Read berom 2 Neha-Raane 13 Bible Online

2 Neha-Raane 13 - berom bible

2 Neha-Raane 13

¹Abiya a hwo re negwɔm Yuda e shey hê kuru na hɛ rwit de Yɛrɔbɔwam a sè re negwɔm Israyɛl.

²A re negwɔm o yi e Yɛrusalɛm neshey netat. Dē mɛ Mikaya a sè hwông Uriyɛl wo Gibeya. E bamâ jeng, como ya sogo e tê Abiya na Yɛrɔbɔwam.

³Abiya a wɔ̂ como mo na bemat de a kasa gu naga banaas (400,000), ko Yɛrɔbɔwam a kasa bemat gu naga rwit (800,000) wɔ sɛ̀ ɛ mɛ.

⁴Abiya a wɔ tut e sɛndɛng Raku Zemarayim de wa sé e vwêl berakû Ɛfrayim, ko a hwo yila Yɛrɔbɔwam na mwa BeIsrayɛl na gbɔng fwɔ a ye, “Wet in betong na me à Yɛrɔbɔwam na mwa BeIsrayɛl!

⁵Yin a tɔk wɛt, Dagwi Darwey, Dagwî BeIsrayɛl a wuna hɛ na sira de be kwɔrɔ hɛ wɛt na Davit ko a nɔng ɛ, yɛ na nèy mɛ negwɔm e ra mwa BeIsrayɛl gbak-gbak wɛt a?

⁶Ko mwa ano Yɛrɔbɔwam Nebat, mwât fwôm Sɔlɔmɔn Davit, a sogo a darwey mɛ na nehywɛ.

⁷A tula regyɛng nèy gul de na dal gap Rɛhɔbɔwam Sɔlɔmɔn e jeng de a sè rɔngɔl hwey sana netsitsɛng, ko na bengyip, ko a tɔk kyɛ́ ɛ pyɛ de yɛn a simo a ra wɛt.

⁸“Ko di, a remo yin e bare yin ê kyɛm yin ra retek na segwɔm Dagwi Darwey e vwɔ̂ nèy Davit, yaga yin a sé gbɔng regyɛng, ko yin a vɔk bemus dyam shinang de Yɛrɔbɔwam a yong na be sè bedagwi min a?

⁹Yin a ga ro bepiris Darwey, na yerê Aharon tanga BeLevi, ko yin a yong a tó min bepiris o bemin sede bemât bavwel bahak wɛt a? Kawɛ mwat de a vey nɔng in mus na tyīmit tyaama yin e tik ɛ jaram na a sè piris pyɛ́ de ya sé bedagwi wɛt.

¹⁰Ko di wot à, Dagwi Darwey yɛ à Dagwi mot, wot a ga kyini hɛ wɛt. Wot a vɔk bepiris de be ra a yɛ fwom de ba sé yerê Aharon, ko BeLevi be sɛlɛ hɛn na fwom o.

¹¹Yɛn e nása a Dagwi Darwey kanɛ nagasi na nahywegelek nɔrɔ̂ yas de be rangas burang na hê pyɛ̂ nesang hyɔɔlɔl. Yɛn e vɛ̀sɛ tikis ràng nɔrɔ̂ kpam-tuk e ra tebut de wa sé haalal, ko kanɛ nawiri yɛn e tɛ̀sɛ kya e bekywa-kya de ba sé e ra kwɔ̂n tikîs vɛ hê dyam shinang. Wot e gyeng nû Dagwi Darwey, Dagwi mot, ko di yin, yin a ga kyini hɛ.

¹²Di in de Dagwi a sé tanga wot, a sé e nuyel mot, ko bepiris mɛ na bedurum mɛn ba sé na be pɛsɛl bedurûm como e ra yin. À yin BeIsrayɛl, yin kwon ra como na Dagwi Darwey, Dagwî bedabeda min wɛt! Yin ê di wɛng wɛt!”

¹³E jeng o, Yɛrɔbɔwam a ga kana tomo bemât como mɛ e lɛrɛ e bamâ BeYuda, yi ano, bwarwêy bemat como mɛ bê man gèy na vê Yuda, ko vê lɛrɛ bê hwo ɛn yi e bama.

¹⁴Jeng de BeYuda ba ye ganga, ko yɛn a di bemât como e nuyel mwa na bama mɛn. Yɛn a tosho a Dagwi Darwey, ko bepiris mɛ ba hwo pɛsɛl bedurum o.

¹⁵Ko BeIsrayɛl ba tɛ̀ kûn como. Jeng de yɛn a tɛ̀ kun ano, ko Dagwi a re Yɛrɔbɔwam na mwa BeIsrayɛl e bayîs Abiya na BeYuda.

¹⁶Ano BeIsrayɛl ba tele e bayîs BeYuda, ko Dagwi a nára hɛn e vɔ mɛn.

¹⁷Abiya na bemât como mɛ ba mɔbɔs hɛn tyɔng wɛt, ba wey na bemât comô BeIsrayɛl de ba kasa gu naga batungun (500,000).

¹⁸Yi ano, BeIsrayɛl ba dyɛng bato mɛn e jeng o, ko BeYuda ba re ɛn, yaga yɛn a tɛ̀ gap mɛn e ra Dagwi Darwey, Dagwî bedabeda mɛn.

¹⁹Abiya a ro Yɛrɔbɔwam, ko a re bapomo vemo yi na yɛ: Bet-Ɛl na nebapomo mɛ, na Yɛshana na nebapomo mɛ, tanga Ɛfrɔn na nebapomo mɛ.

²⁰Yɛrɔbɔwam a to sɛ̀ reto yerê rê raane e jeng Abiya wɛt. Dagwi Darwey a fala hɛ ko a ku.

²¹Ko Abiya a gwɛ̌ gap. A ra wenêng beha kuru na vɛ benaas, ko a tɔ nèy bewen kuru baba na nɛ neba, na behwong kuru na vɛ betyiimin.

²²Bwang pyɛ́ de Abiya a ra, na negwɔn mɛ tanga tomong mɛ ba jɛk yɛ e Bwok-basa Neha Raane de Ido, zarap Dagwi a jɛk.