Read berom 2 Neha-Raane 29 Bible Online

2 Neha-Raane 29 - berom bible

2 Neha-Raane 29

¹Hɛzɛkiya a hwo re negwɔm yɛ na neshey kuru baba na nɛ netungun (25). A re negwɔm o yi e Yɛrusalɛm neshey kuru baba na nɛ shanetat (29). Neng-gwɔ mɛ à Abiya, hwông Zɛkarya.

²Hɛzɛkiya a ra pyɛ́ de ya jam a Dagwi Darwey, sede remo de dâ beda mɛ Davit a kana ra.

³E shey hê mɛsɛng hê negwɔm mɛ, e pwɛl gwô mɛsɛng o arɔng, Hɛzɛkiya a wuma ri Gbɔng Duk Re Fongôl Dagwi Darwey, ko ba to yong vɛ.

⁴A vey na bepiris tanga BeLevi ko yɛn a tula hɛn e lalâ rwa rak.

⁵A yang ɛn, “À yin BeLevi, wet in betong na me! Tík in bato min jaram yaga Dagwi, na yin a fung Gbɔng Duk Dagwi Darwey, Dagwî bedabeda min, na yin a paa e jey kayɛ pyɛ de yé tɛ̀ Gbɔng Duk o ligis.

⁶Bedabeda mot ba raa Dagwi na yey rining wɛt, ko yɛn a ragas pyɛ́ de ya sé vyes e bayîs Dagwi Darwey, Dagwi mot. Yɛn a ye waa à hɛ, ko yɛn a doyo bayis mɛn yi e kwɔ̂n sangâl Dagwi Darwey, yɛn a doyo a yɛ ma.

⁷Ano arɔng, yɛn a bangas ri Gbɔng Duk o, ko ba hala bekywa-kya mo be rimis hɛn, yɛn a kyɛ́ ɛn nà kyě nása nɔrɔ̂ pyɛ̂ nesang hyɔɔlɔl, kɛ nɔrɔ̂ yas de be rangas e Gbɔng Duk o vɔk na Dagwî Israyɛl.

⁸Yaga ano, shôm Dagwi Darwey ya hwo e ra BeYuda na bemât Yɛrusalɛm, ko pyɛ de a ga ra a yɛn ya tɛ̀ a yɛn bengyip sizɔng, a yang ɛn yɔɔt, yɛn a ga tɛ́ ɛn pyɛ dúsa, sede a remo de yin pyɛ min yin e bɛrɛng na bayis min.

⁹Ey, ba ga mɔbɔs beda mot e de como, ko nèy mot bewen na behwong tanga beha mot ba sé e de sesam yaga pyɛ́ yemo.

¹⁰“Di in, ma ga tɛ̀ e yey hom na me wuna me na sira na Dagwi Darwey, Dagwî Israyɛl yaga na a to re nuyel na vɔ̂k shom na wot wɛt.

¹¹À nèy hom, yin to gwɛ̌ lashe jeng wɛt. A sé e yin de Dagwi Darwey a ga kana kasa na yin a tumal e nuyel mɛ, na yin a ra a yɛ fwom, na yin a kyè na rê fongol tanga nása a yɛ nɔrɔ̂ pyɛ̂ nesang hyɔɔlɔl arɔng.”

¹²BeLevi vemo bá sè e de tula mo: Yi e ruhûp Kohat, Mahat Amasai na Yɔwɛl Azarya. Yi e ruhûp Mɛrari, Kish Abdi na Azarya Yɛhalɛlɛl. Yi e ruhûp Gɛrshɔn, Yɔwa Zimna na Ɛdɛn Yɔwa. Yi e ruhûp Ɛlizafan, Shimri na Yɛyuwɛl. Yi e ruhûp Asaf, Zɛkarya na Mataniya. Yi e ruhûp Heman, Yɛhuwɛl na Shimsi. Yi e ruhûp Yɛdutun, Shemaya na Uziyɛl.

¹⁵Yɛn a wɔ̀ tula begwa mɛn, ko yɛn a tɛ̀ bato mɛn haalal. Ano yɛn a re nuyel na fûng Gbɔng Duk Re Fongol e ra nu de gbɔng gwɔ̀m a nɔng ɛn, tyɛng na badu Dagwi Darwey arɔng.

¹⁶Bepiris o ba wɔ̀ yel e bak ji mo wò Gbɔng Duk Dagwi Darwey o, na be fung wɛ, ko yɛn a paa kayɛ pyɛ de ya sé ligis e jey, e lalâ Gbɔng Duk o. BeLevi ba de hashe yɛ vɔk e Nɛk Kidrɔn e mâ jey.

¹⁷Yɛn a pɛrɛ fwôm fung o tûk mɛsɛng hê pwɛ̂l mɛsɛng o, ko e tuk hê rwit hê pwɛl o yɛn a wul rwi ruhûp Gbɔng Duk Re Fongôl Dagwi Darwey. E bama mo yɛn a re nuyel na râ fwom e ji mo nepɔlɔ rwit de na raa, yi ano, e tuk hê kuru na hɛ tyiimin hê pwɛl o, yɛn a yɛnɛ kayɛ pyɛ.

¹⁸BeLevi mo ba wɔ̀ ha a Gbɔng Gwɔ̀m Hɛzɛkiya hâ fwom de yɛn a ga ra, yɛn a ye, “Wot a ga yɛnɛ fûng Gbɔng Duk Re Fongol o mwa, wot a wuna na gàgbang rangâs yas, na pyɛ̂ fwôm kwɔn o mwa, na tebut tikîs ràng kpam-tuk na pyɛ̂ fwôm wɛ mwa.

¹⁹Ano arɔng, wot a ga to toyo na pyɛ̂ fwom mwa de Gbɔng Gwɔ̀m Ahas a kana hashe, a kyè mɛ e neshey de á kyɛ́ ɛ nà re a Dagwi fongol na yey rining, ko wot a ga to nára a Dagwi yɛ. Di, pyɛ́ ma yane wot a ga tula yɛ mwa e nuyêl gàgbang rangâs yas vɔk na Dagwi Darwey.”

²⁰Ano, Hɛzɛkiya a nusu bop, a tula bemât nuyel gbɔng repomo, ko yɛn a kyè vɔk e Gbɔng Duk Re Fongol.

²¹Yɛn a vey na bemus betaama, na beturuk betaama, na byôt tyīmit tyaama tanga begam betaama yaga nɔrɔ̂ halâ banɛ̂n bemât lɔ gwɔ̀m, na vê BeYuda, tanga yaga fûng Gbɔng Duk Re Fongol. Gbɔng Gwɔ̀m a nɔ̂ng bepiris vê yerê Aharon nu na be nára nɔrɔ̂ yas o e ra gàgbang rangâs yas Dagwi Darwey.

²²Ano, bepiris o ba tanga yɛt bemus o, ba raa na beturuk, tanga byôt tyīmit. Ba sɛt nemi mo ko ba waram nɛ e ra gàgbang rangâs yas o.

²³E bama mo, bepiris o ba wɔ́ na begam o na gbɔng gwɔ̀m tanga bemât rê fongol o, ko yɛn a tɛ̀sɛ vɔ mɛn e ra batô yɛ.

²⁴Ano, bepiris o ba yɛt yɛ, ko ba shushu nemi mo e ra gàgbang rangâs yas, na be tala mɛ banɛ̂n BeIsrayɛl. Gbɔng Gwɔ̀m a ga kana nɔng nu, be nára nɔrɔ̂ yas de be rangas tanga hê talâ-nɛn yaga mwa BeIsrayɛl.

²⁵Gbɔng Gwɔ̀m a raa pyɛ́ de Dagwi Darwey á kana misang a Gbɔng Gwɔ̀m Davit yi e nû Gat, zarap Dagwi wo gbɔng gwɔ̀m, tanga yi na Natan, zarap Dagwi arɔng. Ano, gbɔng gwɔ̀m a tɛ̀ BeLevi be sangal e Gbɔng Duk Re Fongol, yɛn a vɔk ɛ̀ yōm tanga bapêy lwɛlɛ.

²⁶BeLevi ba tumal e hwomo na pyɛ̂ lwɛlɛ̂ Davit, ko bepiris ba vɔk bezing.

²⁷Ko Hɛzɛkiya a hwo nɔng nu be pɛrɛ nɔ̂ng nɔrɔ̂ yas de be rangas o. Ras de ba hwo mɛ, ko bemat o ba hwo ra lwɛlɛ̂ somô Dagwi Darwey. Ano arɔng, bemât pyɛ̂ lwɛlɛ ba pɛsɛl bezing, ko ba raa na bwang pyɛ̂ lwɛlɛ̂ Davit gbɔng gwɔ̀m Israyɛl.

²⁸Kawɛ mwat e hwomo a dopɛ e de rê fongol o, bemât lwɛlɛ ba ra lɛlɛ, ko vê bezing na vê bwang pyɛ̂ lwɛlɛ ba wuna hɛn e de râ lɛlɛ pere vɔk e jeng yɛnɛ̂ rangâs nɔrɔ̂ yas o.

²⁹Jeng de ba ga yɛnɛ nára nɔrɔ mo, ko gbɔng gwɔ̀m na bemat o mwa ba ye guduruk ko ba re a Dagwi fongol.

³⁰Gbɔng Gwɔ̀m Hɛzɛkiya na bemât nuyel yére Israyɛl ba yâng BeLevi be ra a Dagwi Darwey lɛlɛ̂ somo de Gbɔng Gwɔ̀m Davit tanga Asaf, zarap bá kana jɛk. Kawɛ mwat a ra lɛlɛ mo na yey pyɛng sizɔng, ko yɛn a ye guduruk ba re a Dagwi fongol.

³¹E bama mo, Hɛzɛkiya a yâng bemat o, “A remo de yin a ga tɛ́ in haalal yaga Dagwi Darwey, vey in na nɔrɔ̂ yas de be rangas na be feng a Dagwi Darwey mɛ̀ e Gbɔng Duk Re Fongol.” Ano, regyɛng bemat o ba vey na nɔrɔ̂ yas tanga hê feng, ko behak ba vey na nɔrɔ̂ yas de be rangas burang tyɛng na pyɛ de yey mɛn ya dura a yɛn.

³²Nepyak nɔrɔ̂ yas de be rangas de bemat ba vey mɛ mo na sé bemus kuru bataama (70), na beturuk naga, na byôt tyīmit naga beba, mwa ya sé yaga nɔrɔ̂ rangas vɔk na Dagwi Darwey.

³³Nɔrɔ̂ yas de ba tik jaram yaga Dagwi ha sé bemus naga betyiimin (600), na tyīmit gu batat (3,000).

³⁴Ko bepiris ba sé tyɔng zɔng, yaga ano, yɛn a tɔk wɔnɔ mwa yas de bê nára yaga nɔrɔ̂ rangas o wɛt, ko begwa mɛn BeLevi ba vey sɛlɛ hɛn pere wɔ̀ yɛnɛ gwɛ, gyam na bwang bepiris o be wɔ̀ tɛ̀ bato mɛn haalal. Yaga BeLevi ba dal bepiris o e gyêng bato mɛn haalal.

³⁵Gakang na nepyak nɔrɔ̂ yas de be rangas, ba vɔk nɔrɔ̂ sebwep hê sangal tyang, na hê nshî anap de be nɔngɔs tanga yas de be rangas o. Yi ano, ba to pɛrɛ rê fongôl Dagwi Darwey e Gbɔng Duk o.

³⁶Ko Hɛzɛkiya na mwa bemat o ba vɔk yey pyɛng vit à yere mo yaga pyɛ de Dagwi a ga ra a yɛn, ko yaga pyɛ́ mo mwa ya té e ji kejeng tyɔng zɔng.