Read berom 2 Neha-Raane 20 Bible Online

2 Neha-Raane 20 - berom bible

2 Neha-Raane 20

¹E bamâ jeng, BeMowap, na BeAmɔn tanga BeMewun behak ba vey hwo Yɛhɔshafat na como.

²Betom behak ba tele vey ha a yɛ wɔgɔ, “Gbɔng regyɛng bemât como ra sé kyè vey hwo e ra hwo yi e Ɛdɔm, yi e gurâ gworep, yɛn a ga vey wul Hazazɔn-Tamar, kɛ Ɛn-Gɛdi.”

³Yɛhɔshafat a tɛ̀ bengyip, ko a tɛ̀ to me e de jamâ Dagwi Darwey. A nɔng nu bemat be wusal hal e mwa vwel Yuda.

⁴Ano BeYuda mwa yi e kahɛ pomo ba vey e Yɛrusalɛm na be jama sɛlɛ yi na Dagwi Darwey.

⁵Yɛhɔshafat a tumal e nuyêl regyɛng BeYuda mwa na bemât Yɛrusalɛm e lalâ Gbɔng Duk Re Fongol pwas de ba ga yong.

⁶A hwo ra won a ye, “À Dagwi Darwey, Dagwî bedabeda mot. Hwà sé Dagwi e lagwi ko hwó re negwɔm e ra mwa yére bemat jey wɛt a? Hwà vɔk reto na nerey sizɔng, ko vit à mwat de ê tɔk ra retek na hwo.

⁷Áaa à Dagwi mot, hwà ro bemat de ba kana sé e vwel hemo e nuyel bemat mo BeIsrayɛl, ko hwà nɔ̂ng yére sa mo Abraham hɛ na he sè benap mɛn gbak-gbak wɛt a?

⁸Yɛn a sé sangal e ji hɛ, ko yɛn a ga lɔk a hwo Gbɔng Duk Re Fongol yaga reza mo, be tē,

⁹‘Ka sede rezot rehak ra hwo e ra wot, kɛ wâl como, kɛ tɛmɛ-nshi, kɛ tumbang, kɛ vyong ya hwo ot, ko wot a tumal e nuyêl Gbɔng Duk womo e nuyel mo — yaga reza mo ra sé e Gbɔng Duk womo, ko wot a tosho a hwo e ra rezot mot, ko hwô wet betong na hwo sey ot.’

¹⁰“Di a remo, BeAmɔn, na BeMowap tanga vê Raku Seyir de hwà simo BeIsrayɛl be hwo ɛn jeng de yɛn á nusu yi e sevwêl Misra wɛt, ko yɛn á tik ɛn jaram, yɛn á wey na yɛn wɛt.

¹¹Di pyɛ de yɛn a sé tala hot mɛ, yɛn a sé vey na be paa ot yi e vwel de hwà ga kana nɔng ot na he sè benap mot.

¹²Áaa à Dagwi mot, hwô yɛrɛ shɔt e ra yɛn wɛt a? Wot a ga tɛ́ ot gbɛrɛk e nuyêl gbɔng regyɛng mɛn de be kyè wɔ̀ hwo e ra wot. A remo de wot a tɔk pyɛ de wot ê ra wɛt, wot a sé shusha bayis mot e ra hwo.”

¹³Mwa BeYuda, na belɔ mɛn, na beha mɛn tanga nèy mɛn ba sé tumal e nuyêl Dagwi Darwey.

¹⁴Ko gabik Dagwi Darwey ha sɛ̀ reto e ra Yahaziyɛl Zɛkarya Bɛnaya Yɛyiyɛl Mataniya wo Levi wo nèy Asaf e tê gbɔng tula mo.

¹⁵Yahaziyɛl o a hwo moklo, a ye, “Wet in betong, à mwa yin BeYuda, na yin vê sangal e Yɛrusalɛm tanga hwo Gbɔng Gwɔ̀m Yɛhɔshafat. Dagwi Darwey a yang in ngan: ‘Yin wok bengyip, kɛ a sè a yin yɔɔm na cêng bemat vemo wɛt, yaga como mo ya sé myin wɛt, ko e ye Dagwi.’

¹⁶Nahwol kyè in wɔ̀ sɛ̀ ɛn, yɛn ê tut yi e nɛk rahwôl Zis, yin ê sɛ̀ ɛn e yɛnɛ̂ nɛk de wó bɛrɛng rwa hey bagat na Yɛruwɛl.

¹⁷E yin de yin ê tó como mo wɛt. Sɛ̀ in kwɔn de yin ê tumal ɛ, tumal hin tiing, na yin a di de Dagwi Darwey ê nɔng in wɛng. À yin BeYuda na bemât Yɛrusalɛm! Yin wok bengyip wɛt, a sè a yin yɔɔm wɛt. Wɔ̀ sɛ̀ in hɛn nahwol, ko Dagwi Darwey ê sè na yin!”

¹⁸Ano kwong Yɛhɔshafat a ye ngyuk, a gaba gup, ko mwa BeYuda na bemât Yɛrusalɛm ba gaba gup arɔng e nuyêl Dagwi Darwey, ba re a yɛ fongol.

¹⁹E jeng o BeLevi vê ruhûp Kohat na Kora ba tumal cik ko ba somo Dagwi Darwey, Dagwî Israyɛl na gbɔng fwɔ.

²⁰Bop nagasi tuk het, bemat o ba kyè vɔk e hêy Tekowa. Jeng de yɛn a sé sogo kwɛngɛl o, Yɛhɔshafat a tumal ko a ye, “Wet in betong na me, à yin BeYuda na bemât Yɛrusalɛm! Tɛ̀ in gap min e ra Dagwi Darwey, Dagwi min, ko yin ê tumal tiing. Sey in tsak o na bezarap mɛ ko yin ê di wɛng.”

²¹E bama de gbɔng gwɔ̀m a vo redu na bemat o, a tɛ̀ bemât lwɛlɛ de bê somo Dagwi Darwey, ko yɛn a kyè na yɔ̀m fwom mɛn e nuyêl bemât como, ba ra lwɛlɛ gwomo: Somo hin Dagwi Darwey! E tɛ̀ yey na bemat mɛ nesheneshey!

²²Ras de yɛn a hwo ra lwɛlɛ̂ somo mo, Dagwi Darwey a hwo e ra bemât comô BeAmɔr, na BeMowap tanga bemât Raku Seyir yi e kawɛ bak, yɛn vemo de ba ga kana yong ɛn na be hwo e ra BeYuda. Ko e yɛnɛ mɛn à hane,

²³yaga BeAmɔn na BeMowap ba doyo e ra bemât Raku Seyir, ko ba wey na yɛn hywiri. Jeng de yɛn a yɛnɛ wey na bemât Raku Seyir, ko yɛn a hwo mɔbɔs bemɛn.

²⁴Jeng de BeYuda ba wul tyɔ̌n hey o, yɛn a bɛrɛng wɔ̀ sɛ̀ gbɔng regyɛng o, ko yɛn a di bavin tɔɔɔl e vwel, vit à hwak de a hywit ɛ.

²⁵Sede pyɛ̂ jugu mɛn, yɛn a sɛ̀ berɔndɔng tyɔng wɛt, na nedok nekyɔrɔk, na berugu, na nezap pyɛ́ ryat, de yɛn a hashe a bato mɛn, sɛ̌ yɛn a tɔk to gwɛ wɛt. Yɛn a ra pɔlɔ tat e de hashê pyɛ́ mo, yaga nehyɔ̂t yɛ.

²⁶E tuk hê naas, yɛn a tula hɛn e Nɛk Beraka, yaga e hwomo de yɛn a somo Dagwi Darwey. Yi ano, yɛn a tâng kwɔn o à Nɛk Beraka vey e yunung.

²⁷E bama mo, mwa BeYuda na bemât Yɛrusalɛm tanga Yɛhɔshafat e nuyel mɛn ba to ɛn vey e Yɛrusalɛm na râ pee, yaga Dagwi Darwey a ga tɛ̀ ɛn be di wɛng e ra vê repugu mɛn.

²⁸Jeng de yɛn a pom e Yɛrusalɛm, yɛn a kwey cik vɔk e Gbɔng Duk Re Fongol na lwɛlɛ de be ra na yōm tanga bezing.

²⁹Bengyip Dagwi ba hwo e ra mwa segwɔm bapomo ras de yɛn a wok de Dagwi Darwey a ra como na vê repugû BeIsrayɛl.

³⁰Yi ano, segwɔm Yɛhɔshafat sa sangal tyang, yaga Dagwi a nɔng ɛ yêy dyɛngɛ e kawɛ bak.

³¹Ano, Yɛhɔshafat a re negwɔm e ra Yuda. Á vɔk neshey kuru batat na nɛ netungun (35) jeng de á sè re negwɔm. Á re negwɔm o yi e Yɛrusalɛm neshey kuru baba na nɛ netungun (25). Neng-gwɔ mɛ à Azuba hwông Shilhi.

³²A ra pyɛ́ de ya jam a Dagwi Darwey, sede remo de da mɛ Asa a kana ra.

³³Ko a de gangas nekwɔn sekwit ne berahwol wɛt. Bemat o ba ga doyo vɔk na Dagwî bedabeda mɛn na neyey mɛn.

³⁴Bwang pyɛ́ mwa de Yɛhɔshafat a ra yi e mɛsɛng o vɔk e yɛnɛ mo ya sé e bwok-basâ neha raane de Yehu Hanani a jɛk ko ya sé e Bwok-basâ Pyɛ̂ Bare yê Begwɔ̀m Israyɛl.

³⁵E jeng cak Gbɔng Gwɔ̀m Yɛhɔshafat a wuna hɛ na Gbɔng Gwɔ̀m Ahaziya wo Israyɛl de á ra pyɛ́ vyes ding-ding.

³⁶Yɛn a wuna hɛn, ba lɔk bedwa-nshi e Ɛziyɔn-Gɛbɛr na be kyese e Tarshish.

³⁷Ko Ɛliyɛzɛr Dodavahu yi e repomô Maresha a yi na ha e ra Yɛhɔshafat, a ye, “A remo de hwà wuna hwo na Ahaziya, Dagwi Darwey ê wey na pyɛ́ de yin a yong.” Ko bedwa-nshi mó ba vɔk ba lashe hɛn, ba tɔk wɔ e Tarshish wɛt.