Read berom 2 Neha-Raane 3 Bible Online

2 Neha-Raane 3 - berom bible

2 Neha-Raane 3

¹Sɔlɔmɔn a pɛrɛ lɔ̂k lɔ Dagwi Darwey e Yɛrusalɛm e Raku Mɔriya de Davit da mɛ á kana di ɛ̀ negwi-ywey e kwɔn de Davit á kana yong e gazû Ornan wo Yebus.

²A pɛrɛ lɔk o tûk ba hê pwɛl gwo neba gwô shey hê naas hê negwɔm mɛ.

³Mása de Sɔlɔmɔn a ra yaga lɔk lɔ̂ Dagwi o a hemo: Nelis o nà sé mita kuru batat (30), ko netes o mita kuru (10).

⁴Gàgbâng nuyel lɔ mo wa sé tyɛng na netês hɛ, wɔgɔ, mita kuru, ko nelis hɛ vɔk e rak o na sé mita kuru na vɛ betungun (15). E ji mo a lolom hɛ na celes dyam shinang.

⁵Gbɔng duk tula mo ba tɔrɔ wɛ na bebak cɔgɔ̂t sida, ba bang vɛ na dyam shinang ryat, ko ba kyɔrɔk wɛ na wɔrɔ̂ batîn tyet na ngyang.

⁶A tɔrɔ duk tula mo sizɔng na dyéngere ryat na dyam shinang yi e Parvayim.

⁷Ano de a lolom duk tula mo, na besesek o, na cɔ́gɔt vwêl ri mo, na vara mo, na ri duk o, na pyɛ́-cen de ba tâng yɛ à bekɛrup de ba wɔrɔ e varâ duk o mwa na dyam shinang ryat.

⁸A yong Kwɔn Jɛrɛ Hê Jɛrɛ, nelîs hɛ na sé tyɛng na ne gbɔng duk tula wɔgɔ, mita shabetat, ko netes o mita shabetat arɔng. A lolom wɛ na tɔ̂n kuru baba na vɛ betungun (250) vê dyam shinang.

⁹Nedirîk bekpɛ̂k fwom o na sé jɔ̄t tyiimin yê kilo (0.6 kilo) wo dyam shinang. A lolom beduk ragyip o na dyam shinang arɔng.

¹⁰E Kwɔn Jɛrɛ Hê Jɛrɛ, a yong bekɛrup beba na dyam, ko ba lolom vɛ na dyam shinang.

¹¹Nelîs bafabâk bekɛrup o mwa na sé mita kuru, kare refabak o ra sé mita beba na jɔ̄t tyat (2.3 mita) ko ra rá vwarâ duk o, ko rê neba mo ra rá rê kɛrup wo neba mo arɔng.

¹²Ano arɔng refabâk kɛrup wo neba mo ra sé mita beba na jɔ̄t tyat, ra rá vwarâ duk gwô hagat o mwɛ, ko refabak o ret ra rá rê mumwɛ.

¹³Nelîs bafabâk bekɛrup o mwa na sé mita kuru. Bekɛrup o ba tumal cik ko bwang bayis mɛn gwó bɛrɛng gbɔng duk tula.

¹⁴Ano arɔng, a yong gworugû bâng kwɔn o na linen puruk tanga berugû bùm wilwil, na zwey tanga swinang zoyong, ko ba wɔrɔ ɛ̀ bazinâ bekɛrup e ra gwɛ.

¹⁵E nuyêl duk rê fongol o, a yong bègbɔng bebirik beba, nelis kagwɛ mo na sé mita kuru na vɛ betyiimin (16 mita), na bong de nelis o na sé mita beba na jɔ̄t tyat (2.3 mita).

¹⁶A yong ngyang de ba ták yɛ, ko a tɛ̀ yɛ e ra bebong o, a yong nèy cɔgɔ̂t pomigiranet naga gwining ko a tɛ̀ nɛ rɔnɔ ngyang o.

¹⁷A tɛ̀ bebirik o e nuyêl Gbɔng Duk Re Fongol o, gwining o e vwɔ yege ko gwohwak e vwɔ mwɛlɛng, a vo a gwo vwɔ yege rezâ Yakin ko gwo vwɔ mwɛlɛng à Bowas.