Read berom 2 Neha-Raane 12 Bible Online

2 Neha-Raane 12 - berom bible

2 Neha-Raane 12

¹E bama de negwɔm Rɛhɔbɔwam na ga tumal tiing, ko a ga sɛ̀ gap naka, yɛ na mwa BeIsrayɛl tanga yɛ ba kyini badu Dagwi Darwey.

²E shey hê netungun hê Gbɔng Gwɔ̀m Rɛhɔbɔwam, yaga yɛn a raa Dagwi Darwey na tsak o wɛt, Gbɔng Gwɔ̀m Shishak wo Misra a vey hwo Yɛrusalɛm na como

³na bekyɛkyɛ̂ bedwa gu na naga beba (1,200), na bemât comô bedwa gu kuru batyiimin (60,000) tanga bemât bol de ba tɔk basa nepyak o wɛt yi e Libya, na Sukiim, tanga Etiyopya.

⁴A re bapomô Yuda de ba gwɔrɔ mo, ko a vey wul Yɛrusalɛm.

⁵Ko Shemaya piris a vey na Rɛhɔbɔwam na bemât nuyêl Yuda, de ba ga kana tula hɛn e Yɛrusalɛm yaga bengyip Shishak, ko a yang ɛn, “Dagwi Darwey a ye ngan: Yin a kyini me, ano arɔng ma kyini hin e vwɔ̂ Shishak.”

⁶Ano bemât nuyêl comô Israyɛl na gbɔng gwɔ̀m o ba dyɛng bato mɛn, ko ba ye, “Dagwi Darwey e gas badu e tē.”

⁷Sede Dagwi Darwey a di de yɛn a ga dyɛng bato mɛn ano, ko a to ha na Shemaya a ye, “Yɛn a ga dyɛng bato mɛn. Mê wey na yɛn wɛt, mê séy ɛn e gwong o hwak, ko mê shusha shom hom e ra Yɛrusalɛm e vwɔ̂ Shishak wɛt.

⁸Mwa ano, yɛn ê sè besam mɛ, yaga na yɛn a tɔk nedetû ra a me fwom na ne ra a begwɔ̀m bavwel bahak.”

⁹Ano kwong, Gbɔng Gwɔ̀m Shishak a vey yel e Yɛrusalɛm na jugu. A hashe pyɛ̂ nedanerêy Gbɔng Duk Re Fongol na yê lɔ gwɔ̀m, a hashe kayɛ pyɛ. A hashe beruga dyam shinang de Sɔlɔmɔn a yong arɔng.

¹⁰Yɛrɔbɔwam a yong beruga dyam pama e tô vɛ, ko a tik vɛ e vɔ bemât nuyêl fwom gyeng rwi lɔ gwɔ̀m.

¹¹Kayɛ jeng de gbɔng gwɔ̀m e wɔ e Gbɔng Duk Re Fongol Dagwi Darwey, ko bemât gyéng o be nusu na vɛ, ko e bama mo yɛn e toyo na vɛ e duk gyéng o.

¹²Yaga Gbɔng Gwɔ̀m Rɛhɔbɔwam a dyɛng to mɛ, Dagwi Darwey a doyo shom mɛ yi na yɛ, yaga na a kwon wey na yɛn hywiri wɛt. Ano arɔng pyɛ́ ya to ɛ tyang e vwêl Yuda.

¹³Ano Gbɔng Gwɔ̀m Rɛhɔbɔwam a tɛ̀ negwɔm me ne sè gak e Yɛrusalɛm ko a re nuyel na negwɔm o. Á vɔk neshey kuru banaas na hɛ hining (41) jeng de á hwo re negwɔm, ko á re negwɔm neshey kuru na nɛ netaama (17) e Yɛrusalɛm, gbɔng repomo de Dagwi Darwey a kana kasa e mwa yére BeIsrayɛl na a tɛ̀ reza mɛ e hwomo. Rezâ neng mɛ à Naama wo Amɔn.

¹⁴A ra neves, yaga a tɛ̀ yey mɛ ye jama simô Dagwi Darwey e ra pyɛ de ê ra wɛt.

¹⁵Tomông Rɛhɔbɔwam yi e susu mo vɔk e yɛnɛ mo, ba jɛk vɛ e pyɛ̂ bare yê Shemaya zarap Dagwi na yê Ido mwât bɛrɛng. Rɛhɔbɔwam na Yɛrɔbɔwam bá sǎ e de como na bemɛn.

¹⁶Rɛhɔbɔwam á ku, ko ba lɛrɛ hɛ e gbɔng repomô Davit, ko hwey mɛ Abiya a tút e ra gwofwa negwɔm o e to mɛ.