Read berom 1 Neha-Raane 29 Bible Online

1 Neha-Raane 29 - berom bible

1 Neha-Raane 29

¹Gbɔng Gwɔ̀m Davit a ha na mwa regyɛng bemat o ngan, “A sé e hwey hom Sɔlɔmɔn de Dagwi a ga kasa. Yɛ a rɔngɔl hwey wen zɔng ko a rɔngɔl nà tɔk pyɛ́ yɛt. Fwom de bê ra mo gwa sé rwey o ding-ding, yaga a sé e lɔ gwɔ̀m de bê lɔk yaga bemat wɛt, ko a sé e Gbɔng Duk Re Fongol Dagwi Darwey, Dagwi mot.

²Ma ga ye ngyɛ́k me yong nezap pyɛ́ yaga yong pyɛ́ detidetu ye Gbɔng Duk o, sede dyam shinang, na dyam pyɛng, na dyam pama, na dyam, na yére cɔ́gɔt detidetu, na dyéngere ryat, na beta berat, na beta bùm detidetu tanga beta maabel.

³Na be gwɛ̌ e ra pyɛ́ de ma ga kana tula, ma ga to nɔng yi e pyɛ́ mo nyang, dyam pyɛng, na dyam shinang, yaga ma tɛ̀ yey na me lɔk a Dagwi Darwey Gbɔng Duk Re Fongol.

⁴Ma ga nɔng pyɛ de ya dal tɔ̂n naga (100) ve celes dyam shinang, na tɔ̂n naga beba na kuru banaas (240) ve celes dyam pyɛng na be lolom mɛ varâ Gbɔng Duk o,

⁵tanga na be yong mɛ pyɛ́ detidetu de bemat fwom vwɔ bê ra. Ko di, me rangal ngan, ‘E wa de ê nɔng tó mɛ na a nɔ̂ng Dagwi Darwey nɔrɔ purak na yey mɛ mwa ɛ?’ ”

⁶Ano kwong, bedanelɔ rùhup, na bemat nuyel fwom vê yére Israyɛl, na bemat nuyel vê gu gu (1,000), na vê naga naga (100), na bemat kyé na fwôm gwɔ̀m mwa ba tɛ̀ bato mɛn na be nɔng pyɛ́ yemo na yey mɛn mwa.

⁷Yɛn a nɔng tɔ̂n naga gwining na kuru bataama (170) na bwang, ve dyam shinang, na tɔ̂n naga betat na kuru banaas (340) na bwang, vê dyam pyɛng, na pyɛ de ya vey bagat tɔ̂n naga betyiimin na kuru baba (620) vê dyam pama tanga tɔ̂n gu batat na naga benaas (3,400) na bwang, vê dyam.

⁸Vemo de ba vɔk dyéngere ryat ba wɔ̀ nɔng yɛ e gban dyām wo Gbɔng Duk o, womo de Yɛhiyɛl wo ruhup Gɛrshɔn Levi e bɛrɛng.

⁹Bemat o ba nɔng pyɛ́ yemo na yey rining yaga fwom Dagwi Darwey, ko yɛn a vɔk yey pyɛng sizɔng na nepyak pyɛ́ de bemat o ba nɔng. Nepyak pyɛ́ de yɛn a nɔng o na pɛngɛ a Davit yey vit à yere mo.

¹⁰Davit a somo Dagwi Darwey e hwomo e nuyel regyɛng bemat o, a ye, “À Dagwi Darwey, Dagwi wo dâ beda mot Israyɛl, be nɔng o nerey nesheneshey!”

¹¹Nerey, na reto, na gap, na gbɔng nerat, na segwɔm ba sé bemo. Kayɛ pyɛ e lagwi na jey ya sé myo, ko hwà sé gbɔng gwɔ̀m de hwó re negwɔm e ra begwɔ̀m mwa, na e ra kayɛ pyɛ.

¹²Mwa yas na gbɔng nerat ya yi na hwo, ko hwo hwó re negwɔm e ra kayɛ pyɛ yi na gap mo, na nerey mo, ko hwó tɔk nɔ̂ng kawɛ mwat nerey, na gap arɔng.

¹³Ko di, à Dagwi mot, wot a sé feng a hwo, ko wot e somo gbɔng nerat reza mo.

¹⁴“Ko me tanga bemat hom wot a sé beva de hwà nɔng ot gap na wot a nɔng o pyɛ́ yemo mwa ɛ? Kayɛ pyɛ de wot a vɔk, e hwo de hwà nɔng ot e nɔrɔ, ko wot a to sé nɔng o pyɛ de ya kana sé myo.

¹⁵À Dagwi Darwey, hwà tɔk tsɛng-tsɛng wot a sé kwey e jey yemo sede bemat yere dyuk kɛ bekɛnɛt ayi, sede remo de bedabeda mot bá ra. Neken mot e ngamo e jey na sé sede rezina de re kweres, vit à sɛ̂t yey.

¹⁶À Dagwi Darwey, Dagwi mot, wot a ga vey na pyɛ̂ nedanerey yemo mwa na be lɔk mɛ Gbɔng Duk Re Fongol na wot a nɔ̂ng reza mo rê jɛrɛ nerey. Pyɛ́ yemo mwa ya yi na hwo, ko mwa yɛ ya sé myo arɔng.

¹⁷Ma tɔk hwó mara yey kawɛ mwat, ko hwó simo mwat de be tó yey na yɛ wɛt. Ma sé nɔng o pyɛ́ yemo na yey rining, na tsak o sana tô yey. Ma di, bemat mo de ba tula hɛn e ngamo ba sé vɛ̀sɛ nɔngɔs hwo nɔrɔ hemo na yey pyɛng sizɔng.

¹⁸À Dagwi Darwey, Dagwi wo bedabeda mot Abraham, na Yishak tanga Yakɔp, tɛ̀ yerê tɛ̂ yey hemo he sè gak e ji neyey bemat mo, ko hwo tɛ̀ ɛn be man ɛn na hwo na tsak o.

¹⁹Nɔ̂ng hwey hom Sɔlɔmɔn yey ting na a gyeng nu mo, na pyɛ de hwó simo be ra, na badu mo, na a ra yɛ mwa, na a lɔk Gbɔng Duk Re Fongol de ma ga kana yong pyɛ̂ lɔk o mwa myak.”

²⁰Ano kwong, Davit a nɔ̂ng bemat o nu, a ye, “Somo hin Dagwi Darwey, Dagwi min!” Regyɛng bemat o mwa ba somo Dagwi Darwey, Dagwî bedabeda mɛn, yɛn a ye det à bato mɛn ko yɛn a ye guduruk e vwel, ba nɔ̂ng Dagwi Darwey nerey, ko ba nɔ̂ng gbɔng gwɔ̀m nerey arɔng.

²¹Nusu hwol, yɛn a nɔ̂ng Dagwi Darwey nɔrɔ yas, ba to gwɛ̌ nɔng nɔrɔ̂ yas de be rangas burang vɔk na Dagwi hê bemus gu rining (1,000), na beturuk gu rining (1,000) tanga byôt tyīmit gu rining (1,000), na nenɔrɔ mɛn ne nshi anap, tanga nenɔrɔ pyak yaga mwa BeIsrayɛl.

²²Tuk hane, yɛn a vɔk yey pyɛng sizɔng, yɛn a sè re, yɛn a sè sɔ e nuyêl Dagwi Darwey. Yɛn a to mok rehâ tɛ́ a Sɔlɔmɔn negwɔm, mok o hê neba à hane. Ano yɛn a shushu hɛ na něy e ji reza Dagwi Darwey na a tɛ́ ɛ gbɔng gwɔ̀m mɛn, ko yɛn a ra ano na Zadɔk arɔng na a tɛ́ ɛ piris.

²³Yi ano, Sɔlɔmɔn a sey da mɛ Davit e ra gwofwa negwɔm de Dagwi Darwey a ga kana tɛ̀ gwɛ. Negwɔm mɛ na vɔk wɛng, ko mwa BeIsrayɛl ba gyeng ha mɛ.

²⁴Bemat nuyel fwom, na mwa bemat como tanga begwa mɛ e da mɛn ba sira na be dyɛng bato mɛn na yɛ, remo de a ga tɛ́ ɛ gbɔng gwɔ̀m.

²⁵Dagwi Darwey a nɔng Sɔlɔmɔn gbɔng nerey e nuyel BeIsrayɛl mwa, ko a tɛ̀ ɛ a vɔk gbɔng nerat de na dal ne kawɛ gwɔ̀m de a ga re negwɔm e ji Israyɛl.

²⁶Davit Yɛsɛ a re negwɔm e ra BeIsrayɛl mwa

²⁷neshey kuru banaas (40). A re negwɔm e Hɛbrɔn neshey netaama, ko e Yɛrusalɛm a ra neshey kuru batat na ne netat (33).

²⁸A ku a ga kana kwop kpushuk, na neshey pyak, na nedanerey tyɔng wɛt, ko bemat ba nɔngɔs hɛ nerey sizɔng. Hwey mɛ Sɔlɔmɔn a re negwɔm e to mɛ.

²⁹Hâ raane hê Gbɔng Gwɔ̀m Davit yi e susu mo vɔk e yɛnɛ mo ba jɛk hɛ e bebok-basâ bezarap Dagwi, yɛn à Samwɛl, na Natan tanga Gat.

³⁰Bebok-basa mo ba dura begwong de á re negwɔm, na yere gbɔng reto de á vɔk, tanga pyɛ̂ mwa de yá té na yɛ, na yemo de yá té na BeIsrayɛl tanga yemo de yá té na bavwêl begwɔ̀m detidetu de ba gwɔrɔ hɛ.