Read berom 2 Neha-Raane 17 Bible Online

2 Neha-Raane 17 - berom bible

2 Neha-Raane 17

¹Yɛhɔshafat hwey mɛ a re negwɔm e to mɛ, ko a tɛ̀ negwɔm mɛ ne vɔk gap pyak e ra ne Israyɛl.

²A tikis bemât como e mwa bapomô Yuda de ba gwɔrɔ vɛ, na mwa bapomô Ɛfrayim de da mɛ Asa a kana re na como.

³Dagwi Darwey á sè na Yɛhɔshafat, yaga á raa begwông da mɛ vê susu mo, de a kyɛ́ ɛ nà raa Baal.

⁴A jama Dagwî da mɛ, ko a gyeng badu mɛ, a raa negwɔn neves ne BeIsrayɛl wɛt.

⁵Yaga ano, Dagwi Darwey a tɛ̀ negwɔm o sē tumal tiing e vwɔ mɛ. BeYuda mwa ba vɛ̀sɛ nɔngɔs hɛ nenɔrɔ. Yi ano a tɛ́ ɛ darwey ko ba nɔngɔs hɛ nerey arɔng.

⁶A ye ngyɛ́k e de raà Dagwi Darwey, ko a gangas nekwɔn sekwit ne berahwol tanga sesêk Ashera, ci hwā mo, e Yuda.

⁷E shey he netat hê negwɔm mɛ, a tomo bemât nuyêl fwom mɛ: Bɛn-Hayil, na Obadya, na Zɛkarya, na Nɛtanɛl tanga Mikaya na be wɔ̀ basa bapomô Yuda.

⁸Yɛn á sè tanga BeLevi, na Shemaya, na Netaniya, na Zɛbadya, na Asahɛl, na Shɛmiramɔt, na Yɛhɔnatan, na Adoniya, na Tobiya, tanga Tob-adoniya, ko BeLevi de ba sé bepiris à Ɛlishama, na Yɛhɔram.

⁹Yɛn á jut bwok-basa Badu Dagwi Darwey ko yɛn á raa bapomô Yuda mwa be basa a bemat o vɛ.

¹⁰Bengyip Dagwi Darwey ba hwo e ra mwa begwɔ̀m bavwel de ba gwɔrɔ Yuda, yi ano, yɛn a ra como na Yɛhɔshafat wɛt.

¹¹Behak e ji BeFilisti ba vey nɔng ɛ nezap nenɔrɔ mwa na ne dyam pyɛng arɔng. BeArap behak arɔng ba vey nɔng ɛ nɔrɔ̂ vyēl pyɛng gu bataama na naga betaama (7,700) na vyēl shi gu bataama na naga betaama (7,700) mó arɔng.

¹²Yi ano Yɛhɔshafat a re nuyel na gwɛsɛ̂ gap na reto. A lɔk bapomo de ba gwɔrɔ vɛ na jwa tanga begban e yɛnɛ̂ vwêl Yuda,

¹³ko ba bangas ɛ gwakû pyɛ́ detidetu. A vɔk bemat como, besuga za wɛt e Yɛrusalɛm.

¹⁴E ruhup mɛn yɛn á sè ngan: E Yuda begwɔ̀m bemât como vê gu gu bá sè: Adna yɛ a gbɔng o na bemât como gu naga batat (300,000).

¹⁵Mwat de a raa hɛ à Yɛhɔhanan na vɛ gu naga baba na gu kuru rwit (280,000).

¹⁶Womo de á raa à Amasiya Zikri, de a nɔng tó mɛ yaga fwôm Dagwi Darwey na besuga gu naga baba (200,000).

¹⁷E Bɛnyamin Ɛliyada, suga na bemât como gu naga baba (200,000) de ba vɔk begbang na beruga.

¹⁸Mwat de a raa hɛ à Yɛhɔzabat na bemat gu naga na gu kuru rwit (180,000) de ba ga yóng ɛn yaga como.

¹⁹Yɛn vemo mwa bá sè na Gbɔng Gwɔ̀m Yɛhɔshafat sana tɛ̀ vemo de a tik ɛn e mwa neyɛnɛ̂ bapomô Yuda de ba gwɔrɔ vɛ na jwa.