Read berom 2 Neha-Raane 11 Bible Online

2 Neha-Raane 11 - berom bible

2 Neha-Raane 11

¹Jeng de Rɛhɔbɔwam a pom e Yɛrusalɛm, a hwo tula bekaan como yi e yére Yuda na Bɛnyamin, bemat gu naga na gu kuru rwit (180,000). A simo na a wɔ̀ tó mɛ como, na a toyo na yére Israyɛl yê rwa bato e nɛn mɛ.

²Ko Dagwi a ha na Shemaya, zarap mɛ.

³A yang ɛ, a nɔ̂ng Rɛhɔbɔwam Sɔlɔmɔn na mwa yére Yuda tanga Bɛnyamin ha hemo ngan:

⁴Yɛn kwon wɔ̀ hwo e ra begwa mɛn BeIsrayɛl wɛt. Tik na mwa hɛn be toyo vɔk e lɔ. E yɛ Dagwi Darwey de a simo pyɛ́ yane ye té ano. Mwa hɛn ba vɛ̌ wok, ko ba toyo vɔk e lɔ.

⁵Rɛhɔbɔwam a sangal e Yɛrusalɛm, ko a gwɔrɔ bapomô Yuda na bejwa.

⁶A lɔk bapomô Bet-Lɛhɛm, na Ɛlam tanga Tekowa,

⁷Bet-Zur, na Sɔkɔ tanga Adulam,

⁸Gat, na Maresha tanga Zif,

⁹Adorayim, na Lakish tanga Azeka,

¹⁰Zora, na Ayalɔn tanga Hɛbrɔn, vemo vɛ à bapomo mo e Yuda na Bɛnyamin.

¹¹A tɛ̀ be lɔk bejwa mo na gap ko a tɛ̀ mwât nuyel bemat como e kahɛ mo, ko ba tula pyɛ̂ re, na něy tanga nshî anap e ji vɛ.

¹²Ano arɔng, ba tik ɛ beruga berey o, na bebara e mwa bapomo mo, ko ba lɔk vɛ na gap tyɔng wɛt. Ano de a tɛ̀ bavwêl Yuda na Bɛnyamin ba sangal e nɛn mɛ.

¹³A vane ano, bepiris na BeLevi yi e mwa vwêl Israyɛl ba hala nekwɔn fwom mɛn vey na Rɛhɔbɔwam.

¹⁴BeLevi mo ba hala nekwɔn gyenges yas mɛn na benap mɛn ko ba vey e Yuda na Yɛrusalɛm yaga Yɛrɔbɔwam na nèy mɛ ba dul ɛn nà ra fwom mɛn gwô bepiris Darwey.

¹⁵Ko a ga tɛ̀ bepiris o bemɛ yaga nekwɔn sap ci ne berahwol, na ci gam tanga ye bemus beba de a yong.

¹⁶Yaga ano, mwa bemat de ba tɛ̀ yey mɛn e de raà Dagwi Darwey, Dagwî Israyɛl ba raa hɛn yi e mwa yére Israyɛl vey e Yɛrusalɛm na be nára a Dagwi Darwey, Dagwî bedabeda mɛn nɔrɔ yas de be rangas burang.

¹⁷Yɛn a gwɛ̌ a negwɔm Yuda gap, ko yɛn a dyɛng ɛ̀ ma e ra Rɛhɔbɔwam Sɔlɔmɔn neshey netat, yaga yɛn a kyè e begwông Davit na Sɔlɔmɔn neshey netat o.

¹⁸Rɛhɔbɔwam a ra wenêng Mahalat, hwông Yɛrimɔt, hwêy Davit tanga Abihail, hwong Ɛliyap Yɛsɛ.

¹⁹A tɔ a yɛ nèy bewen vemo: Yewush, na Shemariya tanga Zaham.

²⁰E bama mɛ, a jut Maaka hwông Absalɔm de a tɔ a yɛ, Abiya, na Atai, na Ziza tanga Shɛlɔmit.

²¹Rɛhɔbɔwam a tɛ̀ yey na Maaka Absalɔm a dal bwang beha na bejɛn-beha mɛ. A vɔk beha kuru na vɛ rwit tanga bejɛn-beha kuru batyiimin (60), ko a vɔk nèy bewen kuru baba na vɛ rwit (28), na nèy behwong kuru batyiimin (60).

²²Rɛhɔbɔwam a tɛ̀ Abiya Maaka a sè wo nuyêl begwa mɛ, yaga a yong ɛ̀ na yɛ a ba re negwɔm o.

²³A ra pyɛ́ na netsitsɛng de a gas besɔ mɛ e mwa bapomô Yuda na Bɛnyamin, na e mwa bapomo de ba gwɔrɔ vɛ. A nɔngɔs hɛn pyɛ́ shɛrɛk ko a vos a yɛn beha pyak arɔng.