Read berom 2 Neha-Raane 15 Bible Online

2 Neha-Raane 15 - berom bible

2 Neha-Raane 15

¹Gabik Dagwi ha sɛ̀ reto e ra Azarya Ɔbɛt.

²A kyè wɔ man na Asa ko a yang ɛ, “À Gbɔng Gwɔ̀m Asa, wet betong na me hwo tanga BeYuda na BeBɛnyamin: Dagwi Darwey a sé na yin mwa jeng de yin a sé na yɛ. Ka sede yin a jama hɛ, ko yin ê sɛ̀ ɛ, ko ka sede yin a kyini hɛ, yɛ̀ ê kyini hin arɔng.

³BeIsrayɛl ba ga sangal neshey pyak sana raa Dagwi wo tsak o, sana bepiris mɛ de bê basa a yɛn, na sana gyeng badu Dagwi arɔng.

⁴Ko e jeng de reyɔm re sɛ̀ ɛn, yɛn e de tē dedung e de toyo vey na Dagwi Darwey, Dagwî Israyɛl. Yɛn e hwo jama hɛ, ko yɛn e sɛ̀ ɛ.

⁵E jeng o bemat be tɔk kyě kyè sàng-gèy e nekwɔn de be simo wɛt, yaga kahɛ vwel ha vɔk reyɔm tanga sogô nehywɛ.

⁶Yére bemât jey ye ra repugu na bemɛn, bapomo be ra ano arɔng, yaga Dagwi e vɛ̀sɛ a yɛn na reyɔm na lashê yey detidetu.

⁷Ko di, yin vɔk in yey ting, a yang in sha wɛt, yaga bê tala hin pyɔlɔ̂ tomong min.”

⁸Jeng de Asa a wok ha de Azarya Ɔbɛt a yi mɛ na Dagwi, ko a yang ɛ gak gbak. Ano kwong a wey na pyɛ̂ sekwit byɛm-byɛm yi e mwa bavwel Yuda na Bɛnyamin na mwa bapomo de a ga re na como e vwêl berahwôl Ɛfrayim. A to yong gàgbang rangâs yas vɔk na Dagwi Darwey, de wa sé e nuyêl lalâ Gbɔng Duk Re Fongol.

⁹A hwo yila mwa BeYuda na BeBɛnyamin, mwa na vemo yi e Ɛfrayim, na Manase tanga Simɛyɔn de yɛn a sé sangal na yɛn, yaga bemat pyak sizɔng yi e sevwêl Israyɛl ba ga wɔ̀ sɛ̀ Asa jeng de yɛn a di de Dagwi Darwey, Dagwi mɛ a sé na yɛ.

¹⁰Yɛn a tula hɛn e Yɛrusalɛm e pwɛl gwô netat gwô shey hê kuru na hɛ tungun hê negwɔm Asa.

¹¹Tuk hane, yɛn a vɛ e ji yas de ba hashe e jugu ko ba nára a Dagwi Darwey nɔrɔ̂ yas de be yɛt. Yɛn a nɔng ɛ berɔndɔng naga betaama (700), na tyīmit gu bataama (7,000).

¹²Yɛn a wuna hɛn na sira na be jama Dagwi Darwey, Dagwî bedabeda mɛn, na neyey mɛn mwa, na simo mɛn mwa.

¹³Yɛn a nɔng nu be mɔrɔ kawɛ mwat, kɛ a rɔngɔl bwot o, kɛ a ga kwop, kɛ rwas kɛ hwā womo de a re a Dagwi Darwey fongol wɛt.

¹⁴Yɛn a wuna hɛn na sira mo na gbɔng fwɔ, na môk yey pyɛng, ko yɛn a pɛsɛl bezing na bedurum arɔng.

¹⁵Mwa BeYuda ba vɔk yey pyɛng na sira mo yaga yɛn a ra hɛ na yey mɛn mwa, ko yɛn a jama hɛ na simo mɛn mwa, ko yɛ a sey ɛn, ko Dagwi Darwey a nɔng ɛn pɔngɔ e kawɛ bak.

¹⁶Gbɔng Gwɔ̀m Asa a pat Maaka neng-gwɔ mɛ kunat yi e gwofwa mɛ gwo Neng Gwɔ̀m, yaga a yong pyɛ sekwit byɛm-byɛm yaga Ashera, ci hwā mo. Asa a tow pyɛ sekwit o, a kpɔgɔm yɛ, ko a wɔ̀ rangas cɛ́k o e Nɛk Kidrɔn.

¹⁷Ko a tɔk wey na mwa nekwɔn sekwit ne berahwol e mwa sevwêl Israyɛl wɛt. Mwa ano, Asa pyɛ mɛ a nàra pang na Dagwi Darwey neyɛnɛ neshey mɛ.

¹⁸A toyo na pyɛ́ mwa e Gbɔng Duk Re Fongol yemo de da mɛ Abiya á kana tik jaram yaga Dagwi tanga mwa pyɛ̂ dyam shinang na dyam pyɛng, tanga neshǐ na bwang pyɛ̂ fwom de yɛ pyɛ mɛ a tik jaram yaga Dagwi.

¹⁹Ba to tó como cak wɛt sɛ̌ shey hê kuru batat na hɛ tungun hê negwɔm mɛ.