Read berom 1 Neha-Raane 23 Bible Online

1 Neha-Raane 23 - berom bible

1 Neha-Raane 23

¹Jeng de Davit a ga kwop kpushuk na neshey pyak, a tɛ̀ hwey mɛ Sɔlɔmɔn he sè gbɔng gwɔ̀m e ra BeIsrayɛl.

²Gbɔng gwɔ̀m Davit a tula mwa bemat nuyel BeIsrayɛl, na bepiris tanga BeLevi.

³A tɛ̀ be bara beras BeLevi de neshey mɛn na jut yi e kuru batat (30) vɔk e rak o, ko ba sɛ̀ vɛ gu kuru batat na gu rwit (38,000).

⁴Ko Davit a nɔ̂ng bemat gu kuru baba na vɛ banaas (24,000) fwom kyé na tom Gbɔng Duk Re Fongol, gu batyiimin (6,000) fwom jɛkɛs pyɛ́ de yé té na be tik yɛ naka, tanga gwo shɔt,

⁵gu banaas (4,000) fwom gyeng rùhup, tanga gu banaas (4,000) arɔng fwom somo Dagwi, ba ragas fwom na pyɛ̂ lwɛlɛ de gbɔng gwɔ̀m á nɔng yaga fwom o.

⁶Davit a gas BeLevi zang tat e rùhup mɛn ve Gɛrshɔn, na Kohat tanga Mɛrari.

⁷Nèy Gɛrshɔn bewen o à Ladan na Shimei.

⁸Nèy Ladan bewen o betat à Yɛhiyɛl, na Zɛtam tanga Yɔwɛl,

⁹ko yɛn a sé bedâ rùhup ve yere Ladam. Shimei arɔng a tɔ̀ bewen betat, yɛn à Shɛlɔmɔt, na Haziyɛl tanga Haran.

¹⁰Shimei a tɔ bewen benaas, yɛn à Yahat, na Zina, na Yewush tanga Beriya e neshey tɔs mɛn. Yewush na Beriya ba vɔk yére pyak wɛt, yaga ano ba wuna hɛn e ruhup gwining.

¹²Kohat a tɔ bewen benaas, yɛn à Amram, na Izhar, na Hɛbrɔn tanga Uziyɛl.

¹³Nèy Amram bewen o à Aharon na Mose. Ba tik Aharon na yere mɛ jaram na be tɛ̀sɛ pyɛ̂ fwôm Dagwi haalal nesheneshey, na yɛn a rangas pyɛ̂ nesang hyɔɔlɔl e jeng re a Dagwi Darwey fongol, na yɛn a ra a yɛ tom detidetu, tanga na yɛn a tɛ̀sɛ a bemat nerat e ji rezâ Dagwi.

¹⁴Ko nèy Mose, mwât Dagwi ba wuna nɛ e ji BeLevi.

¹⁵Mose a tɔ Gɛrshɔm na Ɛliyɛzɛr.

¹⁶Wen kunat wo yere Gɛrshɔm à Shɛbuwɛl.

¹⁷Wen kunat wo yere Ɛliyɛzɛr a Rɛhabya. Ɛliyɛzɛr o a to vɔk wen hwak wɛt, ko nèy bewen Rɛhabya ba sé pyak.

¹⁸Wen kunat wo yere Izhar à Shɛlɔmit.

¹⁹Nèy Hɛbrɔn bewen à Yɛriya, yɛ a kunat o, na Amariya wo neba, na Yahaziyɛl wo netat tanga Yɛkamɛyam wo nenaas.

²⁰Nèy Uziyɛl bewen o à Mika na Ishiya de a raa hɛ.

²¹Nèy Mɛrari bewen o à Mali na Mushi. Nèy Mali bewen o à Ɛlɛyazar na Kish.

²²Ɛlɛyazar a ku sana sɛ̀ bewen, sɛ̌ behwong zɔng. Behwóng mɛ mo ba rá weneng begwa mɛn bewen Kish.

²³Nèy Mushi bewen o betat à Mali, na Ɛdɛr tanga Yɛrimɔt.

²⁴Yɛn vemo ba sé yere Levi, e ruhup mɛn tanga e nelɔ mɛn, ko ba jɛk bazâ kawɛ e ji mɛn e ji bwok-basa baza. Ano arɔng, kawɛ e ji mɛn de neshey tɔ mɛ na ga wul kuru baba (20) vɔk e rak o, a vɔk nu mo mɛ he fwom Gbɔng Duk Re Fongol Dagwi Darwey.

²⁵Davit a ye, “Dagwi Darwey, Dagwi Israyɛl a ga nɔ̂ng bemat mɛ sangal netyang, ko a rɔda sangal e Yɛrusalɛm gbak-gbak.

²⁶Yaga ano, vit a pyɛ de yê tɛ̀ BeLevi be kyě kyè na Kundung Wuna-na-Sira tanga nediri nedok de be re a Dagwi mɛ fongol.”

²⁷E ji neha ne yɛnɛ de Davit a misang a bemat, ba jɛk baza BeLevi vemo de neshey tɔ́ mɛn na ga wul kuru baba vɔk e rak o, yaga tom detidetu.

²⁸Fwom mɛn gwa sé na be sɛlɛ nèy Aharon bewen e de râ tom e Gbɔng Duk Re Fongol Dagwi Darwey wɔgɔ, be bɛrɛng nelala na beduk o naka, na be kurus pyɛ̂ fwom duk o na ye sè haalal, na be sɛlɛ na ragas bwang tom duk Dagwi o.

²⁹Ano arɔng, yɛn a rɔda jut fwôm bɛrɛng kpam-tuk de be tikis a Dagwi, na nemuk de be nára nɔrɔ̂ nɛ, na hàmal kpam-tuk sana géy-sing, na pyɛ̂ halang de be nɔng nɔrɔ yɛ, na nemuk de ba bɔrɔk na něy tanga fwom masa nedirik pyɛ́ de be nɔngɔs nɔrɔ yɛ e Gbɔng Duk Re Fongol.

³⁰Yɛn a rɔda somo Dagwi Darwey na be nɔng ɛ nerey kanɛ nagasi na nahywegelek,

³¹tanga kayɛ jeng de be nɔ̂ng Dagwi Darwey nɔrɔ yas de be rangas tuk Shábat, na tuk Nzem Pwɛl Pwas tanga bwang nzem o nehak. Yɛn a rɔda tumal e nuyel Dagwi Darwey tyɛng na nepyak mɛn de ba ga kana yong gyam.

³²Ba to nɔng ɛn fwom bɛrɛng buk Dagwi a Gbɔng Duk Re Fongol, tanga ne sɛlɛ̂ cáng mɛn, bepiris ve yere Aharon, e de fwôm re a Dagwi fongol e Gbɔng Duk o.