Read berom 2 Neha-Raane 7 Bible Online

2 Neha-Raane 7 - berom bible

2 Neha-Raane 7

¹Jeng de Gbɔng Gwɔ̀m Sɔlɔmɔn a ga yɛnɛ râ won, kya ha gyirik yi e lagwi, ko ha re nɔrɔ̂ yas na nenɔrɔ̂ rangas o. Ano arɔng nedyɛt gbɔng nerât Dagwi Darwey na sila Gbɔng Duk Re Fongol o.

²Bepiris ba tɔk yel e Gbɔng Duk o wɛt, yaga nedyɛt gbɔng nerat Dagwi Darwey na sila wɛ.

³Sede mwa BeIsrayɛl ba di kya ha gyirik, na nedyɛt gbɔng nerat Dagwi e Gbɔng Duk o, yɛn a gaba gup e ra gàgbang, yɛn a re fongol, ko yɛn a somo Dagwi Darwey, ba ye: “Yaga a sé wo nerat, E tɛ̀ yey na bemat mɛ nesheneshey.”

⁴Ano kwong, gbɔng gwɔ̀m na mwa bemat o ba nása nenɔrɔ̂ rangas vɔk na Dagwi Darwey.

⁵Gbɔng Gwɔ̀m Sɔlɔmɔn a nára sede nɔrɔ̂ yas, berɔndɔng gu kuru baba na vɛ baba (22,000), na tyīmit gu naga na gu kuru baba (120,000). Ano de gbɔng gwɔ̀m na bemat o ba tik Gbɔng Duk o jaram yaga Dagwi.

⁶Bepiris ba tumal e nekwɔn tom mɛn, mwa na BeLevi na pyɛ̂ lwɛlɛ mɛn vɔk na Dagwi Darwey, yemo de Gbɔng Gwɔ̀m Davit á kana yong yaga somô Dagwi Darwey — yaga e tɛ̀ yey na bemat mɛ nesheneshey — kayɛ jeng de Davit a somo Dagwi na yɛ̄. E gura mo gworo, bepiris be pɛsɛl bezing, ko mwa BeIsrayɛl be sogo e tumal.

⁷Ano arɔng, Sɔlɔmɔn a tik jaram bak rwa tē wo majêy nuyêl Gbɔng Duk o, yaga a sé e hwomo de a rangas ɛ̀ nenɔrɔ̂ yas burang, na nê sebwêp wunâ nesa, a remo de gàgbang rangas nɔrɔ̂ yas wo dyam pama de Sɔlɔmɔn a yong wa tɔk jut nenɔrɔ̂ yas rangas burang, na nɔrɔ̂ nemuk, tanga hê sebwep wɛt.

⁸E jeng o Sɔlɔmɔn na mwa BeIsrayɛl ba ra nzem o nepɔlɔ netaama, yɛn á sè gbɔng regyɛng yi e Lebo-Hamat vɔk e Nɛk Misra.

⁹E tuk hê rwit, yɛn a ra gbɔng tula, yaga yɛn a ga gyeng tîk gàgbang rangâs yas nepɔlɔ netaama ko nzem o nepɔlɔ netaama arɔng.

¹⁰E tuk hê kuru baba na hɛ tat, hê pwɛl gwô netaama, a tɛ̀ bemat o e gwong vɔk e nelɔ mɛn, na feng, na yey pyɛng e ra nerat de Dagwi Darwey a kana dura a Davit na Sɔlɔmɔn tanga bemat mɛ BeIsrayɛl.

¹¹Ano Sɔlɔmɔn a yɛnɛ Gbɔng Duk Re Fongol wo Dagwi Darwey, na lɔ gwɔ̀m. Kayɛ pyɛ de Sɔlɔmɔn a kana yong na a ra e Gbɔng Duk o tanga e lɔ mɛ, a yɛnɛ yɛ mwa naka gyat.

¹²A vane ano, Dagwi Darwey a to dura tó mɛ na Sɔlɔmɔn naturuk, a yang ɛ, “Ma ga wok won mo, ko ma ga kasa kwɔn hemo yaga tó hom sede lɔ̂ nása nenɔrɔ̂ detidetu.

¹³Jeng de ma bang lagwi de bê sɛ̀ rwak wɛt, kɛ me nɔng nu na rawal wo re pyɛ̂ vwel o mwa, kɛ me tomo tumbang e ra bemat hom,

¹⁴Ka sede bemat hom de be yila hɛn na reza hom, be dyɛng bato mɛn, be ra won, be jama me, na be doyo yi e gwòng ves mɛn, ko ma rɔda wok yi e lagwi, mê hala a yɛn banɛn mɛn, ko mê toyo a yɛn na nerât vwel mɛn.

¹⁵A remo, bayis hom bê sè pyot, ko mê wet betong hom na won de be ra e dem hemo.

¹⁶Yaga a remo ma ga kasa, ko ma ga tik Gbɔng Duk womo jaram, na reza hom re sè ɛ̀ gbak-gbak. Bayis hom na yey hom ba rɔda sè e hwomo kayɛ jeng.

¹⁷Ko di yin à, ka sede yin a kyè e nuyel hom, sede remo de da min Davit á kyè, yin ragas tyɛng na nu de ma nɔng in, na yin a gyenges badu hom na pyɛ́ de ma ha a yin,

¹⁸ko mê tɛ̀ lɔ̂ negwɔm min hē sè tiing, sede remo de ma wuna me na sira na da mo Davit wɔgɔ, ‘Hwô sang bidɛ mwât re negwɔm e ra Israyɛl wɛt.’

¹⁹“Ko ka sede yin a doyo e hagat, na yin a wuba badu hom, na pyɛ́ de ma tɛ̀ e nuyel min, na yin a kyè, yin wɔ̀ ra a bedagwi beduk fwom, na yin a re a yɛn fongol,

²⁰ko mê lut in yi e vwel de ma ga nɔng in o, ko Gbɔng Duk womo de ma ga tik jaram yaga reza hom mê kyini wɛ, ko wô tɛ́ ɛ cinat ha na pyɛ berem e ji bemât mwa.

²¹Ko e ra Gbɔng Duk rwat womo, kawɛ mwat de a kwey ê langat hɛ, ê ye cwɛ̀ɛp. A rɔda ye, ‘Yaga sɛ́ de Dagwi Darwey a ra ano na sevwel semo tanga Gbɔng Duk Re Fongol womo ɛ?

²²Ano bemat ba rɔda toyo na ha wɔgɔ, BeIsrayɛl ba tik nà raa Dagwi Darwey, Dagwi mɛn, de a nusu na bedabeda mɛn yi e Misra. Yɛn a nɔng tó mɛn vɔk na cī, ba re a yɛ fongol, yaga ano de Dagwi Darwey a ga vey na mwa rezot remo e ra yɛn.’ ”