Read berom 2 Neha-Raane 16 Bible Online

2 Neha-Raane 16 - berom bible

2 Neha-Raane 16

¹A vane ano, e shey hê kuru batat na hɛ tyiimin hê negwɔm Gbɔng Gwɔ̀m Asa, Gbɔng Gwɔ̀m Baasha wo Israyɛl a wɔ̀ hwo e ra Yuda, a re repomô Rama, ko a yong jwâ-pomo mo, a gwɛ a wɛ gap. A tik ɛ bemât como, na be dul mɛ bemat nà yel kɛ be nusu yi e sevwêl Gbɔng Gwɔ̀m Asa wo Yuda.

²Yaga ano, Asa a hashe dyam pyɛng na dyam shinang yi e befang Gbɔng Duk Re Fongol tanga vê lɔ gwɔ̀m, a tomo a Bɛn-Hadat, gbɔng gwɔ̀m Sirya de a sé sangal e Damaskus a yang ɛ,

³“Tik na wot wuna hot na sira tanga hwo, sede remo de bedabeda mot bá kana ra! Dyam shinang na dyam pyɛng yemo ya sé nɔrɔ mō. Tik na hwo kwɔrɔ wuna-na-sira min na Baasha gbɔng gwɔ̀m Israyɛl. Wɔ̀ hwo ɛ na como, yaga na yɛ a bin nu ɛ na bemât como mɛ yi e vwel hom.”

⁴Bɛn-Hadat a simo pyɛ de Asa a yong o, a tomo bemât como mɛ, na be wɔ̀ hwo e ra bapomô Israyɛl. Ba re bapomô Iyɔn, na Dan, na Abel — Bet-Maaka na bak Gworep Galili, tanga neyɛnɛ̂ sevwêl Naftali.

⁵Baasha a wok pyɛ de ba ga ra, ko a tik yông Rama, a toyo vɔk e Tirza.

⁶Ano kwong, Asa a hwo tomo, be rini BeYuda mwa, kawɛ mo, na be wɔ̀ hashe beta tanga babîm cɔ́gɔt de Baasha a kana tula, na a yong mɛ Rama. Ko Asa a yong bapomô Geba e sevwêl Bɛnyamin, tanga Mizpa na pyɛ́ yane mo.

⁷E jeng yane, Hanani mwât bɛrɛng a wɔ̀ sɛ̀ Gbɔng Gwɔ̀m Asa wo Yuda, ko a yang ɛ, “Remo de hwà tɛ̀ gap mo e ra gbɔng gwɔ̀m Sirya, ko e raa Dagwi Darwey, Dagwi mo wɛt, bemât comô Sirya ba ga hywit ɛn e vwɔ mo.

⁸Hwà bare, BeEtiyopya na BeLibya ba vɔk bemât como tyɔng wɛt mwa na bekyɛkyɛ̂ bedwa na bemat bedwa wɛt a? Mwa ano, yaga hwà tɛ̀ gap mo e ra Dagwi Darwey, a nára hɛn e vwɔ mo.

⁹Bayîs Dagwi Darwey be sǎ e de bɛrɛng jey mwa, na a nɔ̂ng vemo de be tɛ̀ gap mɛn e ra yɛ na yey mɛn mwa gap. Di hwà ga ra fwôm netɔn e remo. Yaga ano e ngamo nuyel hwô sǎ e de tô como.”

¹⁰Ha mo ha tɛ̀ Asa a wok shom na mwât bɛrɛng o, a tɛ̀ ɛ e lɔ̂ ngyang, ko ba tɛ̀ bol mɛ e tê sesek, a lashe yey na yɛ sizɔng. Yi e jeng o Asa a hwo tak a bemat mɛ behak arɔng.

¹¹Pyɛ́ mwa de Asa a ra, yi e pɛrɛ mo vɔk e yɛnɛ mo, ba jɛk yɛ e Bwok-basâ Pyɛ̂ Bare yê Begwɔ̀m Yuda na Israyɛl.

¹²E shey hê kuru batat na hɛ shatat (39) hê negwɔm mɛ, rɔ̂ bwol ha tɛ̀ ɛ a tɛ́ ɛ kùt o, ko mwa ano a jama Dagwi Darwey wɛt, ko a jama sɛlɛ̂ bevwoshon.

¹³Ano Asa a ku e shey hê kuru banaas na hɛ hining (41) hê negwɔm mɛ.

¹⁴Ba lɛrɛ hɛ e sak de a kana kas a tó mɛ e ji gwofwa e gbɔng repomô Davit. Yɛn a lasha hɛ e kpap de ba sila wɛ na nezap něy ne bemât sekwɛl yong o, ko ba tula kya tyɔng wɛt na be nɔng ɛ mɛ nerey.