Read berom 2 Neha-Raane 36 Bible Online

2 Neha-Raane 36 - berom bible

2 Neha-Raane 36

¹BeYuda ba kasa Yɛhɔwahas hwêy Yɔsiya na a re negwɔm da mɛ, ko yɛn a shushu hɛ na něy pwat na a sè gbɔng gwɔ̀m e Yɛrusalɛm.

²Yɛhɔwahas o á vɔk neshey kuru baba na nɛ netat jeng de á tɛ́ ɛ gbɔng gwɔ̀m Yuda. A re negwɔm e Yɛrusalɛm pɛl tat.

³Gbɔng Gwɔ̀m Neko wo Misra a re ɛ na como, a pat ɛ e negwɔm e Yɛrusalɛm, ko a tɛ̀ BeYuda be tala hɛ dyâm vwel tɔ̂n betat na rebit o (3.5) vê dyam pyɛng tanga kilo kuru batat na vɛ benaas (34) vê dyam shinang.

⁴Neko mo a tɛ̀ Ɛliyakim gwa Yɛhɔwahas o a sè gbɔng gwɔ̀m Yuda na Yɛrusalɛm e to mɛ. A sege a yɛ reza, a tang ɛ à Yɛhɔyakim, ko a kyè na Yɛhɔwahas o vɔk e Misra.

⁵Yɛhɔyakim á vɔk neshey kuru baba na ne netungun jeng de á hwo re negwɔm. Á re negwɔm e Yɛrusalɛm neshey kuru na hɛ hining. A ra a Dagwi Darwey, Dagwi mɛ banɛn.

⁶Yi ano Gbɔng Gwɔ̀m Nɛbukadnɛzar wo Babilɔn a hwo Yuda na como. A vo gbɔng gwɔ̀m o, a tɛ̀ a yɛ ngyang, ko a kyè mɛ vɔk e Babilɔn.

⁷Nɛbukadnɛzar a hashe cak e ji pyɛ̂ nedanerey yê Gbɔng Duk Re Fongol ko a wɔ̀ tɛ̀ ye e lɔ gwɔ̀m mɛ.

⁸Kayɛ pyɛ de Yɛhɔyakim a ra, mwa na negwɔn neves mɛ, tanga pyɛ́ vyes de a ra ba jɛk yɛ e Bwok-basâ Pyɛ̂ Bare yê Begwɔ̀m Israyɛl na Yuda, ko sɔ mɛ Yɛhɔyakin a re negwɔm e to mɛ.

⁹Yɛhɔyakin á vɔk neshey kuru na nɛ rwit jeng de á tɛ́ ɛ gbɔng gwɔ̀m Yuda, ko á re negwɔm e Yɛrusalɛm pɛl tat na nepɔlɔ kuru. Yɛ á ra a Dagwi Darwey banɛn arɔng.

¹⁰Jeng de naswigi na pom, Gbɔng Gwɔ̀m Nɛbukadnɛzar a vo ɛ, a kyè na yɛ vɔk e Babilɔn, ko a hashe pyɛ̂ nedanerey yê Gbɔng Duk Re Fongol a kyè mɛ mwa. E bama mo, Nɛbukadnɛzar a tɛ̀ Zɛdɛkiya, gwa Yɛhɔyakin o a re negwɔm e ra Yuda na Yɛrusalɛm e to mɛ.

¹¹Zɛdɛkiya á vɔk neshey kuru baba na hɛ hining jeng de á tɛ́ ɛ gbɔng gwɔ̀m Yuda. Á re negwɔm e Yɛrusalɛm neshey kuru na hɛ hining.

¹²A ra a Dagwi Darwey Dagwi mɛ banɛn, ko a simo a dyɛng to mɛ na a raa neha de Yirmiya zarap Dagwi a yi a yɛ mɛ na Dagwi wɛt.

¹³Zɛdɛkiya a sogo a Gbɔng Gwɔ̀m Nɛbukadnɛzar nehywɛ, yaga Nɛbukadnɛzar o a tɛ̀ ɛ a sira a yɛ na rezâ Dagwi wɔgɔ, a rɔda dyɛng to mɛ na a raa hɛ. A kyɛ́ ɛ na negbarak nà doyo yi e banɛn mɛ, na a raa Dagwi Darwey, Dagwî Israyɛl.

¹⁴Ano arɔng, bemât nuyêl Yuda, na bepiris, tanga bwang bemat o ba raa negwɔn neves ne yére bemat jey de ya gwɔrɔ hɛn e de sâp cī. Yi ano, yɛn a tɛ̀ Gbɔng Duk Re Fongôl ligis, mwa ano de Dagwi Darwey pyɛ mɛ a ga kana tɛ̀ wɛ jɛrɛ.

¹⁵Dagwi Darwey, Dagwî bedabeda mɛn á kana re nuyel na tomsâl bezarap mɛ yaga na yɛn a tusa hɛn yi e begwong beves mɛn. Yi ano, a rɔda wok nemwishish mɛn na a tik ɛn gyat mwa tanga Gbɔng Duk Re Fongol mɛ.

¹⁶Ko bemat o bá ra neshɔngɔlɔng na betom Dagwi o, yɛn á kyɛ́ ɛn tusa mɛ, ko yɛn á shɛgɛsh bezarap mɛ. Ba rimi hɛn e de ra ano, ko e yɛnɛ mo, shôm Dagwi Darwey ya hwo e ra yɛn ding-ding, ko vit a gwong de yɛn ê hywit ɛn tabâk Dagwi.

¹⁷Ko Dagwi Darwey a vey na gbɔng gwɔ̀m Babilɔn na a hwo e ra yɛn. Gbɔng gwɔ̀m o a mɔbɔs bewen Yuda mo, a raa vɛ pere vɔk e ji Gbɔng Duk Re Fongol. A wok nemwishish mwat hwak wɛt — kɛ wen kɛ mwakuk, rwas kɛ hwā, womo de e ro ɛ kɛ womo de a sé tyang ayi. Dagwi a nára hɛn mwa e vwɔ mɛ.

¹⁸Ano arɔng, gbɔng gwɔ̀m Babilɔn o a wɔ̀ hashe pyɛ̂ jugu e Gbɔng Duk Re Fongol, na e begban Gbɔng Duk o, na pyɛ̂ nedanerey yê gbɔng gwɔ̀m Yuda tanga yê bemât nuyêl fwom mɛ. A hashe yɛ pyɛt, a kyè mɛ vɔk e Babilɔn.

¹⁹A dak kya e ra Gbɔng Duk Re Fongol tanga e ra gbɔng repomo mo, mwa na nelɔ negwɔm hɛ, na pyɛ̂ nedanerey tanga yas hɛ, ko a gangas jwâ-pomô Yɛrusalɛm o arɔng.

²⁰A hashe bwang bemat de ba pɔl vɔk e Babilɔn, na yɛn a wɔ̀ ra a yɛ tanga yere mɛ fwôm sesam. Yɛn a sǎ e de ra ano pere vɔk e jeng de Da vwel Pɛrsya a re vwel mɛn o na como.

²¹Yi ano, há de Dagwi Darwey a ga kana ha gyam e nû Yirmiya zarap mɛ ha sila. Há mo ha ye ngan, “Vwel o ha rɔda tɛ́ ɛ barin neshey kuru bataama (70), na a sè tyɛng na neshey pɔngɔ̂ Shábat de yɛn a kyɛ́ ɛn nà gyeng nɛ.”

²²A vane ano, e ji shey hê mɛsɛng de Sairus a tɛ́ ɛ Da vwel Pɛrsya, Dagwi Darwey a sila ha de a kana ha e nû Yirmiya, zarap mɛ. A tɛ̀ Sairus a nɔng nu hemo ko a tɛ̀ be jɛk hɛ na be tomo hɛ, na be wɔ̀ mok hɛ e kawɛ bak wo yɛnɛ vwel mɛ ngan:

²³“Gbɔng Gwɔ̀m Sairus wo Pɛrsya a ye: Dagwi Darwey, Dagwî lagwi, a ga nɔng me mwa segwɔm jey, ko a ga nɔng me nu na me lɔk a yɛ Gbɔng Duk Re Fongol e Yɛrusalɛm wo vwêl Yuda. Kawɛ e ji bemat mɛ de a sé na yin, tik na Dagwi Darwey, Dagwi mɛ a sè na yɛ! Tik na yɛ a toyo wɛrɛ!”