Read berom 2 Neha-Raane 27 Bible Online

2 Neha-Raane 27 - berom bible

2 Neha-Raane 27

¹Yɔtam a vɔk neshey kuru baba na nɛ netungun (25) jeng de a hwo re negwɔm. A re negwɔm neshey kuru na nɛ netyiimin yi e Yɛrusalɛm. Neng-gwɔ mɛ à Yɛrusha Zadɔk.

²A ra pyɛ́ de ya jam a Dagwi Darwey, tyɛng sede da mɛ Uziya a kana ra, ko a wɔ̀ yel e Kwɔ̂n Jɛrɛ̂ Dagwi Darwey wɛt. Mwa ano, bemat o ba re nuyel na raà begwong beves.

³E Yɔtam de a to lɔk Ruhup Bato gwô lalâ Gbɔng Duk Re Fongôl Dagwi Darwey, ko a kyě yongos bebak jwâ-pomo e bak Ɔfɛl de ba ga kana gabsa.

⁴Ano arɔng, a lɔk bapomo e berahwôl Yuda, na nelɔ bemât como tanga tyɔ́n e bahwôt Yuda.

⁵A tó como na gbɔng gwɔ̀m BeAmɔn na bemat mɛ ko a rɛ ɛn. A tɛ̀ BeAmɔn be talsa pyɔlɔ kahɛ shey yaga neshey netat. Ba talsa tɔ̂n benaas vê dyam pyɛng, na kilo gu baba na naga beba (2,200) vê alkama tanga kilo gu baba na naga beba (2,200) vê baale arɔng.

⁶Yi ano, nerêy negwɔm mɛ na gwɛsɛ hɛn yaga a gyenges hâ Dagwi Darwey, Dagwi mɛ na yey rining.

⁷Bwang pyɛ́ de Yɔtam a ra, na cōmo de a tó tanga begwông kyé na tom mɛ, ba jɛk yɛ e Bwok-basâ Pyɛ̂ Bare yê Begwɔ̀m Israyɛl na Yuda.

⁸Yɔtam á vɔk neshey kuru baba na nɛ netungun (25) jeng de á hwo re negwɔm, ko á re nɛ neshey kuru na nɛ netyiimin yi e Yɛrusalɛm.

⁹E bama mo, a ku, ko ba lɛrɛ hɛ e gbɔng repomô Davit, ko sɔ mɛ Ahas a re negwɔm o e to mɛ.