Read berom Ɛzra 1 Bible Online

Ɛzra 1 - berom bible

Ɛzra 1

¹E ji shey hê mɛsɛng de Sairus á sè Da vwel Pɛrsya, Dagwi Darwey á sila pyɛ de á kana ha yi e nû Yirmiya, zarap Dagwi. A tɛ̀ e yêy Sairus a nɔng redu, de ba jɛk rɛ na be tomo na rɛ, na be mok ha mo e yɛnɛ̂ bavwêl segwɔm mɛ. Redu ma remo ngan:

²“Me Sairus, Da vwel Pɛrsya, ma nɔng redu remo. Dagwi Darwey, Dagwi wo lagwi, a ga nɔng me negwɔm e ra bavwel mwa e jey. A ga to nɔng me nedirîk lɔ̂k Gbɔng Duk Re Fongol mɛ e Yɛrusalɛm wo vwêl Yuda.

³Tik na Dagwi a sè tanga yin mwa de yin a sé bemat mɛ. Yin a rɔda kyè vɔk e Yɛrusalɛm, na yin to wɔ̀ lɔk Gbɔng Duk wo Dagwi Darwey, Dagwi wo Israyɛl, yɛ womo de bé re a yɛ fongol e Yɛrusalɛm.

⁴Ka sede hwak e ji bemat mɛ mo de ba sé e de sesam e simo be sɛlɛ hɛ na a bin to ɛ, ko tik na bemât vwara mɛ be nɔng ɛ sɛlɛ de e simo. Yɛn a nɔng ɛ dyam pyɛng na dyam shinang, na yas, na pyɛ́ detidetu, mwa tanga nɔrɔ̂ yey pyɛng de ê nɔng e Gbɔng Duk wo Dagwi e Yɛrusalɛm.”

⁵Ano kwong, beda nelɔ rùhup yére Yuda na Bɛnyamin, na bepiris, na BeLevi, mwa kawɛ mwat de hâ Dagwi ha ra ɛ e yey mɛ ba yong ɛn, na be kyè wɔ̀ to lɔk Gbɔng Duk Re Fongol wo Dagwi Darwey e Yɛrusalɛm.

⁶Bemât vara mɛn mwa ba sɛlɛ na nɔngɔs hɛn pyɛ́ pyak yere yemo ngan: Pyɛ̂ fwôm lɔ na dyam pyɛng, na dyam shinang, na nekyɔrɔk detidetu, na yas, na nedirî pyɛ̂ dyām yɔkyɔk tanga nenɔrɔ detidetu yaga Gbɔng Duk o.

⁷Da Vwel Sairus a toyo a yɛn na pyɛ̂ fwom de Gbɔng Gwɔ̀m Nɛbukadnɛzar á kana hashe yi e Gbɔng Duk Re Fongol e Yɛrusalɛm e jeng como, ko á wɔ̀ tik yɛ e gbɔng duk sekwit mɛ.

⁸A nára yɛ e vwɔ̂ Mitredat, gbɔng o wo gban gwɔ̀m, womo de a bara nepyak yɛ, ko a nɔ̂ng Shɛshbazar, gwɔmna wo bak vwêl Yuda.

⁹Nepyak pyɛ́ ma nemo: bèkɛt dyam shinang kuru batat (30) yaga narâ nɔrɔ bèkɛt dyam pyɛng gu rining (1,000) yaga narâ nɔrɔ nebǎ kuru baba na nɛ shanetat (29) neshǐ dyam shinang kuru batat (30) neshǐ dyam pyɛng naga benaas na kuru rining (410) bwang pyɛ̂ fwom o cak gu rining (1,000)

¹¹Nepyak pyɛ́ mo mwa na sé gu batungun na naga benaas viisis (5,400) de ba yong na dyam shinang na dyam pyɛng. Shɛshbazar á kyè mɛ na nɛ jeng de yɛ tanga bwang bemât sesam o bá sè to ɛn yi e Babilɔn vɔk e Yɛrusalɛm.