Read berom 2 Neha-Raane 18 Bible Online

2 Neha-Raane 18 - berom bible

2 Neha-Raane 18

¹Mwa ano de Yɛhɔshafat a sè gbɔng darwey ko á vɔk gbɔng nerey arɔng, á wuna to mɛ na Ahap e weneng.

²E bamâ neshey tyɔng, a hwo wɔ na Ahap e Samariya. Ahap a yɛt vyēl na berɔndɔng tyɔng wɛt na a ra a yɛ tanga bemat mɛ mɛ̀ nzem, na a tɛ̀ ɛ a wɔ̂ como tanga yɛ e repomô Ramɔt e Gileyat.

³Gbɔng Gwɔ̀m Ahap wo Israyɛl a yâng Gbɔng Gwɔ̀m Yɛhɔshafat wo Yuda, “Hwô sɛ̀ me na wot wɔ e Ramɔt-Gilɛyat bɛ̀?” Yɛhɔshafat a yang ɛ, “Ey, wot na hwo wot a sé vining o, bemât como hom ba sé bemo. Wot ê wɔ tanga yin.”

⁴Yɛhɔshafat a to ye, “Ko tik wot rangal pyɛ de Dagwi Darwey ê ha a wot e ngyen.”

⁵Ahap a hwo tomo be vey na bezarap mɛ sede naga benaas (400). A rangal hɛn, a ye, “Wot wɔ̀ hwo e ra BeSirya e Ramɔt-Gilɛyat kɛ wey ɛ?” Yɛn a yang ɛ, “Ey, ci! Dagwi Darwey ê sɛlɛ hwo, na hwo di wɛng, hwo re ɛn.”

⁶Ko Yɛhɔshafat, yaga e simo na a tɔk mwin, bê di wɛng, a yâng Ahap, “Zarap hwak a to sé womo de Dagwi Darwey ê ha yi na yɛ wɛt a?”

⁷Ahap a yang ɛ, “Ey, hwak a sɛ́. Ko me kyɛ́ me hɛ, yaga kayɛ jeng e tɔk ha a me hâ wɛng wɛt. Zá mɛ à Mikaya Imla.” Yɛhɔshafat a yang ɛ, “Hwo ye ano wɛt, a gwɔ̀m.”

⁸Ahap kwong a tomo mwât fwom hwak, a wɔ̀ yila Mikaya na a vey ziri.

⁹E jeng o, Ahap tanga Yɛhɔshafat de ba tɔrɔ hɛn na yɔ̀m negwɔm mɛn, yɛn a sé sangal e nekwɔn sangal mɛn e gazu bagat na rwi ruhûp Samariya. Yɛn a sé wet betong na neha de bezarap ba sé ha a yɛn.

¹⁰Zɛdɛkiya Kenaana a sé gwining e ji mɛn. A ga yong ngɛngɛ na dyam, a sé gbɔ, a tē, “À Ahap, Dagwi Darwey a ye ngan: ‘Hwô wɔ̀ hwo e ra BeSirya, ko bê tɔk di wɛng e ra hwo wɛt, tyɛng sede be tɔk di wɛng e ra mus de wa vɔk ngɛngɛ̂ dyam wɛt. Hwô wey na yɛn mwa hywiri.’ ”

¹¹Mwa bezarap ba simo wɔgɔ, Ahap a wɔ̀ hwo e ra BeSirya e Ramɔt, ko yɛn a sira hɛn, Dagwi Darwey ê sɛlɛ hɛ na a re ɛn.

¹²Tom de ba tomo, na a wɔ̀ jut Mikaya, a hanat na yɛ, a ye, “Di, mwa bezarap ba ha a Ahap yɛgɛt yat. A sé naka na hwo wɔ̀ hā ano arɔng.”

¹³Mikaya a yang ɛ, “Ma sira me na Dagwi Darwey, ma rɔda ha pyɛ de ê ha a me zɔng!”

¹⁴Jeng de Mikaya a wɔ̀ wul na Ahap, ko Ahap a rangal hɛ, a ye, “À Mikaya, wot wɔ̀ hwo e ra BeSirya e Ramɔt a?” Mikaya a toyo a yɛ, a ye, “Ey ci, hwô di wɛng! Dagwi Darwey ê sɛlɛ hwo e ra yɛn.”

¹⁵Ahap a hanat, a ye, “À Mikaya, zang ala de mê yang o, hwo ha a me tsak o zɔng, jeng de hwó ha e ji rezâ Dagwi Darwey ɛ?”

¹⁶Mikaya a yang ɛ, “E ji negwi-ywey, ma di bemât comô Israyɛl ba shara hɛn shǎm e rahwol sede vyēl de vit a lwêk yɛ. Ko Dagwi Darwey a ye, ‘Di, bemât comô Israyɛl de vit à hɛn à mwât nuyel. Tik na yɛn a toyo hɛn vɔk e lɔ yaang zɔng!’ ”

¹⁷Ahap a hwo doyo wɔ na Yɛhɔshafat, a yang ɛ, “Má gà sè nà há a hwo, yɛ e mok a me gawey a?”

¹⁸Mikaya a to yang ɛ, “Wok hâ Dagwi Darwey hemo! Ma to di Dagwi Darwey a sé sangal e gwofwa negwɔm mɛ, kayɛ pyɛ cen e lagwi ya rɔnɔ hɛ.

¹⁹Dagwi Darwey a rangal, a ye, ‘E wa de ê tɔk wɔ̀ kwɛlɛng Ahap, na a wɔ́ e Ramɔt e kwɔn de bê wɔ̀ mɔrɔ hɛ ɛ?’ Cak ya ye pyɛ cak, ko cak ya ye pyɛ cak detu.

²⁰Ko gabik hak ha yi, ha yâng Dagwi Darwey, ‘Mê wɔ̀ kwɛlɛng hɛ!’ Dagwi Darwey a rangal hɛ, a ye, ‘E rɛ̌ de hwô ra ɛ?’

²¹Ha ye, ‘Mê tɛ̀ bezarap mɛ, be vɛ́sɛ a yɛ bɔs!’ Dagwi Darwey a yang ɛ, ‘Ey, a jam ano! Ci, na hwo wɔ̀ ra ano!’ ”

²²Mikaya a yang gwɔ̀m, “Pyɛ mó ya té tyɛng ano. Di, Dagwi Darwey a tɛ̀ bezarap mō, be vɛ́sɛ a hwo bɔs, ko mwin, a ga yong ɛ̀, gawey hê hwo e ra hwo!”

²³Zɛdɛkiya a hwo sogo, a kyè wɔ na Mikaya, a vɛ̌ rusu hɛ e rwanang. A yang ɛ, “E rɛ̌ de Dagwi Darwey a tik nà ha na me na a vey ha na hwo ɛ?”

²⁴Mikaya a toyo a yɛ, a yang ɛ, “Hwô di pyɛ mo tuk de hwô tele wɔ̀ lɛrɛ hwo e ji duk e bâk lɔ hak.”

²⁵Ahap a nɔng nu, be vo Mikaya, be kyè mɛ, na be tɛ̀ ɛ e vwɔ̂ sɔ mɛ Yɔwash tanga Amɔn gwɔmna Samariya.

²⁶Be ha a yɛn, be tɛ̀ ɛ e lɔ̂ ngyang, na be nɔngɔs hɛ kekpam-tuk tanga kenshi zɔng, sɛ̌ jeng de yɛ a ba toyo tyang e ngyen!

²⁷Mikaya a yang ɛ, “Ka sede hwà ba toyo tyang, ko sɛ̌ Dagwi Darwey a ha yi na me wɛt.” Ko a yâng bemat de ba tula hɛn, “Yin ye bam à ha hom wɛt!”

²⁸Ahap, gbɔng gwɔ̀m Israyɛl tanga Yɛhɔshafat, gbɔng gwɔ̀m Yuda ba hwɔlɔ a bemât como mɛn gwong vɔk e de como e Ramɔt e Gileyat.

²⁹Gyam na yɛn a sogo vɔk e de como mo, Ahap a ha a sa mɛ Yɛhɔshafat, a ye, “Mê doyo me, na me tɛ́ me sede gwining e ji bemât como, ko hwô tɔrɔ hwo na yɔ̀m negwɔm mō.” Ano de Ahap a doyo hɛ, a tɔrɔ hɛ na pyɛ̂ como zɔng, ko ba kyè vɔk e de como mo.

³⁰Gbɔng gwɔ̀m Sirya a ga kana nɔ̂ng bemât nuyêl bekyɛkyɛ̂ bedwâ como mɛ kuru batat na vɛ beba (32) nu, yɛn a kwon raa mwat hwak wɛt sɛ̌ gbɔng gwɔ̀m Israyɛl zɔng.

³¹Yaga ano, jeng de yɛn a di Yɛhɔshafat, yɛn a bare, a sé gbɔng gwɔ̀m Israyɛl, ko yɛn a doyo, na be hwo e ra yɛ. Ko jeng de a pɛl sekûn como mɛ, Dagwi Darwey a vey sɛlɛ hɛ, Dagwi a hwɔtɔ hɛn yi na yɛ.

³²Bemât nuyel bekyɛkyɛ̂ bedwâ como, ba di a sé e gbɔng gwɔ̀m Israyɛl wɛt, ko yɛn a tik nà ro ɛ.

³³Ko mwât comô Sirya hwak a ta kwet kpɛɛ zɔng, ko kwet o gwa kwey e tê pyɛ̂ comô Ahap, gwa wɔ̀ toro hɛ. A hanat, “Ba ga mǎ me!” A yâng mwât hwɔlɔ̂ kyɛkyɛ̂ dwa mɛ, a pat ɛ yi e kwɔn o.

³⁴Jeng yane, como mo ya fes. Ba gyepes Ahap e ji kyɛkyɛ̂ dwa mɛ, e bɛrɛng BeSirya. Nemi mɛ na lusha hɛ, na kyiri ji kyɛkyɛ mo, ko nahywegelek a ku.