Read berom 2 Neha-Raane 30 Bible Online

2 Neha-Raane 30 - berom bible

2 Neha-Raane 30

¹Hɛzɛkiya a tomo betom vɔk na mwa BeIsrayɛl tanga BeYuda, ko a jɛk a BeƐfrayim na BeManase bebok-berang arɔng, a yang ɛn mwa be vey e Gbɔng Duk Re Fongôl Dagwi Darwey e Yɛrusalɛm na be ra a Dagwi Darwey, Dagwî Israyɛl Nzem Gyilsit Nelɔ.

²Yaga gbɔng gwɔ̀m, na bemât nuyêl fwom mɛ, tanga regyɛng bemat e Yɛrusalɛm ba ga ra badu na be gyeng nzem o e pwɛl gwô neba,

³a remo de yɛn a tɔk gyeng ne tyɛng e jeng o wɛt, yaga bepiris pyak ba ga kana tɛ̀ bato mɛn haalal wɛt, ko bemat o ba ga kana man e Yɛrusalɛm arɔng wɛt.

⁴Pyɛ de ba yong o ya jam a gbɔng gwɔ̀m na mwa regyɛng bemat o.

⁵Yaga ano, yɛn a nɔng nu, be shara ha mo e neyɛnɛ vwel Israyɛl, yi e Dan e rwa bato vɔk e Bɛɛr-Sheba e rwa batin, na bemat o mwa be vey man na be ra a Dagwi Darwey, Dagwî Israyɛl nzem o e Yɛrusalɛm, yaga yɛn á mak manas pyak na be ra nɛ sede remo de ba jɛk e badu Dagwi wɛt.

⁶Ano, betom gbɔng gwɔ̀m ba kyě gas bebok-berang o na bemât nuyel fwom mɛ vɔk e kawɛ bak bavwêl Israyɛl na Yuda, ba ye, “Óoo, à BeIsrayɛl, toyo hin vey na Dagwi Darwey, Dagwî Abraham, na Yishak, tanga Israyɛl, yaga na yɛ a bin to toyo vey na bwang min de yin a hywit in e vwɔ̂ gbɔng gwɔ̀m Asirya.

⁷Yin sè sede beda min na begwa min de bá kyɛ́ ɛn nà sey tsak o na Dagwi Darwey, Dagwî bedabeda min wɛt, yaga ano, a tɛ̀ ɛn be tɛ́ ɛn barin sede remo de yin e bɛrɛng.

⁸Yin sè gbàrak sede yɛn wɛt, ko nára hin bato min vey na Dagwi Darwey e negya, na yin a vey e Gbɔng Duk Re Fongol mɛ de a ga tɛ̀ wɛ jɛrɛ gbak-gbak, na yin a ra a Dagwi Darwey, Dagwi min fwom, yaga na shom mɛ de ye tē puu e ra yin ye ye rɔ̀s.

⁹Ka sede yin a toyo vey na Dagwi Darwey, ko bemat de ba kana hashe begwa min na nèy min e sesam bê wok nemwishish mɛn, ko bê hala hɛn na be toyo vey e vwel hemo. Yaga Dagwi Darwey, Dagwi min a vɔk nɔrɔ-rat na toshô reyɔm, ko ê doyo bayis mɛ yi na yin wɛt, ka sede yin a toyo vey na yɛ.”

¹⁰Betom o ba wɔ́ e kahɛ pomô bavwêl yére Ɛfrayim na Manase, ba raa vɛ pere vɔk e vwêl yerê Zɛbulun. Ko bemat o ba shɛgɛsh hɛn, ba tabas a yɛn nengyas e ra ha mo.

¹¹Mwa ano, ba sɛ̀ behak tyɔng e yére Ashɛr, na Manase, tanga Zɛbulun de ba dyɛng bato mɛn, ko ba vey e Yɛrusalɛm o.

¹²E jeng o, Dagwi a sé ra fwom e neyey BeYuda, a tɛ̀ yɛn a wuna hɛn na be ra pyɛ de gbɔng gwɔ̀m na bemât nuyel fwom mɛ ba nɔng nu e ra yɛ, yi na hâ Dagwi Darwey.

¹³Regyɛng bemat pyak ba tula hɛn e Yɛrusalɛm e pwɛl gwô neba, na be ra Nzem Kpam-tuk Sana Géy-sing.

¹⁴Yɛn a tula mwa nekwɔn rangâs yas na ne rangâs pyɛ̂ nesang hyɔɔlɔl vɔk na bedagwi beduk de na sé e Yɛrusalɛm, ko yɛn a wɔ̀ bomos e Nɛk Kidrɔn.

¹⁵E tuk hê kuru na hɛ naas, hê pwɛl o, yɛn a yɛt byôt tyīmit yaga Nzem Gyilsit Nelɔ BeIsrayɛl. Bepiris tanga BeLevi de ba sé ligis, ba wok rekyen sizɔng e nuyêl bemɛn, ko yɛn a pere wɔ̀ tɛ̀ bato mɛn haalal. Yi ano, yɛn a tɔk nása nɔrɔ̂ yas de be rangas e Gbɔng Duk Dagwi Darwey.

¹⁶Yɛn a to kabsa tom mɛn e Gbɔng Duk o, tyɛng na pyɛ de ba misang a yɛn e badu Mose, mwât fwôm Dagwi, BeLevi ba nɔ̂ng bepiris nemi yas de ba yɛt o, ko yɛn a waram nɛ e ra gàgbang rangâs yas o.

¹⁷A remo de bemat o pyak ba sé ligis, yɛn a tɔk yɛt tyīmit Nzem Gyilsit Nelɔ mo wɛt, yaga ano, BeLevi ba yɛt a yɛn yɛ, ko ba to nása a Dagwi Darwey yɛ e to mɛn.

¹⁸Ano arɔng, pyak e ji bemat de ba vey yi e yére Ɛfrayim, na Manase, na Isakar, tanga Zɛbulun ba ga kana tɛ̀ bato mɛn haalal wɛt, ko yɛn á sè ra nzem o e gwong de gwa jam a Dagwi wɛt, ko Hɛzɛkiya a ra a Dagwi won yaga yɛn, a ye, “À Dagwi Darwey, e ji nerat mo, hala a mwa vemo

¹⁹de ba tɛ̀ neyey mɛn na be jama hwo Dagwi Darwey, Dagwî bedabeda mɛn, mwa ano de yɛn a sé re a hwo fongol tyɛng na badu tɛ́ ɛn haalal wɛt.”

²⁰Ano kwong, Dagwi a wok wôn Hɛzɛkiya ko a hala a bemat o, a mǎ hɛn wɛt.

²¹BeIsrayɛl de ba tula hɛn e Yɛrusalɛm ba ra Nzem Kpam-tuk Sana Géy-sing nepɔlɔ netaama na yey pyɛng vit à yere mo. Kahɛ tuk BeLevi na bepiris ba dopse somo Dagwi Darwey na gap mɛn mwa.

²²Hɛzɛkiya arɔng a gwɛ̌ a BeLevi gap e ra begwong berat de yɛn a kyè na rê fongôl Dagwi Darwey. E bamâ nepɔlɔ netaama de BeIsrayɛl ba nása nenɔrɔ̂ yas ne wunâ nesa na be somo mɛ Dagwi Darwey, Dagwî bedabeda mɛn,

²³yɛn a yong ɛ̀ na be re nuyel na nzem o nepɔlɔ netaama mo nehak. Ko yɛn a re nuyel na nzem o na yey pyɛng sizɔng.

²⁴Gbɔng Gwɔ̀m Hɛzɛkiya a nɔ̂ng bemat o bemus gu rining (1,000) na tyīmit gu bataama (7,000) na yɛn a re. Ko bemât nuyel fwom arɔng ba gwɛ̌ a yɛn ɛ̀ bemus gu rining (1,000) na tyīmit gu kuru rining (10,000). Bepiris pyak ba tɛ̀ bato mɛn haalal arɔng.

²⁵Yaga ano, regyɛng BeYuda, na bepiris tanga BeLevi, na bemat de ba yi e bak rwa bato, tanga bemât yére dyuk de ba sé sangal e bavwêl Israyɛl na Yuda ba vɔk yey pyɛng vit à yere mo.

²⁶Gbɔng repomô Yɛrusalɛm ra sila na bemat de yey mɛn ya pɛngɛ zá wɛt, yaga ba ga ra pyɛ cak yerê yemo wɛt yimo jeng Sɔlɔmɔn hwêy Davit, gbɔng gwɔ̀m Israyɛl.

²⁷Bepiris tanga BeLevi ba ra won na Dagwi Darwey a tɛ̀ nerat e ra bemat o. Ko Dagwi yi e lɔ mɛ e lagwi a wok won mɛn, ko a sey nerat de ba tɛ̀ a bemat o.