Read berom 2 Neha-Raane 35 Bible Online

2 Neha-Raane 35 - berom bible

2 Neha-Raane 35

¹Gbɔng Gwɔ̀m Yɔsiya a ra Nzem Gyilsit Nelɔ BeIsrayɛl e Yɛrusalɛm, na a nɔ̂ng Dagwi Darwey mɛ nerey. Yɛn a yɛt yas nzem o tuk hê kuru na hɛ naas hê pwɛl gwô mɛsɛng o.

²A gas a bepiris tom de bê ra, ko a tɛ̀sɛ a yɛn gap na yɛn a ra tom o e Gbɔng Duk Re Fongôl Dagwi Darwey.

³Ano arɔng, a yang BeLevi de ba tik bato mɛn jaram yaga Dagwi Darwey, ko yɛn e basa a mwa BeIsrayɛl arɔng. “Jut in kundung Dagwi na yin a tik gwɛ e ji Gbɔng Duk o de Gbɔng Gwɔ̀m Sɔlɔmɔn Davit wo Israyɛl a lɔk. Yin to kyě kyè na gwɛ e rasanat wɛt. Ra in a Dagwi Darwey, Dagwi min fwom mwa na bemat mɛ BeIsrayɛl arɔng.

⁴Sangal hin kayɛ jeng e nekwɔn tom min e ruhup min tyɛng na badu de Davit gbɔng gwɔ̀m Israyɛl na sɔ mɛ Sɔlɔmɔn ba jɛk a yin.

⁵Yong in bato min e nekwɔn tom min e ruhup min, ko tɛt in ɛ behak min na be sɛlɛ kahɛ lɔ̂ BeIsrayɛl arɔng.

⁶Yɛt in a yɛn yas Nzem Gyilsit Nelɔ mo. Yaga ano, tɛ̀ in bato min haalal, na yin a yong yas de bê nára a Dagwi, yi ano, bemin BeIsrayɛl bê tɔk raa pyɛ́ de Dagwi Darwey a misang a yɛn e nû Mose.”

⁷Gbɔng Gwɔ̀m Yɔsiya a nɔng yas yemo yi e kara vyēl na berɔndɔng mɛ, yaga na bemat be ra mɛ Nzem Gyilsit Nelɔ mo. A nɔng tyīmit, na bebot beturuk tanga bebot begam gu kuru batat (30,000) tanga bemus gu batat (3,000).

⁸Ano arɔng, bemât nuyêl fwom mɛ ba nɔng yas o myɛn yaga na bwang BeIsrayɛl, na bepiris tanga BeLevi be ra mɛ fwom. Yi ano, bemât nuyêl bɛrɛng Gbɔng Duk Re Fongol, yɛn vɛ à Hilkiya, darwêy bepiris, na Zɛkarya tanga Yɛhiyɛl ba nɔ̂ng bepiris o bebôt beturuk na vê begam gu baba na naga betyiimin (2,600) tanga bemus naga betat (300) na yɛn a nára a Dagwi nɔrɔ̂ yɛ e jeng nzem o.

⁹Bemât nuyel BeLevi, yɛn à Konaniya na begwa mɛ Shemaya, na Nɛtanɛl, na Hashabiya, na Yɛyɛl tanga Yozabat ba nɔng bebot beturuk na vê begam gu batungun (5,000) tanga bemus naga betungun (500) yaga na BeLevi be nɔng nɔrɔ̂ vɛ sede yas de be yɛt vɔk na Dagwi.

¹⁰Jeng de ba ga yɛnɛ yông kayɛ pyɛ yaga Nzem Gyilsît Nelɔ mo, ko bepiris tanga BeLevi ba wɔ́ e kwɔ̂n tom mɛn tyɛng na nu de gbɔng gwɔ̀m a nɔng ɛn.

¹¹E bama de ba ga yɛt beturuk na begam o, BeLevi ba wɔnɔ vɛ, ko bepiris ba waram nemi mo e ra gàgbang rangâs yas.

¹²Ko yɛn a hwo gas a bemat o e nelɔ mɛn banamâ nɔrɔ̂ rangas o, yaga na yɛn a rangas vɛ vɔk na Dagwi Darwey tyɛng na gwong de ba jɛk a yɛn e ji Badu Mose. Ba ra ano na bemus o arɔng.

¹³BeLevi ba rangas banamâ nɔrɔ̂ Nzem Gyilsit Nelɔ mo, tyɛng e gwong de ba jɛk e ji Badu Mose, ko yɛn a kyé bebak banama mo bahak e bapey, na nerwey tanga e bèkywa, ko yɛn a gas a bemat banama mo dey-dey.

¹⁴E bama de ba yɛnɛ ra ano, ko BeLevi ba gas a bemɛn banama mo, yɛn tanga bepiris ve yerê Aharon. Yɛn á ra ano yaga bemɛn o ba ra fwôm nása nɔrɔ̂ yas de ba rangas burang, tanga gwô rangâs nɔrɔ̂ sebwep pere vɔk e naturuk.

¹⁵Bemât lwɛlɛ vemo, vê ruhûp Asaf bá sè sangal e kwɔ̂n fwom de Gbɔng Gwɔ̀m Davit á kana tik a yɛn, yɛn vɛ à Asaf, na Heman tanga Yɛdutun, zarap de e yis a gbɔng gwɔ̀m na ha yi na Dagwi. Ano arɔng bemât gyeng rùhup Gbɔng Duk Re Fongol yɛn á hala nekwɔn tom mɛn wɛt yaga bemɛn BeLevi mo behak bá yong a yɛn pyɛ̂ nzem o myɛn.

¹⁶Yi ano, ba ra kayɛ pyɛ tuk hane mo yaga re a Dagwi Darwey fongol tyɛng na pyɛ de Gbɔng Gwɔ̀m Yɔsiya a nɔng ɛn nu. Yɛn á gyeng Nzem Gyilsît Nelɔ mo naka, ko yɛn á nára nɔrɔ̂ yas vɔk na Dagwi e ra gàgbang rangâs yas e gwong de gwa jam arɔng.

¹⁷Mwa BeIsrayɛl de bá sè e hwomo bá ra Nzem Gyilsît Nelɔ tanga ne Kpam-tuk Sana Géy-sing nepɔlɔ netaama.

¹⁸Ba ga sang ra yerê Nzem Gyilsît Nelɔ nane wɛt yimo yi e jeng Samwɛl zarap Dagwi. Vit a hwak e ji begwɔ̀m raane de á sang ra Nzem Gyilsît Nelɔ yerê nemo de Gbɔng Gwɔ̀m Yɔsiya, na bepiris, na BeLevi, tanga BeYuda, na BeIsrayɛl tanga bemât Yɛrusalɛm ba ra.

¹⁹Ba ra nɛ e ji shey hê kuru na hɛ rwit hê negwɔm Yɔsiya.

²⁰E bama de Gbɔng Gwɔ̀m Yɔsiya a ga ra pyɛ́ yemo mwa e Gbɔng Duk Re Fongol, ko Gbɔng Gwɔ̀m Neko wo Misra a sogo na bemât como mɛ na yɛn a wɔ̂ como e Karkɛmish e Gwɔrɔt Ɛifaratɛs. Yɔsiya a simo tusa hɛ,

²¹ko Neko a tomo a yɛ na ha hemo, a yang ɛ, “À hwo gbɔng gwɔ̀m Yuda, pyɛ mo ya sé na como yemo de ma sé ra wɛt. Ma vey ra yɛ na hwo wɛt, ko na vê repugu hom. Dagwi a ga ha a me me ra yɛ dey-dey. Di Dagwi a sé tanga me, yaga ano, hwo ra repugu na me wɛt, ka ano wɛt, ko yɛ ê wey na hwo.”

²²Ko Yɔsiya a tɛ̀ e yey mɛ na a ra como mo. A kyɛ́ ɛ nà wet betong na ha de Dagwi a ha a yɛ e nû Gbɔng Gwɔ̀m Neko. Yaga ano, a tɛ̀ pyɛ̂ como de bê dún ɛ, ko a wɔ̀ yel e de como mo e tyɛl Megido.

²³Jeng de ba sê como mo, mwât comô Misra hwak a ta ɛ na kwet. A hwo nɔ̂ng bemât fwom mɛ nu, a yang ɛn, “Pat mɛ hin e jey, ba ga mǎ me ding-ding!”

²⁴Ano yɛn a jut ɛ yi e kyɛkyɛ̂ bedwa mɛ, ko ba tɛ̀ ɛ e ji wo neba de bá vɔk wɛ bagat, ko ba toyo na yɛ e Yɛrusalɛm. A ku e hwomo, ko ba lɛrɛ hɛ e besak begwɔ̀m. Mwa BeYuda na bemât Yɛrusalɛm ba ra sesin mɛ.

²⁵Yirmiya, zarap Dagwi a jɛk lwɛlɛ̂ sesîn Gbɔng Gwɔ̀m Yɔsiya mo. Yi e jeng o a ga tɛ́ ɛ negwɔn BeIsrayɛl na be ra gwɛ jeng de yɛn a sé tosho hɛ. Gwa sé e ji Lɛlɛ Sesin de ba tula vɛ.

²⁶Kayɛ pyɛ de Yɔsiya a ra, gwong de a tɛ̀ yey na Dagwi Darwey, gwong de a gyeng Badu Dagwi,

²⁷tanga neha raane mɛ de ba jɛk yimo yi e mɛsɛ̂ng negwɔm mɛ vɔk e yɛnɛ mo, ba jɛk yɛ mwa e Bwok-basâ Pyɛ̂ Bare yê Begwɔ̀m Israyɛl na Yuda.