɔ Lahmi gwogwa Gɔliyat wo Gat, gwomo de neting cwang gwobara gwɛ na sé sede rúm.

⁶Ba to tó como mo cak e Gat. E hwomo ba man na gwohwɔ̀k gwomwat o gwohwak de gwa dal na nerey, gwa vɔk bekɛn vɔ tyiimin e kagwɛ vwɔ, na bekɛn bol tyiimin e kagwɛ bwol arɔng. Mwa nèy vɔ mɛ tanga nèy bol mɛ na sé kuru baba na nɛ nenaas. Yɛ̀ arɔng a sé yi e yere BeFilisti de bà sé hwɔ̀k.

⁷Jeng de a dura a BeIsrayɛl byɛs, Yɔnatan Shimei, gwa Davit a vɛ̌ hwo e ra yɛ, a pere mɔrɔ hɛ.

⁸Yɛn vemo betat de Davit na bemat mɛ ba mɔbɔs hɛn ba yi e yere bèhwɔk BeGat.