Read berom 2 Neha-Raane 2 Bible Online

2 Neha-Raane 2 - berom bible

2 Neha-Raane 2

¹Gbɔng Gwɔ̀m Sɔlɔmɔn a tɛ̀ e yey mɛ na a lɔk Gbɔng Duk Re Fongol yaga rezâ Dagwi Darwey tanga lɔ gwɔ̀m yaga yɛ pyɛ mɛ.

²Ano a tɛ̀ bemat gu kuru bataama (70,000) na be kyě hashe pyɛ̂ fwom o, ko bemat gu kuru rwit (80,000) na be dak beta e berahwol. A tɛ̀ bemat gu batat na naga betyiimin (3,600) na be sè bemât nuyel fwom o.

³Sɔlɔmɔn a hwo tomo betom na ha vɔk na Hiram, gbɔng gwɔ̀m Tur, a ye: “Raane hwá ra na da hom Davit ko hwá tomo a yɛ na cɔ́gɔt sida na a lɔk a tó mɛ lɔ gwɔ̀m de a sangal ɛ.

⁴Di, a remo ma sé kyè wɔ̀ lɔk lɔ yaga rezâ Dagwi Darwey, Dagwi hom, na me tik hɛ jaram yaga nása nɔrɔ̂ pyɛ̂ nesang hyɔɔlɔl e nuyel mɛ, na be nása ɛ̀ nenɔrɔ̂ ràng kpam-tuk kayɛ jeng, na nenɔrɔ̂ yas de be rangas burang nagasi na nahywegelek, mwa na ne Tuk Shábat, na ne tuk nzem pwɛl pwas tanga ne negasî wusal detidetu ne Dagwi Darwey, Dagwi mot, sede remo de a nɔng nu e ra nɛ yaga BeIsrayɛl neshey gbak-gbak.

⁵Lɔ de mê lɔk o hê sè rey o, yaga Dagwi mot a dal bedagwi mwa.

⁶Ko e wa de ê tɔk lɔk lɔ a remo de lagwi, mwa na lagwi de wa dal mwa e rak o, bê kyɛm be jut ɛ́ wɛt ɛ?

⁷Yaga ano, tomo a me mwât sekwɛl e fwôm dyam shinang, na dyam pyɛng, na dyam pama, na dyam, tanga yɔ̀m de bùm o ba sé zwey, na swinang zoyong, tanga wilwil, a to vɔk sekwɛl tsêp pyɛ́ arɔng, na yɛ a vey ra fwom tanga bemât sekwɛl de ba sé na me e Yuda na Yɛrusalɛm, vemo de da hom Davit a tik a me.

⁸Tomo a me na cɔ́gɔt sida, na fir, tanga algum arɔng yi e Lɛbanɔn, yaga ma tɔk bemât fwom mo ba vɔk sekwɛl tôw cɔ́gɔt Lɛbanɔn. Bemât fwom hom bê ra fwom na bemo

⁹na be yong a me cɔ́gɔt shɛrɛk, yaga lɔ de ma sé kyè wɔ̀ lɔk hê se rey o, na pyɛ langat.

¹⁰Mê nɔ̂ng bemât fwom mo, de ba tow cɔ́gɔt o kilo gu banaas na naga benaas (4,400) vê alkama, na kilo gu banaas na naga benaas (4,400) vê baale, na galon gu naga rining na gu kuru rining (110,000) vê nshî anap, tanga galon gu naga rining na gu kuru rining (110,000) vê něy pwat arɔng.”

¹¹Ano Gbɔng Gwɔ̀m Huram wo Tur a toyo mɛ e bwok-rwang de a jɛk a Sɔlɔmɔn, a ye, “Dagwi Darwey a tɛ̀ yey na bemat mɛ, yaga ano a tɛ̀ hwo sè gbɔng gwɔ̀m e ra yɛn!”

¹²Huram a to ye, “Be somo Dagwi Darwey, Dagwî Israyɛl, de a yong lagwi na jey, de a nɔ̂ng Gbɔng Gwɔ̀m Davit hwey wen hê netsitsɛng, a nɔ̂ng hɛ bɛrɛng pyɛ́ yɛɛlɛl na tɔ́k, hemo de hê lɔk Gbɔng Duk Re Fongol yaga Dagwi Darwey, na lɔ gwɔ̀m yaga tó mɛ.

¹³“Ma sé tomo a hwo remo na Huram Abi, mwât sekwɛl tom vwɔ, de a vɔk tɔ́k pyak.

¹⁴A sé hwêy hwông yerê Dan ko da mɛ a sé mwât Tur. Ba ga myak ɛ na a ra fwom na dyam shinang, na dyam pyɛng, na dyam pama, na dyam, na beta, tanga cɔ́gɔt, mwa na yɔ̀m zwey, na ye wilwil, na ye zoyong tanga linen puruk, na a tɔk tsep pyɛ́ detidetu, na a tɔk yong nezap pyɛ́ de ba jining a yɛ, yɛ na bemât fwôm vwɔ mō, bemât fwôm vwɔ̂ darwey hom Davit da mo.

¹⁵“Yaga ano, tik na darwey hom a tomo a bemât fwom mɛ alkama, na baale, na něy tanga nshî anap sede remo de a vo nu.

¹⁶Ko wot ê gangas mwa cɔ́gɔt de hwó simo yi e Lɛbanɔn, na wot a vey á hwo na yɛ. Wot a ga manas yɛ e ra nshi tǎlu e gworep vey e Yɔpa, ko a rɔda sè bak o mwo na hwo hashe yɛ vey e Yɛrusalɛm.”

¹⁷A vane ano, Sɔlɔmɔn a basa nepyak bekɛnɛt de ba sé sangal e vwêl Israyɛl, e bamâ basâ bemat de da mɛ Davit á kana ra, ko nepyak bemat o ná sè gu naga kuru batungun na vɛ batat, na naga betyiimin (153,600).

¹⁸A tɛ̀ bemat gu kuru bataama (70,000) e ji mɛn be sè vê hashê pyɛ́, gu kuru rwit (80,000) be dak beta e berahwol, ko bemat gu batat na naga betyiimin (3,600) be sè vê bɛrɛng fwom na be tɛ̀ bemat o be ra fwom o naka.