Read berom 2 Neha-Raane 28 Bible Online

2 Neha-Raane 28 - berom bible

2 Neha-Raane 28

¹Ahas a hwo re negwɔm yɛ na neshey kuru baba jìp, ko a re negwɔm o yi e Yɛrusalɛm neshey kuru na nɛ netyiimin. A raa begwông dâ beda mɛ Davit wɛt, yaga a ra pyɛ́ de ya jam a Dagwi Darwey, Dagwi mɛ wɛt,

²ko a raa begwông begwɔ̀m Israyɛl. A tɛ̀ be yong a yɛ pyɛ̂ sekwît Baal yê dyam.

³Ano arɔng a rangas a yɛ pyɛ̂ nesang hyɔɔlɔl e nɛk Hinɔm. A nára hwey mɛ nɔrɔ̂ rangas vɔk na ci. Negwɔn nemo na sé a Dagwi byɛm-byɛm. Nɛ à nane de na tɛ̀ Dagwi Darwey a pat mɛ bemât vwel o, na a nɔ̂ng BeIsrayɛl hɛ.

⁴Ahas a nása nenɔrɔ detidetu e nekwɔn sekwit ne berahwol tanga e nɛ̂n cɔ́gɔt ryey o.

⁵Yaga banɛn de Ahas a ra, Dagwi Darwey, Dagwi mɛ a nára hɛ e vwɔ̂ gbɔng gwɔ̀m Sirya, ko a re ɛ e como, ko a hashe BeYuda pyak a kyè mɛ vɔk e de sesam e Damaskus. Ano arɔng Dagwi Darwey a nára hɛ e vwɔ̂ Pɛka Remaliya, gbɔng gwɔ̀m Israyɛl.

⁶Tuk hining o gbɔng gwɔ̀m o a mɔbɔs bemât comô Yuda gu naga na gu kuru baba (120,000) de bá tó como na yey ting tyɔng wɛt, ba ra a yɛn ano yaga yɛn a ye waa a Dagwi Darwey, Dagwî bedabeda mɛn.

⁷Zikri, sugâ Ɛfrayim hwak a mɔrɔ Maaseya, hwêy gbɔng gwɔ̀m, na Azrikam, mwât kyé na fwôm lɔ gwɔ̀m tanga Ɛlkana de a raa gbɔng gwɔ̀m na nerey.

⁸BeIsrayɛl ba re begwa mɛn BeYuda na como, ko ba hashe beha, na nèy gu naga baba (200,000) na pyɛ̂ jugu pyak yi na yɛn, ko ba kyè mɛ vɔk e Samariya.

⁹E jeng yane, Ɔbɛt, piris de á sè sangal e repomô Samariya a hwo man na bemât comô Israyɛl mwas na yɛn a yel e repomo mo, ko a yang ɛn, “Di in, yaga Dagwi Darwey, Dagwî bedabeda min, a tɛ̀ shom na BeYuda, a nára hɛn e vɔ min, ko yin a mɔbɔs hɛn na neves de nà wò wul lagwi.

¹⁰Yin a sé simo yin a tɛ̀ BeYuda na bemât Yɛrusalɛm, beras na beha, be tɛ́ ɛn besam min! Yin a tɔk, yin a ga ra a Dagwi Darwey, Dagwi min banɛn arɔng wɛt a?

¹¹A remo, wet in betong na me: Hala hin begwa min de yin a vos na be sè besam min, na yɛn a kyè wɛrɛn, ka ano wɛt, ko shôm Dagwi Darwey yê tē puu e ra yin.”

¹²Ano arɔng, behak e ji bemât nuyêl BeIsrayɛl vê yerê Ɛfrayim, yɛn à Azarya Yohanan, na Bɛrɛkya Mɛshilɛmɔt, na Yɛhizkiya Shalum tanga Amasa Hadlai ba kyɛ́ ɛn pyɛ de bemat de ba sé to ɛn yi e de como mo ba ra.

¹³Ko yɛn a yang ɛn, “Yin kwon vey na besam o e ngamo wɛt! Wot a ga ra a Dagwi Darwey banɛn arɔng, ko yin e simo gwɛ e ra banɛn tanga buru mot, mwa ano de banɛn mot ba kana sé pyak, ko shôm Dagwi Darwey ye tē puu e ra BeIsrayɛl.”

¹⁴Ano bemât como mo ba hala besam o na pyɛ̂ jugu mo mwa e vɔ bemât nuyel na mwa regyɛng BeIsrayɛl.

¹⁵Ko yɛn bemât nuyel benaas o ba sogo, ba jut besam o na mwa pyɛ̂ jugu mo, ba tɛ̀ a vemo de ba sé warap berugu yi e pyɛ̂ jugu mo. Yɛn a nɔng ɛn berugu, na bekpatak, na pyɛ̂ re na yê sɔ, ba mɔmɔ baram mɛn na něy, ko ba hashe vemo de ba sé gbɛrɛk e ra bemadung, ko ba vey kyɔk ɛn e yɛnɛ̂ vwel mɛn e Yeriko, repomô tyét. E bama mo BeIsrayɛl o ba to ɛn wɛrɛn e Samariya.

¹⁶E jeng yane, Gbɔng Gwɔ̀m Ahas a tomo a gbɔng gwɔ̀m Asirya na a vey sɛlɛ hɛ,

¹⁷yaga BeƐdɔm ba ga vêy como, ba ga re BeYuda mo, ko ba ga vos bemat o pyak be tɛ́ ɛn besam.

¹⁸BeFilisti ba wɔ jugu e bapomô nɛk beraku pere vɔk e vwêl Yuda hê rwa batin. Yɛn a re bapomô Bet-Shɛmɛsh, na Ayalɔn, tanga Gederot, mwa na Soko, na Timna tanga Gimzo mwa na nebapomo mɛn, ko yɛn a sangal e ji vɛ.

¹⁹Dagwi Darwey a vey na reyɔm ding-ding e ra Yuda yaga Gbɔng Gwɔ̀m Ahas a ra a bemat mɛ pyɛ de ya sé ryat wɛt, a to ra pyɛ de ya sé ligis e nuyêl Dagwi Darwey arɔng.

²⁰Yaga ano, Gbɔng Gwɔ̀m Tilgat-Pilneser wo Asirya a vey hwo e ra yɛ, a ngyɔ hɛ, e tô gwɛ́ a yɛ gap.

²¹Yaga Ahas a wɔ̀ hashe pyɛ̂ Gbɔng Duk Re Fongôl Dagwi Darwey, na yê nelɔ gwɔ̀m tanga yê bemât nuyel Yuda na retek, a wɔ̀ nɔ̂ng gbɔng gwɔ̀m o, ko pyɛ́ yemo mwa ya ka tɛ̀ a sɛlɛ hɛ wɛt.

²²Mwa ano de Ahas a sè bɛrɛng rezot detidetu yaga a kyɛ́ ɛ na tɛ̀ gap mɛ e ra Dagwi, ko a gwɛ̌ re nuyel na ragas a Dagwi Darwey banɛn de ba dal na neves.

²³A nása a bedagwî BeAsirya nɔrɔ̂ yas de be rangas, mwa ano de bemat mɛn ba re ɛ́ e como. A ye, “A remo de bedagwî begbɔng begwɔ̀m Sirya be sɛlsɛ begwɔ̀m mɛn, mê nára a yɛn nɔrɔ̂ yas arɔng yaga na yɛn a bin sɛlɛ me.” Ko e yɛn vɛ de ba wey na yɛ, na mwa BeIsrayɛl arɔng.

²⁴Ahas a wɔ̀ hashe pyɛ̂ fwom mwa yê Gbɔng Duk Re Fongôl Dagwi, a kpɔgɔm yɛ mwa cɛk o cɛk o. A bang mwa ri Gbɔng Duk Dagwi Darwey o, ko a lɔk a tó mɛ nekwɔn nása nɔrɔ̂ yas e kahɛ to-kwɔng Yɛrusalɛm.

²⁵E kahɛ pomô Yuda a yong nekwɔn garang na be rangas a bedagwi beduk nɔrɔ̂ pyɛ̂ nesang hyɔɔlɔl e ra nɛ. Yi ano, a tɛ̀ shôm Dagwi Darwey, Dagwî bedabeda mɛn ye hwo e ra yɛn.

²⁶Pyɛ̂ mwa de Ahas a ra, na begwông râ yɛ yi e susu mo vɔk e yɛnɛ mo ba jɛk yɛ e Bwok-basâ Pyɛ̂ Bare yê Begwɔ̀m Yuda na Israyɛl.

²⁷Gbɔng Gwɔ̀m Ahas a ku, ba lɛrɛ hɛ e gbɔng repomô Yɛrusalɛm, ko ba lɛrɛ hɛ e besak begwɔ̀m Israyɛl wɛt. Sɔ mɛ Hɛzɛkiya a re negwɔm e to mɛ.