Read berom 1 Neha-Raane 28 Bible Online

1 Neha-Raane 28 - berom bible

1 Neha-Raane 28

¹Gbɔng Gwɔ̀m Davit a nɔng nu be tula mwa begbɔng bemat nuyel BeIsrayɛl, na vê yére Israyɛl, na vê nuyel bagyɛng de be ra a gbɔng gwɔ̀m fwom, na vê nuyel bemat gu gu (1,000), na vê naga naga (100), na vemo de be bɛrɛng mwa pyɛ̂ nedanerey na yas gbɔng gwɔ̀m tanga yê nèy mɛ, na bemat nuyel fwom lɔ gwɔ̀m, na bemat nuyel bemat como, tanga begbɔng bemat vwel o mwa, na besuga e Yɛrusalɛm.

²Gbɔng Gwɔ̀m a hwo tumal e nuyel mɛn, a yang ɛn, “À begwa hom, na bemat hom! Ma kyulu hin mwa! Wet in betong na me! Ma kana tɛ̀ e yey hom na me lɔk lɔ yaga Kundung Wuna-na-Sirâ Dagwi Darwey na he tɛ́ ɛ kwɔn de Dagwi mot a rɔda pɔng ɛ, ma ga yong pyɛ̂ mwa yaga lɔk o.

³Ko Dagwi a simo a me na me lɔk hɛ pyɛ hom wɛt, yaga ma sé mwat como, ma ga lusha nemi pyak.

⁴Mwa ano, Dagwi Darwey, Dagwi Israyɛl a ga kasa me na yere hom na wot a re negwɔm e ra BeIsrayɛl gbak-gbak. A kasa Yuda na a se mwat nuyel, ko yi e yerê Yuda mo a kasa ruhup da hom, ko yi e lɔ da hom a di a jam a yɛ na a jut me, na me sè gbɔng gwɔ̀m e ra BeIsrayɛl mwa.”

⁵A nɔng me nèy bewen pyak, ko e ji mɛn mwa, a kasa Sɔlɔmɔn na a sangal e ra gwofwa negwɔm mwa BeIsrayɛl de Dagwi Darwey a sé gbɔng gwɔ̀m mɛn.

⁶Dagwi Darwey a to yang me, “E hwey mo Sɔlɔmɔn de a rɔda lɔk a me Gbɔng Duk Re Fongol na nelala mó mwa, yaga ma ga kasa hɛ, na a sè hwey hom, ko mê sè da mɛ.

⁷Ma rɔda tɛ̀ negwɔm mɛ se nàra nesheneshey ka sede a raa na gyenges nu hom na badu hom na nehywɛ, sede remo de ba sé ra e jeng yemo.”

⁸“Yaga ano, e nuyel mwa BeIsrayɛl, wɔgɔ, tula bemat Dagwi Darwey, na e nuyel Dagwi mot, tik na yin a gyeng, na yin a raa mwa nû Dagwi Darwey, Dagwi min yaga na yin a re nuyel na vɔk vwel rat hemo, na yin a to ba nára a nezamang min de ne kyè vey na he se nap mɛn.”

⁹“Ko di, hwo hwey hom Sɔlɔmɔn, ma sé nɔng o nu na hwo tɔk Dagwi wo da mo, na hwo ra a yɛ fwom na yey rining, na simô yey mo, yaga Dagwi Darwey e ngyɛgɛt mwa neyey, ko e tɔk kayɛ pyɛ de mwat e simo a ra, mwa na bare yey mɛ. Ka sede hwà jama hɛ, ko hwô sɛ̀ ɛ, ka sede hwà yɛ waa a hɛ, ko yɛ ê yɛ waa a hwo nesheneshey.

¹⁰Tik na hwo tē naka, Dagwi Darwey a kasa hwo, na hwo lɔk Gbɔng Duk yaga buk Dagwi gwô jɛrɛ. Tɛ̀ yey ting na hwo ra fwom o.”

¹¹Ano kwong, Davit a nɔ̂ng sɔ mɛ Sɔlɔmɔn wɔ́rɔ nelalâ Gbɔng Duk Re Fongol o na mwa beduk wɛ, na begban wɛ, na beduk o vê rak o, na vê vwel o, na duk kundung tanga pyɛ bang gwɛ.

¹²A to nɔng ɛ wɔ́rɔ kayɛ pyɛ de a tɛ̀ e yey na a ra, na nelala Gbɔng Duk Re Fongol Dagwi Darwey o, na mwa beduk de ba gwɔrɔ Gbɔng Duk o, na begban Gbɔng Duk o, tanga begban tikis pyɛ̂ nɔrɔ de ba tik jaram yaga Dagwi.

¹³A to nɔng ɛ wɔ́rɔ de a yong yaga bagyɛng bepiris tanga BeLevi, na hê mwa tom de bê ragas e Gbɔng Duk Re Fongol Dagwi Darwey, na fwom bɛrɛng pyɛ̂ fwom Gbɔng Duk o.

¹⁴A to ha a Sɔlɔmɔn nedirîk dyam shinang de bê yong mɛ neshǐ yaga ra fwom,

¹⁵na nedirîk dyam shinang de bê yong mɛ pyɛ̂ tikis bekywa-kya tanga bekywa-kya mo, na nedirîk dyam shinang de bê yong mɛ kayɛ pyɛ tîk kywa-kya mwa na bekywa-kya mo, na nedirîk dyam pyɛng de bê yong mɛ pyɛ tîk kywa-kya tyɛng na gwong de bê ra fwom na pyɛ mo,

¹⁶na nedirîk dyam shinang de bê yong mɛ betebut de be tikis ɛ kpam-tuk tanga nedirîk dyam pyɛng de bê yong mɛ betebut o bemɛn arɔng,

¹⁷na nedirîk celes dyam shinang de bê yong mɛ cebut-bekɛn, na bèpěy, na neshǐ nesɛl o, na neshǐ, tanga nedirîk dyam pyɛng de bê yong mɛ neshǐ,

¹⁸na nedirîk celes dyam shinang de bê yong mɛ kwɔn rangas pyɛ̂ nesang hyɔɔlɔl. A to nɔng ɛ wɔ́rɔ na nedirîk dyam shinang de be yong mɛ kyɛkyɛ wo bekɛrup de bê nása bafabak mɛn na be bang mɛ Kundung Wuna-na-Sira Dagwi Darwey.

¹⁹Mwa pyɛ yemo ya sé e wɔ́rɔ de ba yong tyɛng na pyɛ de Dagwi Darwey a misang a me yaga na me bin tɔk yɛ̄, na me ra fwom o tyɛng ano.

²⁰Gbɔng Gwɔ̀m a to yang hwey mɛ Sɔlɔmɔn, “Vɔk yey ting na hwo tumal gak, pɛrɛ fwom o, hwo wok bengyip wɛt, hwo ye waa wɛt yaga Dagwi Darwey Dagwi, yɛ Dagwi hom a sé tanga hwo. Ê tik hwo vo rekyen wɛt, ko ê gas ɛ na hwo wɛt sɛ̌ hwà yɛnɛ mwa fwom Gbɔng Duk Re Fongol o.

²¹Di, bagyɛng bepiris na BeLevi ba sé e yong ɛn yaga mwa fwom Gbɔng Duk Re Fongol Dagwi o. Ano arɔng, bemat sekwɛl e kagwigwɛ fwom ba sé tanga hwo na be ra kagwigwɛ yere fwom o. Bemat nuyel na mwa bemat ba sé e nɛn mo na be ra kayiyɛ pyɛ de hwà nɔng ɛn nu.”