Read berom 2 Neha-Raane 26 Bible Online

2 Neha-Raane 26 - berom bible

2 Neha-Raane 26

¹BeYuda mwa ba tɛ̀ sɔ mɛ Uziya a tɛ́ ɛ gbɔng gwɔ̀m mɛn. E jeng o Uziya a vɔk neshey kuru na nɛ netyiimin zɔng.

²E yɛ de a to re repomô Elat, a to lɔk rɛ e bamâ rekû da mɛ.

³Uziya a re negwɔm yɛ na neshey kuru na nɛ netyiimin. A re negwɔm o yi e Yɛrusalɛm neshey kuru batungun na nɛ neba (52). Neng-gwɔ mɛ à Yɛkɔliya yi e Yɛrusalɛm.

⁴A ra pyɛ́ de ya jam a Dagwi Darwey, sede da mɛ Amaziya a kana ra.

⁵A tɛ̀ tó mɛ na a jama Dagwi e neshey de Zɛkarya mwat de á vos a yɛ badu e ra sâp Dagwi á sè kwen, ko kayɛ jeng de á vos badu na Dagwi Darwey e ra pyɛ de ê ra, ko Dagwi e nɔng ɛ wɛng.

⁶A vane ano, a hwo kyè wɔ̂ como na BeFilisti, ko a gangas bejwâ-pomô Gat, na Yabne tanga Ashdot, a lɔk bapomo e yɛnɛ̂ vwêl Ashdot tanga e bebak vwêl BeFilisti.

⁷Dagwi a sɛlɛ hɛ, ko a re BeFilisti na BeArap de ba sangal e Gur-Baal tanga BeMɛwun arɔng.

⁸Ano kwong, BeAmɔn ba talsa hɛ dyâm vwel, ko rehâ nerey mɛ na shara hɛn pere vɔk e yɛnɛ̂ vwêl Misra, yaga á vɔk reto na gap sizɔng.

⁹Uziya a lɔk tyɔ́n yê gap e Yɛrusalɛm — e Ruhup To-Kwɔng, na e Ruhup Nɛk tanga e kwɔn de jwâ-pomo wa ye ɛ rɛndɛng e to-kwɔng o.

¹⁰A lɔk tyɔ́n e bapomô hey arɔng, ko a cing hes tulâ nshi, yaga á vɔk gbɔng kara vyēl e tyɛ̄l tanga e ra garang. Ano arɔng, á vɔk bemât cap, na vê yong hirî anap e berahwol, na e nekwɔn de na siri naka, yaga á simo fwôm cap vit à yere mo.

¹¹Gbɔng Gwɔ̀m Uziya á vɔk bemât como sizɔng de bá sè e yong ɛn kayɛ jeng, á gas ɛn bagyɛng o bagyɛng o, tyɛng na nepyak mɛn de Yɛyɛl mwat-jɛk tanga Maaseya mwât nuyel mɛn ba yong, e nɛ̂n Hananiya hwak e ji begwɔ̀m como mɛ.

¹²Nepyak bemât nuyel nelɔ besuga ná sè gu baba na naga betyiimin (2,600).

¹³Ko yɛn á vɔk bemât como gu naga batat na vɛ bataama, na naga betungun (307,500) e nɛn mɛn. Bemât como mo bá sè e yong ɛn kayɛ jeng na be tó como tanga gbɔng gwɔ̀m e ra vê repugu mɛ.

¹⁴Uziya á nɔng ɛn mwa beruga, na bebara, na bebong dyam, na berugû como, na begbang tanga beta negazik.

¹⁵E Yɛrusalɛm, bemât sekwɛl mɛ bá turu a yɛ pyɛ́ cak de be bomos mɛ bègbɔng beta yi e tyɔ́n tanga yi e ra bato-kwɔng bejwâ-pomo. Rehâ nerey mɛ ra shara hɛ kagwa, ko á vɔk reto sizɔng yaga Dagwi á sɛlsɛ hɛ.

¹⁶Jeng de Uziya a gwɛ̌ gap na nerey, a hwo dak kaa, ko pyɛ mo ya vey a yɛ na gawey. A kyɛ́ ɛ nà raa hâ Dagwi Darwey, Dagwi mɛ, ko a wɔ̀ yel e Gbɔng Duk Re Fongol, na a nára nɔrɔ̂ pyɛ̂ nesang hyɔɔlɔl.

¹⁷Ko Azarya, piris, yɛ na bepiris kuru rwit (80) vê gap, na yey ting ba raa hɛ vɔk e ji mo,

¹⁸na be dul ɛ nà nára nɔrɔ mo. Yɛn a yang ɛ, “À Uziya, ba simo a hwo na hwo rangas a Dagwi Darwey pyɛ̂ nesang hyɔɔlɔl wɛt. A sé e bepiris yerê Aharon zɔng de ba tik ɛn jaram yaga râ fwom o. Nusu yi e Kwɔ̂n Jɛrɛ hemo. Hwà ga lashe a Dagwi Darwey yey. E ngamo nuyel hwà to vɔk nerat mɛ wɛt.”

¹⁹Uziya a sé tumal e hwomo e Gbɔng Duk o bagat na gàgbang rangâs pyɛ̂ nesang hyɔɔlɔl, a vɔk keshǐ rangas pyɛ̂ nesang hyɔɔlɔl e vɔ mɛ. A hwo vo shom na bepiris o, ko remo-remo rɔ ves hê rehwô rebek sede sekwa ha nusu e ratili mɛ.

²⁰Jeng de Azarya, darwey bepiris tanga bwang bepiris o ba sɛt bayis mɛn e ra yɛ, ko ba di rɔ e ratili mɛ mo. Yɛn a pat ɛ e majey dey-dey, ko yɛ arɔng a ra na a nusu ziri, yaga Dagwi Darwey a ga fala hɛ na serɔ.

²¹Gbɔng Gwɔ̀m Uziya á vɔk serɔ mo vɔk e jeng reku mɛ, ko yaga hɛ, á sangal e lɔ mɛ shan nju mɛ, á tɔk to yel e Gbɔng Duk Re Fongôl Dagwi Darwey wɛt. Sɔ mɛ Yɔtam a bɛrɛng lɔ gwɔ̀m, ko a ra fwôm negwɔm o e to mɛ.

²²Yɛshaya Amotsi, zarap Dagwi a jɛk bwang pyɛ́ mwa de Uziya a ra e negwɔm mɛ.

²³Ano Uziya a ku, ba lɛrɛ hɛ e cwɛ̂l begwɔ̀m bagat na kwɔ̂n lɛsɛ̂ begwɔ̀m, yaga yɛn a ye, a vɔk rɔ ves hê rehwô rebek sede sekwa. Sɔ mɛ Yɔtam a re negwɔm e to mɛ.