Read berom 1 Neha-Raane 22 Bible Online

1 Neha-Raane 22 - berom bible

1 Neha-Raane 22

¹Ano kwong, Davit a ye, “Kwɔn á hemo de Gbɔng Duk Re Fongôl Dagwi Darwey, Dagwi mot wô sè ɛ, tanga gàgbang rangas yas yaga BeIsrayɛl.”

²A vane ano, Gbɔng Gwɔ̀m Davit a nɔng nu be tula mwa bemat yére dyuk de ba sé e yɛnɛ vwel BeIsrayɛl, ko a tɛ̀ behak mɛn be dak beta, ko be yong vɛ yaga lɔk Gbɔng Duk Re Fongol wo Dagwi.

³Davit a sila begbɔng beduk tikis pyɛ́ mɛ na dyam de ba nɔng bemat behak yaga yong bekpɛk tanga pyɛ̂ manas rùhup de ba yong na cɔgɔt. A to nɔng ɛn dyam pama de ba tɔk masa nedirik o wɛt yaga nepyak o,

⁴tanga bebak cɔ́gɔt sida de ba tɔk bara nepyak o wɛt, yaga bemat Sidɔn na Tur ba vey á yɛ na babim cɔ́gɔt o tyɔng wɛt.

⁵Davit a ye, “Hwey hom, Sɔlɔmɔn a rɔngɔl swɛl o, a ga tɔ́k ɛ na jey wɛt. Ko di, Gbɔng Duk Re Fongol de bê lɔk a Dagwi Darwey wô sè rwat sizɔng, bê tɔk wɛ kagwa, ko bê di nerat wɛ e bavwel mwa, yaga ano de mê tula pyɛ́ de bê simo yaga wɛ.” Yaga ano, Davit a tula gwakû pyɛ̂ fwom o gyam reku mɛ.

⁶Ano kwong, Davit a yila hwey mɛ Sɔlɔmɔn, ko a nɔng ɛ nu na a lɔk a Dagwi Darwey, Dagwi Israyɛl Gbɔng Duk Re Fongol.

⁷A to yang ɛ, “À hwey hom, má kana tɛ̀ e yey na me lɔk Gbɔng Duk o yaga reza Dagwi Darwey, Dagwi hom.

⁸Ko yɛ a yang me, ‘Hwà ga lusha nemi bemat pyak, hwà ga tó cōmo pyak arɔng, yaga ano, hwô lɔk Gbɔng Duk o yaga reza hom wɛt, hwà ga lusha nemi bemat pyak e bayis hom e jey.

⁹Bê tɔ á hwo hwey, yɛ ê sè mwat yey dyɛngɛ. Ma rɔda tɛ̀ a sangal tyang na bemat repugu de ba gwɔrɔ hɛ, ko bê vo a yɛ rezâ Sɔlɔmɔn wɔgɔ, yey dyɛngɛ. Mê nɔng BeIsrayɛl yey dyɛngɛ na sangal tyang e jeng negwɔm mɛ.

¹⁰E yɛ de ê lɔk Gbɔng Duk Rê Fongol yaga reza hom. Ê sè hwey hom wen o, ko mê sè da mɛ, mê tɛ̀ gwofwa negwɔm mɛ e ra BeIsrayɛl gwo nàra gbak-gbak.’

¹¹“Di, à hwey hom, Dagwi Darwey a sè tanga hwo, na hwo di wɛng, hwo lɔk Gbɔng Duk Re Fongol wo Dagwi Darwey, Dagwi mo, sede remo de a ha e ra hwo.

¹²Tik na yɛ a nɔng o tɔ̂k pyɛ́ tanga netsitsɛng, yaga na jeng de ê nɔng o vɔ̂k BeIsrayɛl, ko hwo gyenges Badu mɛ.

¹³Ko hwô di wɛng, ka sede hwà tē naka, na hwo gyeng nu na Badu de Dagwi Darwey, a nɔ̂ng Mose yaga BeIsrayɛl. Tumal gak, na hwo vɔk yey ting. Hwo kwon vɔk bengyip, hwo ye waa wɛt.

¹⁴A sé na rezot pyak de ma sɛ̀ pyɛ́ yemo yaga lɔk Gbɔng Duk Re Fongol Dagwi Darwey, tɔ̂n gu batat na naga benaas (3,400) ve dyam shinang, na tɔ̂n gu kuru batat na vɛ banaas (34,000) ve dyam pyɛng, na gwaku dyam pama, na dyam de bê tɔk masa nedirik o wɛt, tanga cɔ́gɔt na beta arɔng, ko mwa ano, hwô tɔk to gwɛ̌ cak e ra yɛ̄.

¹⁵Hwà vɔk bemat fwom tyɔng wɛt, bemat dak beta, na bemat lɔk, na ve fwom cɔ́gɔt tanga nezap bemat sekwɛl de bê ra fwom,

¹⁶na dyam shinang, na dyam pyɛng, na dyam pama tanga dyam. Sogo na hwo hwo fwom o, Dagwi Darwey a sè na hwo!”

¹⁷Ano arɔng, Davit a nɔ̂ng mwa bemat nuyel BeIsrayɛl nu na yɛn a sɛlɛ Sɔlɔmɔn.

¹⁸A yang ɛn, “Di in, Dagwi Darwey, Dagwi min a sé tanga yin, a ga nɔng in sangal netyang e kawɛ bak. Yaga a ga nɔng mwa bemat de ba kana sé sangal e vwel o e vwɔ hom, ko vwel o ha sé e nɛ̂n Dagwi Darwey na bemat mɛ.

¹⁹A remo, tɛ̀ in nehywɛ min na yey min e de jáma Dagwi Darwey, Dagwi min. Sogo hin, na yin a lɔk Gbɔng Duk Re Fongol Dagwi Darwey, Dagwi min, yaga na be bin tik Kundung Wuna-na-Sira mwa na pyɛ̂ fwom Dagwi e Gbɔng Duk de yin ê lɔk yaga reza Dagwi Darwey.”