Read berom 1 Neha-Raane 5 Bible Online

1 Neha-Raane 5 - berom bible

1 Neha-Raane 5

¹Bemât yerê Rubɛn a vemo. Yɛ Rubɛn o a sé hwey kinât Israyɛl, ko yaga a dyɛng na jɛn-hwâ da mɛ hwak e ra gwât da mɛ, a tɛ̀ gwɛ ligis, ba sey ɛ̀ nedanelɔ ne hwêy negel yi na yɛ ko ba nɔ̂ng Yɔsɛf.

²Mwa ano, a sé e yerê Yuda de ya dal na nerey, ko a sé e ji yɛ de ba sɛ̀ mwat de a re negwɔm e ra bwang yére Israyɛl mwa.

³Nèy Rubɛn bewen o, yɛ hwêy negel Israyɛl, à Hanɔk, na Palu, na Hɛzrɔn tanga Karmi.

⁴Yerê Yɔwɛl à Shemaya, na Gɔk, na Shimei,

⁵na Mika, na Reyaya, na Baal,

⁶tanga Beera, de Tiglat Pilɛsɛr, Da vwel Asirya a re ɛ na como, ko a kyè na yɛ vɔk e de sesam.

⁷Ngyɛrɛ̂ bazâ nelɔ yerê Rubɛn de ba jɛk ha dura bazâ bedâ ruhup vemo ngan: Yɛyɛl, na Zɛkarya

⁸na Bela Azas Shema vê ruhup Yɔwɛl. Yɛn a sangal e Arower tanga e yɛnɛ̂ vwel de ha jut yi e hwomo ha raa rwa bato vɔk e Nebo na Baal Mɛwɔn.

⁹Yɛn a vɔk kàra ngyī rey o e vwêl Gileyat, yaga ano, yɛn a shara hɛn e vwel o e rwa rak pere vɔk e hêy gbingiring de ha nára hɛ pere vɔk e Gwɔrɔt Ɛifaratɛs.

¹⁰E jeng Gbɔng Gwɔ̀m Saul, yerê Rubɛn o ya hwo e ra BeHagar na como, ya mɔbɔs hɛn, ko ya sangal e vwel mɛn o de ha sé e rwa rak wo Gileyat.

¹¹Yerê Gat ya sangal e rwa bato na ye Rubɛn e ji sevwêl Bashan pere vɔk e Saleka e rwa rak.

¹²Yɔwɛl wɛ de a sé dâ ruhup de gwa dal na nerey, ko gwô Shafam gwa raa. Yanai na Shafat arɔng ba sé bedâ rùhup Bashan.

¹³Bwang bemat yere mo ba sé yi e rùhup vemo taama, vɛ à, Mikayɛl, na Mɛshulam, na Sheba, na Yɔrai, na Yakan, na Ziya, tanga Ɛbɛr.

¹⁴Yɛn a sé yi e yére Abihail, hwêy Huri, hwêy Yarowa, hwêy Gileyat, hwêy Mikayɛl, hwêy Yɛshishai, hwêy Yado, tanga hwêy Bus.

¹⁵Ahi Abdiyɛl Guni yɛ de a sé dalɔ̂ rùhup o mwa.

¹⁶Yɛn a sangal e vwêl Gileyat na Bashan e nebapomo mɛn o tanga e nekwɔn gyengês yas ne Sharon.

¹⁷Ba jɛk pyɛ́ yemo mwa e jeng Yɔtam, gbɔng gwɔ̀m Yuda tanga Yɛrɔbɔwam wo neba gbɔng gwɔ̀m Israyɛl.

¹⁸Yére Rubɛn, na Gat tanga rebit yerê Manase yê rwa rak ya vɔk bemat como gu kuru banaas na vɛ banaas, naga betaama, na kuru batyiimin (44,760). Ba ga myak ɛn tyɔng wɛt e de râ fwom na beruga, na bewal tanga begbang.

¹⁹Yɛn a wɔ̂ como na yerê Hagar, na yè Yɛtur, na yè Nafis tanga yè Nodap.

²⁰Yɛn a tɛ̀ gap mɛn e ra Dagwi ko yɛn a ra won na yɛ na a sɛlɛ hɛn. Dagwi a wok won mɛn, ko a nɔng ɛn wɛng e ra BeHagar o mwa na besâ gafiri mɛn.

²¹Yɛn a hashe pyɛ̂ jugu yemo yi na bemat repugu mɛn o, bemaryat gu kuru batungun (50,000) na tyīmit gu naga baba na kuru batungun (250,000), tanga bemadung gu baba (2,000), ko yɛn a vos besam gu naga rining (100,000) arɔng.

²²Yɛn a mɔbɔs bemat repugu mɛn o tyɔng wɛt, yaga Dagwi a sé tanga yɛn e de como mo. E bama mo, yɛn a re nuyel na sangal e yɛnɛ̂ vwel o pere vɔk e jeng de ba hashe hɛn vɔk e de sesam.

²³Bemât rebit yerê Manase e rwa rak ba sangal e yɛnɛ̂ vwêl Bashan, ba raa rwa bato vɔk e Baal-Hɛrmɔn, na Senir tanga Raku Hɛrmɔn, ko nepyak mɛn na gwɛ̌ hɛn ding-ding.

²⁴Bazâ bedanelɔ rùhup mɛn à Ɛfɛr, na Ishi, na Ɛliyɛ, na Asriyɛl, na Yirmiya, na Hadaviya, tanga Yadiyɛl. Yɛn mwa ba sé besuga, ko ba tɛ̀ reza na bemat rùhup mɛn.

²⁵Ko bemat o ba sey tsak o na Dagwi wo bedabeda mɛn wɛt, yɛn a kyɛ́ ɛn hɛ na be re a cî yére yemo de Dagwi a ro yɛ yi e vwel o fongol.

²⁶Yaga ano, Dagwi a tɛ̀ Pul Da vwel Asirya, de ba to tang ɛ à Tiglat Pilɛsɛr, a ba hwo vwel mɛn o na como. A hashe bemat yére Rubɛn, na Gat tanga Manase rwa rak ko a wɔ̀ tik ɛn be sangal e Hala, na Habɔr tanga Hara pere vɔk e Rɔt Gozam. Yɛn a rɔngɔl e hwomo pere vey e remo.