Read berom 2 Neha-Raane 24 Bible Online

2 Neha-Raane 24 - berom bible

2 Neha-Raane 24

¹Yɔwash á vɔk neshey netaama jeng de á re negwɔm Yuda, ko á re negwɔm e Yɛrusalɛm neshey kuru banaas. Rezâ neng me à Zibiya yi e repomô Bɛɛr-Sheba.

²A ra pyɛ́ de ya jam a Dagwi Darwey mwa jeng de Yɛhɔyada piris á sè na neken.

³Yɛhɔyada á vo a yɛ beha beba, ko yɛn a tɔs a yɛ nèy bewen na behwong.

⁴Bama de a ga tɛ̀ jeng e de rê negwɔm, Yɔwash a hwo tɛ̀ e yey mɛ na a yong Gbɔng Duk Re Fongôl Dagwi Darwey.

⁵A yila bepiris na BeLevi, ko a yang ɛn, “Ci in e bapomô Yuda na yin wɔ̀ tula dyām de yê vey fwom yông Gbɔng Duk o gwô kahɛ shey yi na BeIsrayɛl. Ra in fwom o dey-dey.” Ko BeLevi mo ba ra fwom o ziri wɛt.

⁶Ano, gbɔng gwɔ̀m a yila Yɛhɔyada, mwât nuyel mɛn, a rangal hɛ, a ye, “Yaga sɛ́ de hwà ga shonong BeLevi be vey na dyām o ziri yi na BeYuda tanga bemât Yɛrusalɛm wɛt ɛ?” Dyām o yɛ à yemo de Mose, mwât fwôm Dagwi Darwey á tɛ̀sɛ bemat be talsa yaga râ fwôm bûk wuna-na-sirâ Dagwi.

⁷Yaga Ataliya, hwā vwes wane, na bemat mɛ, ba ga kana wɔ̀ lashe Gbɔng Duk Dagwi o. Yɛn a hashe pyɛ̂ fwom de ba ga kana tik jaram yaga Dagwi Darwey ko yɛn a wɔ̀ re a Baal fongol na yɛ.

⁸Ano, gbɔng gwɔ̀m a nɔng nu, ba yong kundung, ba tik gwɛ e ruhûp Gbɔng Duk Dagwi Darwey.

⁹Ko a tɛ̀ be mok e yɛnɛ Yuda na Yɛrusalɛm na kawɛ mwat a vey nɔng yaga fwôm Dagwi Darwey, dyām de Mose, mwât fwôm mɛ á tɛ̀ BeIsrayɛl be talsa e hey.

¹⁰Mwa bemât nuyel na mwa bemat ba vɔk yey pyɛng, ba vey na dyām o ko ba tɛ̀sɛ yɛ e ji kundung o ko ya sila gwɛ.

¹¹Kayɛ jeng de BeLevi ba vey na kundung o na bemât fwôm gwɔ̀m, sede yɛn a di dyām ya sé pyak e ji gwɛ, ko mwat-jɛk gwɔ̀m tanga mwât fwôm gbɔng piris be vey paa pyɛ de ya sé e kundung o, ko be toyo na gwɛ e kwɔn o. Yɛn a ragas ano kahɛ tuk, ko yɛn a tula dyām sizɔng.

¹²Gbɔng gwɔ̀m tanga Yɛhɔyada be nɔngɔ̂s bemât bɛrɛng fwôm yông Gbɔng Duk Dagwi Darwey dyām o, ko yɛn a hashe bemât lɔk, na vê tsêp cɔ́gɔt, tanga vê yông nezap pyɛ̂ dyam, na dyam pama, yaga na yɛn a to yong mɛ nedem tanga pyɛ de ya lashe hɛ:

¹³Ano bemat de ba hashe mo ba tē ngyɛ́k e de tom o, ko fwom o gwa re nuyel naka e vɔ mɛn, ko yɛn a to toyo na nerât Gbɔng Duk Re Fongôl Dagwi o, yɛn a gwɛ a wɛ gap arɔng.

¹⁴Jeng de yɛn a yɛnɛ, yɛn a toyo a gbɔng gwɔ̀m tanga Yɛhɔyada bwang dyām o, ko yɛn a yong mɛ̀ bèkɛt na neshǐ fwom tanga pyɛ̂ nása nenɔrɔ̂ rangas, na bwang pyɛ̂ fwom yê dyam shinang na dyam pyɛng. Ba dopse nása nenɔrɔ̂ rangas e Gbɔng Duk Dagwi Darwey kayɛ jeng e mwa jeng de Yɛhɔyada á sè kwen.

¹⁵Ko Yɛhɔyada a gwɛ̌ kwop, nepɔlɔ mɛ na ga tɛ́ ɛn tyɔng wɛt, a ku yɛ na neshey naga na kuru batat (130).

¹⁶Ba lɛrɛ hɛ e besak begwɔ̀m e gbɔng repomô Davit, yaga fwom rwat de a ga ra a BeIsrayɛl, na a Dagwi, tanga yaga Gbɔng Duk Re Fongôl Dagwi.

¹⁷E bama de Yɛhɔyada a ku, bemât nuyêl Yuda ba vey yâng gbɔng gwɔ̀m show, ko a wet betong na vô du mɛn.

¹⁸Yɛn a kyini Gbɔng Duk Re Fongôl Dagwi Darwey, Dagwî bedabeda mɛn, ko yɛn a re a Ashera, ci hwā mo, tanga pyɛ̂ sekwit fongol. Ko shôm Dagwi ya hwo e ra BeYuda na bemât Yɛrusalɛm yaga neves nane.

¹⁹Mwa ano, a tomo bezarap mɛ e tē mɛn na be toyo na yɛn vey na Dagwi Darwey, yɛn a nɔng nuha e ra yɛn, ko yɛn a wet betong wɛt.

²⁰Ano gabîk Dagwi ha sɛ̀ reto e ra Zɛkarya hwêy Yɛhɔyada, piris, a tumal e ra garang, ko a yang ɛn, “Dagwi a ye ngan: Yaga sɛ́ de yin a kwɔrɔ badu Dagwi Darwey, de yin ê tɔk di wɛng wɛt ɛ? Yaga yin a ga ye waa a Dagwi Darwey, ano arɔng yɛ a ga ye waa à hin.”

²¹Ko yɛn a wuna nu e ra yɛ, ko yi na nû gbɔng gwɔ̀m, yɛn a tó ɛ́ na beta pere wɔ ku e majêy Gbɔng Duk Re Fongol.

²²Gbɔng Gwɔ̀m Yɔwash a bare na nerat de Yɛhɔyada, dâ Zɛkarya a kana ra a yɛ wɛt, ko a mɔrɔ sɔ mɛ. Jeng de a sé ku, ko a ye, “Tik na Dagwi Darwey a di na a tala pyɔ̌n o!”

²³E rwa yɛnɛ̂ shey, bemât comô Sirya ba hwo e ra Yɔwash. Yɛn a wul Yuda na Yɛrusalɛm, ko yɛn a wey na mwa bemât nuyel fwom sevwel o, yɛn a hashe pyɛ̂ jugu zá wɛt, ko ba wɔ̀ nɔ̂ng gbɔng gwɔ̀m mɛn e Damaskus.

²⁴Mwa ano de BeSirya bá vey na bemât como tyɔng zɔng, ko Dagwi Darwey a nɔng ɛn gbɔng regyɛng como tyɔng wɛt e vɔ mɛn, yaga yɛn a ga kyini Dagwi Darwey, Dagwî bedabeda mɛn. Ano de yɛn a ra a Yɔwash shɔt.

²⁵Ba mǎ Yɔwash ding-ding e de como mo. Jeng de bemât repugu mɛn o ba hala hɛn, ko bemât nuyêl fwom behak ba yong ɛ̀ yaang, ba wɔ̀ mɔrɔ hɛ e ra gwat mɛ na be tala mɛ pyɔ̌n hwêy Yɛhɔyada piris de gbɔng gwɔ̀m o a kana tɛ̀ be mɔrɔ hɛ. Ano de a ku, ko ba lɛrɛ hɛ e gbɔng repomô Davit, ko ba lɛrɛ hɛ e besak begwɔ̀m wɛt.

²⁶Vemo de ba yong a yɛ neves à Zabat Shimeyat WoAmɔn na Yɛhɔzabat Shimrit WoMowap.

²⁷E ra reha nèy mɛ bewen o, na neha siitit de ba jɛk e ra yɛ, tanga e ra yông Gbɔng Duk Re Fongôl Dagwi, ba jɛk pyɛ́ mo mwa e bwok-basâ misâng neha begwɔ̀m. Sɔ mɛ Amaziya a re negwɔm e to mɛ.