Read berom 2 Neha-Raane 8 Bible Online

2 Neha-Raane 8 - berom bible

2 Neha-Raane 8

¹E yɛnɛ̂ neshey kuru baba de Gbɔng Gwɔ̀m Sɔlɔmɔn a jut na a lɔk Gbɔng Duk Re Fongôl Dagwi Darwey na lɔ gwɔ̀m tó mɛ,

²Sɔlɔmɔn a to lɔk bapomo de Huram a kana nɔng ɛ, ko a tɛ̀ BeIsrayɛl ba sangal e vɛ.

³Sɔlɔmɔn a wɔ́ e vwêl Hamat-Zoba ko a re rɛ na como.

⁴A lɔk Tadmor e hey na mwa bapomô tikîs pyɛ́ de a lɔk e Hamat.

⁵Ano arɔng, a lɔk Bet-Hɔrɔn wo rak na Bet-Hɔrɔn wo vwel, sede bapomo de ba gwɔrɔ na bedwa, ko ba tɛ̀sɛ a vɛ rùhup na bewɔ́rɔ dyam manâs vɛ,

⁶tanga Baalat na mwa bapomô tikîs pyɛ́ mɛ, na mwa bapomô tikîs bekyɛkyɛ̂ bedwa mɛ, na vê bedwâ como mɛ, tanga mwa pyɛ́ de Sɔlɔmɔn a tɛ̀ e yey mɛ na a lɔk, e Yɛrusalɛm, na e Lɛbanɔn, tanga e mwâ vwêl negwɔm mɛ.

⁷Mwa bwang bemat de ba pɔl à BeHiti, na BeAmɔr, na BePɛrizi, na BeHivi, tanga BeYebus de ba sé BeIsrayɛl wɛt,

⁸yi e bedabeda mɛn de bá rɔngɔl e vwel o, vemo de BeIsrayɛl ba ga kana wey na yɛn wɛt — mwa hɛn, Sɔlɔmɔn a vos ɛn na be ra fwôm retek, sede remo de ba sé rɔɔ ra vey e yunung.

⁹Ko e ra BeIsrayɛl, a tɛ̀ ɛn be ra fwôm sesam na retek wɛt. Yɛn á sè bemât como, na bemât nuyêl bemat mɛ, na begwɔ̀m comô bekyɛkyɛ̂ bedwa na vê bedwa mo arɔng.

¹⁰Yɛn á sè naga beba na kuru batungun (250) de ba sè begbɔng bemât bɛrɛng bemât fwom mɛ.

¹¹Sɔlɔmɔn a jut hwā mɛ hwông Farawo yi e gbɔng repomô Davit vɔk e bak lɔ gwɔ̀m de a lɔk a yɛ, yaga a ye, “Hwā hom ê sangal e lɔ Gbɔng Gwɔ̀m Davit wo Israyɛl wɛt, yaga nekwɔn de Kundung Wuna-na-Sirâ Dagwi Darwey gwa ga vey ɛ nà sé jɛrɛ.”

¹²E bama mo, Sɔlɔmɔn a nára nenɔrɔ̂ yas de be rangas burang vɔk na Dagwi Darwey e ra gàgbang rangas yas Dagwi Darwey de a kana lɔk e nuyêl gàgbang Gbɔng Duk o,

¹³tyɛng na pyɛ de bê ragas kayɛ jeng yaga nɔrɔ̂ rangas burang de Mose á nɔng nu be ra Tuk Shábat, na nzem pwɛl pwas, tanga nzem netat ne kahɛ shey, ne à — Nzem Kpam-tuk Sana Géy-sing, na Nzem Bwal tanga Nzem Bǔk.

¹⁴Sɔlɔmɔn a raa badu fwom de da mɛ Davit á kana yong, ko a gas bepiris bagyɛng o bagyɛng o, na yɛn a ragas tom mɛn ve kahɛ tuk. BeLevi arɔng na mɛn ve lɛlɛ somô Dagwi tanga vê sɛlɛ̂ bepiris na tom de be ragas kahɛ tuk. Bemât gyeng rùhup e bagyɛng mɛn na be gyeng kagwɛ ruhup kahɛ tuk. A sé ano de Davit, mwât Dagwi á kana nɔng nu.

¹⁵Vit à mwat hwak de a ye calak a nu de gbɔng gwɔ̀m a nɔng e ra tom bepiris na BeLevi kɛ e ra begban tikîs pyɛ́.

¹⁶Yi ano, Sɔlɔmɔn a yɛnɛ râ mwa tom de a ga kana yong, yi e tuk de ba bomo retîs Gbɔng Duk Re Fongol Dagwi Darwey vɔk e tuk de ba yɛnɛ kagwɛ fwôm Gbɔng Duk o ngyɛ́l.

¹⁷Ano kwong, Sɔlɔmɔn a wɔ́ e Ɛziyɔn-Gɛbɛr na Elat e rekwogom Rep Swinang e sevwêl Ɛdɔm.

¹⁸Huram a tomo a yɛ bedwa-nshi e vɔ bemât fwom mɛ, tanga bemât fwom bedwa mo de ba ga tɔ́k ɛn na fwom na vɛ e gwogbɔng gworep. Yɛn a wɔ́ e sevwêl Ofir tanga bemât fwom Sɔlɔmɔn, ko yɛn a wɔ̀ vey a yɛ na tɔ̂n kuru na vɛ betyiimin (16) vê dyam shinang.