Read berom 2 Neha-Raane 25 Bible Online

2 Neha-Raane 25 - berom bible

2 Neha-Raane 25

¹Amaziya á vɔk neshey kuru baba na nɛ netungun (25) jeng de á re negwɔm. A re negwɔm neshey kuru baba na nɛ shanetat (29) yi e Yɛrusalɛm. Rezâ neng mɛ à Yɛhɔyadan wo Yɛrusalɛm.

²Á ra pyɛ́ de ya pɛngɛ a Dagwi Darwey yey, mwa ano de a ra na yey rining wɛt.

³Jeng de negwɔm mɛ na ga tumal naka, a mɔbɔs bemât nuyêl fwom de ba kana mɔrɔ da mɛ.

⁴Ko a mɔbɔs nèy mɛn wɛt, tyɛng na pyɛ de ba jɛk e ji badu, e bwok-basâ Mose, e kwɔn de Dagwi a nɔng nu wɔgɔ, “Bê mɔbɔs beda yaga banɛ̂n nèy mɛn wɛt, ko bê mɔbɔs nèy yaga banɛ̂n beda mɛn wɛt. Bê mɔrɔ mwat yaga nɛn de yɛ pyɛ mɛ a ra.”

⁵Amaziya a yila yére Yuda na Bɛnyamin ko a gas ɛn e rùhup mɛn, a tɛ̀sɛ a yɛn bemât nuyêl como de ba vɔk reto e ra bagyɛng bemât comô gu gu ko behak e ra bagyɛng bemat naga naga. Nepyak bemât como mo na sé gu naga batat (300,000), ko neshey tɔ̂ kawɛ e ji mɛn na sé kuru baba vɔk e rak o. Yɛn a sé bemat de ba kasa hɛn, ba ga myak ɛn yaga tô como, ko yɛn a tɔk râ como na bebara na beruga.

⁶Ano arɔng, a wɔ̀ hwɔp bemât como gu kuru rining (100,000) yi e vwêl Israyɛl, e nû tɔ̂n benaas vê dyam pyɛng na a gwɛ̌ e ra bemɛ mo.

⁷Ko zarap Dagwi a wɔ̀ ha a gbɔng gwɔ̀m o, a yang ɛ, “À darwey, hwo kwon kyè na bemât comô BeIsrayɛl wɛt, yaga Dagwi Darwey a sé na Israyɛl kɛ na behak e ji BeƐfrayim wɛt!

⁸Yaga ka sede hwà ka tó como na gap e rɛ ayi, Dagwi ê tɛ̀ hwo di gawey e nuyêl vê repugu mo, yaga Dagwi a vɔk reto na a nɔng o wɛng kɛ gawey ayi.”

⁹Amaziya a yâng zarap o, “Ko sɛ̌ mê ra e rɛ̌ na kǔs dyam pyɛng de ma ga kana tala yaga yɛn ɛ?” Zarap o a toyo a yɛ, a ye, “Dagwi Darwey ê tɔk nɔng o pyɛ de ya dal yane mo!”

¹⁰Ano, Amaziya a tɛ̀ bemât como yi e Ɛfrayim o e gwong, a toyo na yɛn e lɔ. Neyey mɛn na beseng na BeYuda, ko yɛn a to ɛn wɛrɛn na lashê yey sizɔng.

¹¹Amaziya a tɛ̀ yey ting, a sey yêl bemât como mɛ vɔk e Nɛk Nevwashe. E hwomo yɛn a tó como na BeƐdɔm, ko yɛn a mɔbɔs bemat gu kuru rining (10,000),

¹²ko yɛn a vo behak gu kuru rining arɔng. Yɛn a wɔ̀ tut na yɛn e ra rakû repomô Sela ko yɛn a bomos hɛn yi e hwomo e ra beta e vwak, ko yɛn a weres hywiri.

¹³E jeng o, bemât comô Israyɛl de Amaziya a ro ɛn nà wɔ̂ como tanga yɛ, ba pere hwo e ra bapomô Yuda de ba sé e tê Samariya na Bet-Hɔrɔn. Yɛn a mɔbɔs bemat gu batat (3,000) ko yɛn a hashe pyɛ̂ jugu pyak.

¹⁴Jeng de Amaziya a toyo yi e de rê BeƐdɔm na como a vɔk ɛ pyɛ̂ sekwit mɛn vey pom, a yong kwɔn, a tik ɛ yɛ, a hwo re a yɛ fongol, a raa a rangas a yɛ pyɛ̂ nesang hyɔɔlɔl.

¹⁵Dagwi Darwey a vo shom na Amaziya, a tomo zarap mɛ, ko a yang ɛ, “Yaga sɛ́ de hwà hwo ré a bedagwi beduk fongol, yɛn de ba ka tɔk sey bemat mɛn yi na hwo wɛt ɛ?”

¹⁶Ko jeng de a sè rɔ̌ ha, ko gbɔng gwɔ̀m a yang ɛ, “Wot a ga tɛ̀ o hwo sè mwât vô redu gbɔng gwɔ̀m a? Ban yuu! Sede hwó simo neken mo!” Ano zarap o a sǎ yuu, bama de a ga kana yang ɛ, “A remo wɛ̀ de ma tɔk Dagwi a ga tɛ̀ e yey mɛ na a wey na hwo yaga pyɛ́ de hwà ga ra, hwà ga to kyɛ́ o nà wet betong na vô redu hom.”

¹⁷Tuhak, Amaziya a tomo betom vɔk na Yɛhɔwash, a ragas hɛ na be tó como.

¹⁸Ko Gbɔng Gwɔ̀m Yɛhɔwash a toyo a yɛ na gwɔrɔ-há, a ye, “Jeng cak, rezîk rɔgɔ de ra sé e ra berakû Lɛbanɔn ra tomo a retîn cɔgɔ̂t sida wɔgɔ, ‘Nɔ̂ng hwey hom hwóng mo na he ra weneng mɛ.’ Ko ngyama cak ya kwey, ya bɔrɔs rezîk rɔgɔ mo.

¹⁹Di, a remo, hwo Amaziya hwà ga re BeƐdɔm na como, ko hwà sé dak ragey. A sé naka na hwo feng na reza de hwà ga sɛ̀, ko sangal mɛ e lɔ kē. Yaga sɛ́ de hwà sé jama yol de yê vey na reyɔm e ra hwo tanga BeYuda ɛ?”

²⁰Ko Amaziya a kyɛ́ ɛ nà wok. Dagwi a yong ɛ̀ ano, na a nára hɛn e vɔ BeIsrayɛl yaga yɛn a jama ha yi na bedagwî Ɛdɔm.

²¹Ano kwong, Gbɔng Gwɔ̀m Yɛhɔwash wo Israyɛl a nusu tanga bemat mɛ, ba man gèy na yɛ e Bet-Shɛmɛsh e vwêl Yuda.

²²Bemât comô Israyɛl ba re vê Yuda e como mo, ko BeYuda mo ba tele vɔk e nelɔ mɛn.

²³Yɛhɔwash a vo Amaziya, gbɔng gwɔ̀m Yuda, hwêy Yɔwash Ahaziya e Bet-Shɛmɛsh, a tɛ̀ ɛ́ e ngyang. A to re vɔk e gbɔng repomô Yɛrusalɛm, a gangas jwâ-pomo mo yi e Ruhup Ɛfrayim vɔk e Ruhup Tô Kwɔng, neyikyik o na wul sede mita naga beba (200).

²⁴A hashe mwa dyam shinang na dyam pyɛng tanga pyɛ̂ fwom de a sɛ̀ e Gbɔng Duk Re Fongol tanga e begban lɔ gwɔ̀m. Ba kyè mɛ mwa vɔk e Samariya na besam de ba re e como.

²⁵Gbɔng Gwɔ̀m Amaziya Yɔwash wo Yuda a re nuyel na neken neshey kuru na nɛ netungun bamâ rekû Yɛhɔwash gbɔng gwɔ̀m Israyɛl.

²⁶Bwang pyɛ́ de Amaziya a ra, ba jɛk yɛ e Bwok-basâ Pyɛ̂ Bare yê Begwɔ̀m Yuda na Israyɛl.

²⁷Ba yong gwông nengyas na be mɔrɔ Amaziya, ko a tele wɔ e repomô Lakish. Ko bemât repugu mɛ ba tomo bemat mɛn na be raa hɛ vɔk e hwomo, ba wɔ̀ mɔrɔ hɛ.

²⁸Ba jut revin mɛ vey e Yɛrusalɛm e ra dwa, ba lɛrɛ rɛ e sak begwɔ̀m e gbɔng repomô Davit.