Read berom 1 Neha-Raane 21 Bible Online

1 Neha-Raane 21 - berom bible

1 Neha-Raane 21

¹Gwɔ̀m cēng a tɛ̀ repugu e ra BeIsrayɛl, ko a cuga Davit e ra yɛn wɔgɔ, a wɔ̀ bara bemat de ba vey tô como e ji mɛn.

²Ano kwong, gbɔng gwɔ̀m a hwo nɔ̂ng Yowap, mwat nuyel bemat como nu, a tɛ̀ be yel e ji yére Israyɛl e bebak vwel mɛn yi e bak womo e Bɛɛr-Sheba vɔk e neyɛnɛ woro e Dan, na be bara bemat o mwa, wɔgɔ, yɛ e simo a tɔk nepyak bemat o.

³Yowap a hwo toyo a yɛ, a ye, “À gbɔng gwɔ̀m, tik na Dagwi Darwey a tɛ̀ BeIsrayɛl be gwɛ̌ hɛn zang naga, be dal pyɛ de ba sé a remo! Neken mo ne ros, mwâ hɛn ba sé bemat mo wɛt a? Sɛ́ de yê tɛ̀ darwey hom a simo a ra pyɛ de ya sé renɛn ɛ?”

⁴Mwa ano, gbɔng gwɔ̀m a tɛ̀ Yowap a gyeng nu mɛ. Ko Yowap a sogo, a gwɔrɔ yɛnɛ vwel BeIsrayɛl o mwa e de bara bemat o gyam na a de toyo vey e Yɛrusalɛm.

⁵A vey ha a Gbɔng Gwɔ̀m Davit nepyak bemat de ba vey tô como. Nepyak BeIsrayɛl o na sé miliyɔn gwining na gu naga rining viisis (1,100,000), ko e bak o wo Yuda, na sé gu naga banaas na gu kuru bataama (470,000).

⁶Ko Yowap a bara yére Levi na Bɛnyamin wɛt yaga a simo pyɛ de gbɔng gwɔ̀m a tɛ̀ ɛ a ra wɛt.

⁷Dagwi a di neves pyɛ de ba ra, yaga ano, a tabak BeIsrayɛl.

⁸Ko Davit a yang Dagwi, “Ma ga ra renɛn sizɔng de ma ra pyɛ yemo! Gabɔk wɛt, hala a sam mo buru mɛ. Ma ga ra fwom netɔ̌n.”

⁹Dagwi Darwey a ha na Gat, zarap mɛ de e vos a Davit badu, a yang ɛ,

¹⁰“Kyè wɔ̀ ha na Davit, ma sé nɔng ɛ pyɛ́ tyat na a kasa jining e ji mo, kayɛ mo de a kasa, mê ra a yɛ yɛ.”

¹¹Ano, Gat a wɔ́ na Davit, a yang ɛ, “Dagwi Darwey a ye, kasa:

¹²Hwó simo vyong neshey netat, kɛ gawey yi e wâl ve repugu mo pɛl tat, kɛ tumbang wo wal Dagwi Darwey pɔlɔ tat de tom-lagwi ê kyě weres na bemat kagwa e sevwêl Israyɛl. Bare e yey mo a remo, na hwo ha a me pyɛ de mê toyo a Dagwi Darwey de a tomo me!”

¹³Davit a ye, “Yaa kukuuk! Ma ga yel e gwazɛrɛk! Nduga me gaba e vwɔ Dagwi Darwey yaga yɛ a sé wo nemwishish, ko mê simo me gaba e vɔ bemat wɛt.”

¹⁴Dagwi Darwey kwong a tomo na tumbang e ra BeIsrayɛl. Bemat gu kuru bataama (70,000) ve BeIsrayɛl ba kushu.

¹⁵Jeng de tom-lagwi wo Dagwi Darwey a sé kyè wɔ̀ wey na Yɛrusalɛm, ko Dagwi Darwey a ye mwishish, a yang ɛ, “Tik ano! Hane ha ga vey!” Tom o á sè bagat na gazu de wa sé wo Arauna WoYebus.

¹⁶Davit a ye ganga ko a di tom-lagwi o e tumal e tê lagwi na jey, na wal mɛ de a ga hwɔltɔ e vwɔ mɛ e ra Yɛrusalɛm. Ko Davit tanga bemat nuyel BeIsrayɛl de mwa hɛn ba tɛ̀sɛ yɔm sesin, ba gaba gup.

¹⁷Davit a hwo yang Dagwi, “À Dagwi, e me wɛ de ma nɔng nu be bara bemat o. Mwin, ma ga ra banɛn, ma ga ra pyɛ de ya sé vyes, ko e sɛ́ de bemat yere vemo ba ra ɛ? À Dagwi Darwey, Dagwi hom, tabak me na belɔ hom e negya, na hwo tik bemat mo vemo nà wey na tumbang.”

¹⁸Tom-lagwi wo Dagwi Darwey a nɔ̂ng Gat nu na a wɔ̀ ha a Davit, a tút vɔk e gazu Arauna, na a wɔ̀ lɔk a Dagwi Darwey gàgbang rangas yas e ra wɛ.

¹⁹Davit kwong a tút tyɛng na pyɛ de Gat a ha a yɛ e ji reza Dagwi Darwey.

²⁰Arauna á sè dak alkama, a ye ganga, ko a di tom-lagwi. Nèy mɛ bewen o benaas de ba sé tanga yɛ ba lɛsɛ hɛn.

²¹Jeng de Davit a wɔ̀ wul na Arauna, Arauna a ye ganga a di Davit, ko a nusu yi e gazu mo, a kyè, a gaba e cat bol gbɔng gwɔ̀m o.

²²Davit a yang ɛ, “Me simo me sey gazu mo, na me lɔk a Dagwi Darwey ɛ̀ gàgbang rangas yas, yaga na be tɛ̀ kwɔk tumbang de wa hwo. Mê tala dyām de ya sé tyɛng yaga wɛ.”

²³Arauna a yang ɛ, “À da, vɔk gazu mo, na hwo nára a Dagwi Darwey. Di berɔndɔng betat à vemo, jut vɛ, na hwo nára mɛ nɔrɔ e ra gàgbang rangas o, jut cɔ́gɔt dâk pyɛ̂ gazu tanga cɔ́gɔt tɛ́ gàk e ra tɔ berɔndɔng o na be tɛ́ mɛ pyɛ̂ kya mo, mê nɔng alkama yaga nɔrɔ pyɛ̂ yéneng. Mê nɔng pyɛ́ yemo mwa sana byɛ.”

²⁴Ko gbɔng gwɔ̀m o a yang ɛ, “Wěy wěy, mê tala hwo nepyak dyām de ya sé tyɛng. Mê sey pyɛ́ mo zɔng na me nɔng Dagwi Darwey wɛt, ko mê nára a yɛ nɔrɔ rangas na pyɛ́ de ba nɔng me e nɔrɔ wɛt.”

²⁵Ko Davit a tala hɛ sede kilo betaama vê dyam shinang yaga gazu mo.

²⁶A lɔk ɛ̀ gàgbang rangas yas vɔk na Dagwi Darwey. A nása ɛ nenɔrɔ rangas burang tanga ne wuna nesa. A ra won, ko Dagwi Darwey a toyo a yɛ hɛ na kya yi e lagwi e ra kwɔn rangas yas o.

²⁷Ano kwong, Dagwi Darwey a nɔ̂ng tom-lagwi o nu, ko a gyira wal o e fwalal o.

²⁸Sede Davit a di Dagwi Darwey a ga wok won mɛ e gazu Arauna WoYebus, ko a hwo nása nenɔrɔ e hwomo.

²⁹E jeng o, buk Dagwi Darwey de Mose á kana yong e hey, tanga gàgbang rangâs yas yá rɔngɔl e kwɔn de bá re a Dagwi ɛ fongol e Gibɛyɔn.

³⁰Ko Davit a tɔk wɔ e kwɔn o na a wɔ̀ rangal Dagwi wɛt, yaga a tele hɛ wâl tom Dagwi Darwey.