Read berom 2 Neha-Raane 23 Bible Online

2 Neha-Raane 23 - berom bible

2 Neha-Raane 23

¹E shey hê netaama, Yɛhɔyada a di a sé naka na a ra pyɛ cak. A wuna hɛ na bemât nuyêl como betungun, yɛn à Azarya Yɛrɔham, na Ishmayɛl Yɛhɔhanan, na Azarya Ɔbɛt, na Maaseya Adaya tanga Ɛlishafat Zikri.

²Yɛn a kyě kyè e mwa bapomô Yuda, be tula BeLevi yi e mwa bapomo mo, na bedâ ruhûp BeIsrayɛl vey e Yɛrusalɛm.

³Yɛn a tula hɛn mwa e Gbɔng Duk Re Fongol, ko yɛn a wuna hɛn na sira na Yɔwash hwêy gwɔ̀m. Yɛhɔyada a yang ɛn, “Hwêy gwɔ̀m a hemo! Tik na he re negwɔm, sede remo de Dagwi Darwey à vo nu e ra nèy Davit.

⁴Pyɛ de yin ê ra a yet ngan: Sede yin, bepiris na BeLevi, yin a ba vêy fwom Tuk Shábat, gas in bagyɛng batat, regyɛng rining rê bɛrɛng ruhup,

⁵rê neba rê bɛrɛng lɔ gwɔ̀m, ko rê netat rê bɛrɛng bak Ruhup Jɔt Nshi, ko bwang bemat o mwa bê ba tula hɛn e nelalâ Gbɔng Duk Re Fongôl Dagwi Darwey.

⁶Bê tik mwat hwak a yel e beduk Gbɔng Duk o wɛt sɛ̌ tɔ bepiris tanga BeLevi de ba vɔk fwom tuk o. Yɛn ê tɔk yel a remo de ba ga kana tik ɛn jaram yaga fwôm Dagwi. Ko a sé gbing-gbing na bwang bemat o mwa be gyeng pyɛ de Dagwi Darwey a ga kana misang.

⁷BeLevi bê gwɔrɔ gwɔ̀m o, na celes bewal mɛn e vɔ. Kawɛ mwat de a vey bagat na yɛn ko be mɔrɔ hɛ. Yɛn ê kyě kyɔkɔs gwɔ̀m o e kahɛ kwɔn de ê kyè vɔk ɛ.”

⁸BeLevi na mwa BeYuda ba raa pyɛ de Yɛhɔyada a nɔng ɛn nu, ko kawɛ a vey na bemât fwom mɛ — vemo de be vêy fwom Tuk Shábat na vemo de be yɛnɛ mwɛn Tuk Shábat o arɔng, yaga Yɛhɔyada piris e tik regyɛng o rehak sana fwom wɛt.

⁹Yɛhɔyada a nɔ̂ng bemât nuyêl como bebara, na beruga berey o na besɛl o de bá kana sè vê Gbɔng Gwɔ̀m Davit, vemo de bá tik e Gbɔng Duk o.

¹⁰A tɛ̀ bemat o be tumal na celes bewal mɛn e vɔ na be gyeng mɛ gwɔ̀m o, yi e bak rwa batîn Gbɔng Duk o vɔk e bak rwa bato mo, ba gwɔrɔ mɛ gàgbang rangâs yas, na lɔ mo mwa burang.

¹¹Ano Yɛhɔyada a nusu na Yɔwash e majey. A tɛ̀ a yɛ kpîn negwɔm e rato, a to nɔng ɛ bwok-rwang badu negwɔm e vwɔ mɛ. Ano kwong ba shushu Yɔwash na něy, na a tɛ́ ɛ gbɔng gwɔ̀m, ko ba moklo ba ye, “A ga tɛ́ ɛ gbɔng gwɔ̀m!” Bemat mwa ba tē, “Neken gbɔng gwɔ̀m ne ros!”

¹²Ras de Ataliya, gbɔng gwɔ̀m hwā a wok lwɛ́lɛ bemat de be kyě tele, be somo gbɔng gwɔ̀m, a vɛ̌ kyè vɔk e Gbɔng Duk Re Fongôl Dagwi Darwey na bemat o.

¹³Jeng de a ye ganga, ko a di gbɔng gwɔ̀m e tumal bagat na swesêk duk e rwi Gbɔng Duk o, tyɛng na negwɔn de begwɔ̀m be raa. Bemât nuyêl bemât gyeng tanga bemât pɛsɛ̂l bezing, mwa bemât vwel o ba sé mok yaga yey pyɛng, ba sé ra lwɛ̄lɛ, be pɛsɛl bezing. Ataliya a vɛ̌ hama gworugu mɛ yaga lashê yey, a mok, a tē, “Sógo nehywɛ! Sógo nehywɛ!”

¹⁴Yɛhɔyada a simo be mɔrɔ Ataliya e majêy Gbɔng Duk o wɛt. Yaga ano a nɔ̂ng bemât nuyel como nu, be jut ɛ yi e tê bemât gyeng o, ko kawɛ mwat de a simo a sey ɛ́, yɛn a mɔrɔ hɛ. Piris o a ye, “Yin mɔrɔ hɛ e Gbɔng Duk Re Fongôl Dagwi Darwey wɛt.”

¹⁵Ano yɛn a vo ɛ, ba kyè na yɛ vɔk e bak Ruhup Bedwa gwô lɔ gwɔ̀m, ko ba mɔrɔ hɛ e hwomo.

¹⁶Yɛhɔyada a tɛ̀ Gbɔng Gwɔ̀m Yɔwash tanga bemat be wuna hɛn na sira na Dagwi Darwey, yɛn a rɔda sangal vê Dagwi Darwey e ngamo nuyel.

¹⁷E bama mo yɛn mwa ba wɔ́ e gbɔng duk rê fongôl Baal ko yɛn a bugut wɛ hywiri. Yɛn a gangas nekwɔn rangâs yas Baal mwa na pyɛ̂ sekwit mɛ, ko yɛn a mɔrɔ Matan, piris Baal e nuyêl nekwɔn rangâs yas.

¹⁸Yɛhɔyada a tik tom Gbɔng Duk Re Fongôl Dagwi Darwey e vɔ bepiris tanga BeLevi, yɛn vemo de Davit a kana nɔng ɛn reto e ra tom o, na yɛn a kyě rangas nenɔrɔ detidetu vɔk na Dagwi tyɛng na pyɛ de bá jɛk e ji Badu de Mose á nɔng ɛn. Yɛn a to vɔk reto e ra râ lɛlɛ na nzem yey pyɛng detidetu de Davit a nɔng nu be ragas.

¹⁹Ano arɔng, Yɛhɔyada a tɛ̀ bemât gyeng rùhup Gbɔng Duk Dagwi Darwey, be dul kawiwɛ yerê mwat de a sé ligis sana yel yaga râ kayiyɛ yerê pyɛ.

²⁰Yɛhɔyada, na bemât nuyêl como, na bemakûk BeIsrayɛl, na bemât nuyêl fwôm negwɔm, na mwa bemât vwel o na yɛn a tá gwarwang wɔ̀ kyɔk gbɔng gwɔ̀m o yi e Gbɔng Duk Re Fongol vɔk e lɔ gwɔ̀m. Yɛn a yel e lɔ gwɔ̀m o e rwi bemât gyeng, ko gbɔng gwɔ̀m o a wɔ̀ sangal e ra gwofwa negwɔm.

²¹Mwa bemât vwel o ba vɔk yey pyɛng. Ko gbɔng repomo mo ra tɛ́ ɛ yaang, e bama de ba ga mɔrɔ Ataliya.