Read berom 2 Neha-Raane 4 Bible Online

2 Neha-Raane 4 - berom bible

2 Neha-Raane 4

¹Gbɔng Gwɔ̀m Sɔlɔmɔn a yong gàgbang rangâs nɔrɔ̂ yas vɔk na Dagwi hê dyam pama. Nelis hɛ na sé mita shabetat, netes o mita shabetat ko nelis o vɔk e rak o mita benaas na rebit o.

²Ano arɔng a yong gwogbɔng gwopey na dyam, ba tâng gwɛ à Gworep, gwà sé yɔbɔ mo, gwà sé mita shabetat yi e hagat hemo vɔk e here, ko neciwil o na sé mita beba na jɔ̄t bya (2.2 mita), ko ka sede ba gwɔrɔ gey bek o na rwik ko gwa sé mita kuru na vɛ betat na jɔ̄t bya (13.2 mita).

³Ba rɔnɔ nɛ̂n gwɛ na wɔrɔ̂ pyɛ́ cak sede bemus de ya sé kuru e kayɛ jɔ̄t nyaas na rebit o (0.45 mita) yê mita, bemus o ba sé ràng o ba, de ba yong na dyam yere jining o.

⁴Ba tɛ̀ gwopey o e ra nèma bemus kuru na vɛ beba, betat be bɛrɛng rwa bato, betat rwa ta, betat rwa batin ko betat rwa rak.

⁵Netîng gwɛ na sé sede tas vwɔ. Nu mo ha sé sede nû wáng, sede jamuk líli. Gwopey o gwo re betsûng nshi sede gu baba na naga betungun (2,500).

⁶Ano arɔng ba yong bèpey kuru yaga kus, ba tik betungun e hagât yege ko betungun e hagât mwɛlɛng. E ji vɛ be rɛngɛt ɛ banamâ yas de be nása nɔrɔ̂ rangas vɔk na Dagwi, ko gwopey o gwa sé yaga na bepiris be kurus hɛn ɛ.

⁷Ba yong pyɛ̂ tikîs bekywa-kya kuru yê dyam shinang tyɛng e begwông yongôs yɛ, ko ba tik yɛ e gbɔng duk tula, tyungun e hagât yege ko tyungun e hagât mwɛlɛng.

⁸Ba yong betebut kuru ko ba tik vɛ e gbɔng duk tula, betungun e hagât yege ko betungun e hagât mwɛlɛng. Ba yong neshǐ dyam shinang naga gwining arɔng.

⁹Ba yong lalâ ji mo yaga bepiris, tanga lala rey o, na ruhûp hɛ, ko ba lolom vɛ na dyam pama.

¹⁰Ba tɛ̀ gwogbɔng gwopey o e hagât vwɔ yegê Gbɔng Duk Re Fongol o e bak to-kwɔng rwa batin na rak.

¹¹Huram a yong nerwey, na becebut, tanga neshǐ. Ano de a yɛnɛ fwom de a ra a Gbɔng Gwɔ̀m Sɔlɔmɔn e Gbɔng Duk Re Fongol.

¹²Pyɛ́ ma yemo, bègbɔng bebirik beba na bebong ra rak vɛ, na ràng ba ve ngyang de ba kyɔrɔk na be bang mɛ bebong ra rak o,

¹³na nèy pomigiranet naga beba yaga ngyang de ba kyɔrɔk zang ba, ràng ba ve nèy pomigiranet yaga kahɛ kyɔrɔk o, na be bang mɛ neshǐ neba ne bebong ra rak bebirik o.

¹⁴A yong pyɛ́ de ba tɛ̀ neshǐ e rak o mwa na neshǐ mo,

¹⁵na gwogbɔng gwopey na bemus kuru na vɛ beba e nɛ̂n gwɛ,

¹⁶na nerwey, na becebut, na gubû-vɔ, na mwa bwang pyɛ́ de Huram-abi a yong na dyam pama de ba tugut, yaga Gbɔng Gwɔ̀m Sɔlɔmɔn yaga lɔ̂ Dagwi Darwey.

¹⁷Gbɔng Gwɔ̀m a yong yɛ e kwɔ̂n secwem e tê Sukɔt na Zereda e Nɛk Yɔrdan.

¹⁸Sɔlɔmɔn a yong pyɛ́ yemo mwa pyak tyɔng wɛt, yi ano ba tɔk nepyak nedirîk dyam pama de ba ra mɛ fwom o wɛt.

¹⁹Ano de Sɔlɔmɔn a yong pyɛ́ yemo mwa de ya sé e Gbɔng Duk Re Fongol Dagwi yɛ à, gàgbang rangâs nɔrɔ̂ yas, na betebut kpam-tûk Dagwi,

²⁰na nekwɔn tikis bekywa-kya na bekywa-kya mo vê celes dyam shinang de be tɛ̀sɛ mɛ kyâ Kwɔn Jɛrɛ Hê Jɛrɛ, sede remo de ba yong ɛ̀,

²¹mwa na cúyu, na bekywa-kya tanga bekabra vê celes dyam shinang ryat,

²²na pyɛ̂ rimis kya, na bèkɛt sɛt nemi na begance, na bapêy cilâ kya yê celes dyam shinang. E ra gwông yel e Gbɔng Duk Re Fongol, ri ji mo, vɔk e kwɔn de ha dal mwa na nejɛrɛ, na ri gbɔng duk tula ba sé ve dyam shinang.