Read berom 2 Neha-Raane 21 Bible Online

2 Neha-Raane 21 - berom bible

2 Neha-Raane 21

¹Yɛhɔshafat a ku, ko ba lɛrɛ hɛ na bedabeda mɛ e gbɔng repomô Davit, hwey mɛ Yɛhɔram ha re negwɔm e to mɛ.

²Yɛhɔram Yɛhɔshafat wo Yuda a vɔk begwa beras betyiimin, yɛn à, Azarya, na Yɛhiyɛl, na Zɛkarya, na Azarya, na Mikayɛl tanga Shefatiya.

³Da mɛn a gas a yɛn dyam pyɛng na dyam shinang pyak, mwa na nedirî pyɛ́ ryat, ko a nɔ̂ng kawɛ e ji mɛn reto e ra hak e ji bapomô Yuda de ba gwɔrɔ vɛ na jwa.

⁴Jeng de Yɛhɔram a ga sè reto naka e yɛnɛ̂ negwɔm da mɛ, a hwo tɛ̀ be mɔbɔs begwa mɛ mo mwa, tanga behak e ji bemât nuyêl Israyɛl.

⁵Yɛhɔram á vɔk neshey kuru batat na nɛ neba (32) jeng de a hwo re negwɔm, ko a re nɛ yi e Yɛrusalɛm neshey rwit.

⁶A raa begwong bevês begwɔ̀m Israyɛl, sede remo de belɔ Ahap bá ra, yaga a ra wenêng hwông Ahap o hwak. A ra pyɛ́ de ya sé vyes e bayîs Dagwi Darwey.

⁷Ko mwa ano, Dagwi Darwey a wey na lɔ Davit wɛt yaga a ga kana wuna hɛ na sira na yɛ wɔgɔ, yére mɛ ya rɔda re negwɔm Yuda jojot.

⁸E jeng negwɔm Yɛhɔram, BeƐdɔm ba kyɛ́ ɛn nà raa Yuda, yɛn a sangal sangâl tó mɛn.

⁹Ano Yɛhɔram na bemât nuyêl como mɛ ba sogo na bekyɛkyɛ̂ bedwa tanga bemât nuyêl como ba ye dɔ e Zayir. E hwomo de bemât comô Ɛdɔm ba rɔnɔ hɛ́ tanga bemât nuyêl como mɛ. E ji turuk, yɛ tanga besugâ como mɛ ba vugu gwong, ba pere wɔ̀ dalas.

¹⁰BeƐdɔm ba re negwɔm to mɛn yi e jeng yane vey e remo. E jeng yane, bemât repomô Libna ba kyɛ́ ɛn nà raa Yuda, yaga Yɛhɔram a ga kyini Dagwi Darwey, Dagwî bedabeda mɛ.

¹¹Ano arɔng, a wɔ̀ lɔk nekwɔn re a cī fongol e berakû Yuda, yi ano, a tɛ̀ BeYuda na bemât Yɛrusalɛm ba kyɛ́ ɛn nà raa Dagwi Darwey.

¹²A vane ano, Eliya, zarap Dagwi a tomo a Yɛhɔram bwok-rwang, a ye, “Dagwi Darwey, Dagwî da mo Davit a ye: A remo de hwà ga raa begwông da mo Yɛhɔshafat kɛ vê Gbɔng Gwɔ̀m Asa vê Yuda wɛt,

¹³ko hwà ga raa vê begwɔ̀m Israyɛl e negya, yi ano, hwà ga tɛ̀ BeYuda na bemât sangal e Yɛrusalɛm be tik nà raa gwông tsak o, sede remo de belɔ Ahap ba tɛ̀ BeIsrayɛl ba tik nà raa gwông tsak o. Hwà ga to mɔbɔs begwa mo beras, bemât lɔ mo de ba dal o na nerat.

¹⁴Di, Dagwi Darwey ê vey na gbɔng tumbang e ra bemat mo, na nèy mo, na beha mo, tanga e ra mwa pyɛ́ mo.

¹⁵Ko hwo pyɛ mo hwô di rezot na rɔ̂ jîm royo de yê gwɛsɛ nepep kahɛ tuk, sɛ̌ lāgey mo ha nunus e jey na serɔ mo.”

¹⁶Ano kwong, Dagwi Darwey a tɛ̀ repugû BeFilisti na BeArap de ba sé bagat na kwɔn de BeEtiyopya bá kana sangal ɛ, he hwo e ra Yɛhɔram.

¹⁷Yɛn a vey hwo e ra Yuda na como, ko ba hashe mwa pyɛ́ de ba sɛ e lɔ gwɔ̀m, mwa na nèy mɛ beras o, na beha mɛ, ba tik a yɛ rwas o hwak wɛt sɛ̌ Yɛhɔwahas tashal mɛ.

¹⁸E bamâ pyɛ́ yane mwa, Dagwi Darwey a tɛ̀ rɔ̂ jîm royo ves he kaba hɛ.

¹⁹A ra shey ba a sè ririm na yɛ, ko nepep o nà gwɛsɛ hɛn zɔng, a pere wɔ̀ ku na rezot o. Bemat mɛ ba man kya rey o na be nɔng ɛ mɛ nerey wɛt, sede remo de bá ragas a beda mɛ.

²⁰Yɛhɔram á re negwɔm yɛ na neshey kuru batat na nɛ neba, ko a re negwɔm yi e Yɛrusalɛm neshey rwit. Mwat hwak a ka lashe yey e reku mɛ wɛt. Ba lɛrɛ hɛ e gbɔng repomô Davit, ko e besak begwɔ̀m wɛt.