Read berom 2 Neha-Raane 33 Bible Online

2 Neha-Raane 33 - berom bible

2 Neha-Raane 33

¹Manase á vɔk neshey kuru na nɛ neba jeng de á hwo re negwɔm, ko a re negwɔm o neshey kuru batungun na nɛ netungun (55) e Yɛrusalɛm.

²Manase a ra a Dagwi Darwey banɛn, a raa negwɔn byɛm-byɛm yerê ne bemât vwel de Dagwi Darwey a ro ɛn yi na BeIsrayɛl.

³A lɔk nekwɔn sekwit de da mɛ Hɛzɛkiya a kana gangas nɛ. A lɔk nekwɔn nása nenɔrɔ vɔk na ci Baal, ko a tɛ̀ swesêk Ashera, ci hwā mo. A to re a netangacɛn fongol.

⁴E ji Gbɔng Duk Re Fongol e Yɛrusalɛm, a lɔkɔs nekwɔn nása nenɔrɔ vɔk na cī. A ra ano, mwa ano de Dagwi Darwey a kana ye, e kwɔn a hemo de bê re a yɛ fongol.

⁵A to tɛ̀sɛ nekwɔn nása nenɔrɔ vɔk na netangacɛn e nelala neba ne Gbɔng Duk o.

⁶A nára sɔ mɛ sede nɔrɔ̂ rangas vɔk na cī. A ra vyoshon, na bes tanga negarap, ko a ha na bevuvwel. A ra a Dagwi Darwey pyɛ́ vyes ding-ding, yemo de ya tɛ̀ shôm Dagwi Darwey ya sogo.

⁷A tɛ̀ swesêk Ashera, ci hwā mo, e Gbɔng Duk Re Fongol arɔng. A ra ano, mwa ano de Dagwi Darwey a kana yang Davit tanga sɔ mɛ Sɔlɔmɔn, a ye, “A sé e ngamo e Yɛrusalɛm e Gbɔng Duk Re Fongol womo de me simo be re a me fongol nesheneshey. Ma ga kasa gbɔng repomo mo yi e mwa bavwêl yére kuru na yɛ bya yê Israyɛl.

⁸Ka sede BeIsrayɛl ba rɔda raa badu hom mwa, na be to gyeng badu de mwât fwom hom Mose a kana nɔng ɛn, ko ma rɔda simo be pat ɛn e vwel de ma kana nɔ̂ng bedabeda mɛn wɛt.”

⁹Ko BeYuda ba ka raa Dagwi Darwey wɛt. Manase a hwɔlɔ hɛn, ba ragas banɛn de ba dal vê bemât bavwel de Dagwi Darwey á ro ɛn jeng de bemat mɛ bá sè kyè vey.

¹⁰Mwa ano de Dagwi Darwey a tusa Manase na bemat mɛ, ko yɛn a tɛ̀ tong na ha mɛ wɛt.

¹¹Yaga ano, Dagwi Darwey a tɛ̀ bemât nuyêl comô Asirya ba hwo e ra Yuda na como. Yɛn a wɔ̀ vo Manase, ba kaba hɛ na begúk, ba rɔgɔs hɛ na ngyang, ko ba kyè na yɛ vɔk e Babilɔn.

¹²Jeng de á sè e ji rezot, a jama nerât Dagwi Darwey, Dagwi mɛ, ko a dyɛng to mɛ sizɔng e nuyêl Dagwî bedabeda mɛ.

¹³A ra a yɛ won, ko Dagwi a wok won mɛ, a tɛ̀ vê repugu mɛ be hala hɛ, ko a to toyo vey e Yɛrusalɛm, a re nuyel na negwɔm mɛ. Pyɛ́ yemo ya tɛ̀ a tɔk tsɛng-tsɛng, Dagwi Darwey a sé Dagwi mwin.

¹⁴E bamâ pyɛ́ yemo, Manase a gwɛ̌ lɔk vɔk e rak o jwâ-pomo mo wo jey wo rwa rak wo gbɔng repomô Davit. A jut lɔk o yi e nɛk de wa sé bagat na lwêl nshî Gihɔn, a kyè mɛ e rwa bato pere vɔk e Ruhup Betɔk, tanga bak gbɔng repomo mo de ba tâng wɛ à Ɔfɛl. Ano arɔng, a tɛ̀ regyɛng bemât como na mwât nuyel mɛn e kahɛ pomô Yuda de ba gwɔrɔ na jwa.

¹⁵A paa cî yére dyuk tanga swesêk Ashera de á kana tik e Gbɔng Duk Re Fongol. A to paa nekwɔn rangas nɔrɔ̂ yas ne bedagwî yére dyuk de na sé e rahwôl Gbɔng Duk Dagwi Darwey o, tanga e bwang nekwɔn de a kana tikis ɛ pyɛ́ mo e Yɛrusalɛm. A paa pyɛ́ mo mwa vɔk e mâ gbɔng repomo mo ko a wɔ̀ lusha yɛ yikyik.

¹⁶Ano arɔng, a to yong gàgbang rangâs yas Dagwi Darwey ko a nása nenɔrɔ̂ wunâ nesa, na ne feng a Dagwi e hwomo. A nɔ̂ng BeYuda mwa nu na yɛn a re a Dagwi Darwey, Dagwî Israyɛl fongol.

¹⁷Mwa ano de bemat o ba re nuyel na nása nenɔrɔ̂ yas e berahwol, ko yɛn a nása nɛ vɔk na Dagwi Darwey zɔng.

¹⁸Bwang pyɛ́ mwa de Manase a ra, na won de a ra a Dagwi mɛ tanga neha de bezarap Dagwi ba vɛ̀sɛ a yɛ mɛ, nemo de yɛn a yis mɛ na Dagwi Darwey, Dagwî Israyɛl ba jɛk yɛ mwa e Bwok-basâ Pyɛ̂ Bare yê Begwɔ̀m Israyɛl.

¹⁹Ano arɔng, ba jɛk won de gbɔng gwɔ̀m o a ra, na ha de Dagwi a toyo a yɛ mɛ, na neha detidetu e ra yerê banɛn de a ragas, gyam na a de tosho gabɔk, na yerê neves de a ra, na nekwɔn sâp cī de a lɔkɔs, na swesêk Ashera, ci hwā mo, de a yongos, tanga nezap cī de a yongos, ba jɛk yɛ mwa e Bwok-basâ Pyɛ̂ Bare yê bezarap Dagwi.

²⁰E bama mo, Manase a ku, ba lɛrɛ hɛ e lɔ gwɔ̀m, ko sɔ mɛ Amɔn a re negwɔm e to mɛ.

²¹Amɔn á vɔk neshey kuru baba na nɛ neba (22) jeng de á hwo re negwɔm. A re negwɔm e Yɛrusalɛm neshey neba.

²²Á raa negwɔn da mɛ Manase. Á ra a Dagwi Darwey banɛn, ko á sap cī yemo de da mɛ á kana sap yɛ arɔng.

²³Á dyɛng to mɛ, na a to toyo vey na Dagwi Darwey sede remo de da mɛ á ra wɛt, ko a gwɛ̌ ra banɛn de ba dal vê da mɛ na neves e negya.

²⁴Yaga ano, bemât nuyêl fwom mɛ bá yong reves e ra yɛ, ko yɛn a wɔ̀ mɔrɔ hɛ e ji lɔ gwɔ̀m.

²⁵BeYuda arɔng ba wɔ̀ mɔbɔs bemat de ba mɔrɔ gwɔ̀m o, ko yɛn a tɛ̀ a sɔ mɛ Yɔsiya negwɔm e to mɛ.