Read berom 2 Neha-Raane 22 Bible Online

2 Neha-Raane 22 - berom bible

2 Neha-Raane 22

¹Bemât Yɛrusalɛm ba tɛ̀ a tashâl Ahaziya negwɔm e tô da mɛ, a remo de bemât como de bá yi na BeArap e dúra como bá mɔbɔs mwa begwa mɛ bekinat. Ano Ahaziya Yɛhɔram a re negwɔm Yuda.

²Ahaziya á vɔk neshey kuru baba na nɛ neba jeng de á hwo re negwɔm, ko a re negwɔm o yi e Yɛrusalɛm shey hining zɔng. Neng mɛ à Ataliya, gwâl Ɔmri wo Israyɛl.

³Yɛ arɔng a raa begwông belɔ Ahap, yaga neng mɛ á vos a yɛ badu ragas neves.

⁴A ra pyɛ́ de ya jam a Dagwi Darwey wɛt sede remo de belɔ Ahap bá ra, yaga e bamâ rekû da mɛ, e yɛn vɛ de bá vos a yɛ badu de bá pere wɔ̀ wey na yɛ.

⁵Gbɔng Gwɔ̀m Ahaziya a wuna hɛ na Yɔram, gbɔng gwɔ̀m Israyɛl na be wɔ̂ como na Gbɔng Gwɔ̀m Hazayɛl wo Sirya. Bemât como mo bá man gèy e Ramɔt e Gileyat, ko bá mǎ Yɔram e de como mo.

⁶A toyo vey e repomô Yɛzrɛɛl, na a wɔ̀ pege baram mɛ mo e hwomo, ko Ahaziya a wɔ̀ di ɛ, yaga e ro ɛ.

⁷Dagwi a yong ɛ̀ na Ahaziya a wey yi e de dî Yɔram. Yaga jeng de a wul hwomo, a nusu na Yɔram na be wɔ̀ man na Yehu Nimshi, de Dagwi a ga kana tɛ̀ ɛ na a wey na belɔ Ahap.

⁸Jeng de Yehu á sè wey na belɔ Ahap, ko á wɔ̀ man na bemât fwôm Yuda tanga nèy begwa Ahaziya mo de nà vey tanga yɛ, ko á mɔbɔs hɛn mwa hywiri.

⁹Ba kyě jama Ahaziya, ko ba de wɔ̀ vo ɛ de a ga lɛrɛ hɛ e repomô Samariya. Ba wɔ́ na yɛ na Yehu, ko ba mɔrɔ hɛ arɔng. Ba lɛrɛ revin mɛ, yaga ba ye, “Da mɛ kunat à Yɛhɔshafat de á ra a Dagwi Darwey fwom na yey mɛ mwa.” Yaga ano, vit à mwât lɔ Ahaziya de a pɔl de ê tɔk re negwɔm o.

¹⁰Jeng de Ataliya, neng Ahaziya, a wok ba ga mɔrɔ sɔ mɛ, a vɛ̌ nɔng nu be mɔbɔs belɔ gwɔ̀m Yuda mwa.

¹¹Ko Yɛhɔshɛba, gwà Ahaziya mo, yɛ hwông Gbɔng Gwɔ̀m Yɔram, a wɔ̀ jut kekwey kwɔ̌ Ahaziya mo de ba tâng kɛ à Yɔwash. A wulu hɛ mɛ, a wɔ̀ lɛrɛ kɛ tanga lwêk kɛ e keduk kehak e Gbɔng Duk Re Fongol. Yi ano, Yɛhɔshɛba, hwông Gbɔng Gwɔ̀m Yɔram de a sé hwâ Yɛhɔyada, piris — yɛ hwā mo a sé gwa Ahaziya — a lɛrɛ hwey o yi na Ataliya, ko ba tɔk mɔrɔ hɛ wɛt.

¹²A nàra e hwomo e lɛrɛ na yɛn e Gbɔng Duk Dagwi o neshey netyiimin jeng de Ataliya a sè re negwɔm vwel o.