Read berom Ɛzra 10 Bible Online

Ɛzra 10 - berom bible

Ɛzra 10

¹Sede Ɛzra a ye guduruk e de won e nuyel Gbɔng Duk Re Fongol, a sè tosho, ko e raa e kulsa banɛn de ba ga ra, ko gbɔng regyɛng BeIsrayɛl de ra wuna beras, na beha na nèy ra vey gwɔrɔ hɛ. Bemat o ba sè tosho ding-ding arɔng.

²Ko Shɛkaniya Yɛhiyɛl wo ruhûp Ɛlam a hwo yâng Ɛzra, “Wot a ga gas cáng na Dagwi yi na râ wenêng behâ yére dyuk, ko mwa ano, Dagwi a ga pat ɛ yey mɛ e ra BeIsrayɛl wɛt.

³Yaga ano, wot a rɔda wuna hot na sira na Dagwi wɔgɔ, wot ê tɛ̀ beha mo na nèy mɛn e gwong. Wot a rɔda raa redu de hwo tanga mwa vemo de be nɔ̂ng hâ Dagwi nerey yin a vo a wot. Wot ê ra pyɛ de badu Dagwi ba dura a wot.

⁴Sogo, a sé e hwo de hwà vɔk nedirîk pyɛ́ yemo e ragey mō. Ko di, wot ê dyɛng ɛ̀ ma e hwo, yaga ano, tɛ̀ yey ting, na hwo ra pyɛ de ya sé naka.”

⁵Ano kwong, Ɛzra a sogo, a tɛ̀ bemât nuyêl bepiris, na vê BeLevi tanga vê bwang BeIsrayɛl be sira, na be ra pyɛ de Shɛkaniya a vo redu e ra yɛ, ko yɛn a sisa hɛn o.

⁶E bama mo, a hàla nuyêl Gbɔng Duk o, a kyè vɔk e duk Yɛhɔhanan Ɛliyaship, ko jeng de á sè e hwomo, a ka re, kɛ a sɔ pyɛ cak wɛt yaga lashê yey e ra begwong de bemat de ba toyo yi e de sesam ba ga gas cáng na Dagwi.

⁷Bemât nuyêl BeIsrayɛl ba tomo na ha, na be mok hɛ e Yɛrusalɛm na e neyɛnɛ̂ vwêl Yuda wɔgɔ, mwa bemat de ba ga vɛ hɛn yi e sesam be ba man e Yɛrusalɛm. Ka sede mwat hwak a vey e ji nepɔlɔ netat nemo wɛt, ba rɔda sey ɛ pyɛ́ mɛ mwa, ko be pat ɛ yi e ji regyeng bemat de ba ga toyo yi e de sesam.

⁹E ji nepɔlɔ netat o, e tuk hê kuru baba hê pwɛl gwô shanetat, mwa bemat de ba sangal e yɛnɛ̂ bavwêl Yuda na Bɛnyamin ba vey e Yɛrusalɛm. Ba wɔ̀ tula hɛn e majêy Gbɔng Duk Re Fongol. Yɛn a sè vow yaga nedirîk ha de ha sé e bato mɛn ko yaga rwak wa sè rop ding-ding arɔng.

¹⁰Ɛzra, piris, a sogo e tumal, ko a hwo ha na bemat o, a yang ɛn, “Yin a ga gas cáng na Dagwi yi na vôs behâ yére dyuk, ko yin a ga gwɛ̌ e ra burû BeIsrayɛl.

¹¹Di in, kulsa hin banɛn min a remo na Dagwi Darwey, Dagwi wo bedabeda min, na yin ra pyɛ de yɛ e simo. Kang in yi na yére dyuk de ya sé sangal e sevwel mot, na yin ro beha min vê yére dyuk o arɔng!”

¹²Bemat o mwa ba ha na gbɔng fwɔ, ba toyo a yɛ, ba ye, “Ey, wot ê ra pyɛ de hwà ha.”

¹³Ko yɛn a to gwɛ̌ hanat ba ye, “Regyɛng bemat o ra sé rerey o ding-ding, ko a sé nabolos a remo. Wot ê tɔk tumal e ngamo e jey ano wɛt. Bê tɔk yɛnɛ pyɛ́ yemo mwa e ji pɔlɔ hining kɛ ba wɛt, yaga pyak e ji mot wot a vɔk vwɔ e ji banɛn vemo.

¹⁴Tik na bemât nuyel mot be sangal e ngamo e Yɛrusalɛm, na be jut nedirîk yông pyɛ́ yemo. Ko be tɛ̀ a kawɛ e ji mot de a vɔk hwâ yere dyuk jeng de ê vey, yɛ na bemakuk na bemât shɔt repomo mɛ, na be yong pyɛ de ya jam. Yi ano, gbɔng shôm Dagwi e ra pyɛ de ya ga té yê ye rɔ̀s.”

¹⁵Bemat o mwa ba ye ey à begwong de ba ha mo, sɛ̌ Yɔnatan Asahɛl na Yazeya Tikva zɔng. Ko Mɛshulam na Shabetai, WoLevi, ba dyɛng ɛ̀ ma e yɛn.

¹⁶Bemat mwa de ba toyo yi e de sesam ba sey gwong de ba yong o. Ɛzra, piris, a yila bazâ bedanelɔ rùhup behak de a kasa. E tuk hê mɛsɛng hê pwɛl gwô kuru, yɛn a hwo fwôm ngyɛgɛ̂t pyɛ́ de ya té na kawɛ mwat.

¹⁷Ko e ji pɛl tat yɛn a ngyɛgɛt hâ kawɛ rwas de a vo hwâ yere dyuk.

¹⁸Ngyɛrɛ̂ bazâ bemat de ba vos behâ yére dyuk a hemo: Bepiris e ruhup mɛn a vemo: E ruhûp Yɛshuwa Yɔzadak tanga begwa mɛ bemat o à Maaseya, na Ɛliyɛzɛr, na Yarip tanga Gedaliya.

¹⁹Yɛn a sira na be tɛ̀ beha mo e gwong, ko yɛn a nɔng tùruk na be nára nɔrɔ̂ wɛ yaga talâ banɛn mɛn.

²⁰Hanani na Zɛbadya yi e ruhûp Imer.

²¹Maaseya, na Eliya, na Shɛmaya, na Yɛhiyɛl tanga Uziya yi e ruhûp Harim.

²²Ɛliyɔyɛnai, na Maaseya, na Ishmayɛl, na Nɛtanɛl, na Yɔzabat tanga Ɛlasa yi e ruhûp Pash-hur.

²³BeLevi: à Yɔzabat, na Shimei, na Kɛlaya de ba to tang ɛ a Kɛlita, na Pɛtahiya, na Yuda tanga Ɛliyɛzɛr.

²⁴Bemât lwɛlɛ: yɛ à Ɛliyaship zɔng. Bemât gyeng ri Gbɔng Duk Re Fongol: à Shalum, na Tɛlɛm tanga Uri.

²⁵Bwang BeIsrayɛl: Ramiya, na Iziya, na Malkiya, na Miyamin, na Ɛlɛyazar, na Malkiya tanga Bɛnaya yi e ruhûp Parɔsh.

²⁶Mataniya, na Zɛkarya, na Yɛhiyɛl, na Abdi, na Yɛrɛmɔt tanga Eliya yi e ruhûp Ɛlam.

²⁷Ɛliyɔyɛnai, na Ɛliyaship, na Mataniya, na Yɛrɛmɔt, na Zabat tanga Aziza yi e ruhûp Zatu.

²⁸Yɛhɔhanan, na Hananiya, na Zabai tanga Atlai yi e ruhûp Bebai.

²⁹Mɛshulam, na Maluk, na Adaya, na Yashup, na Shɛyal tanga Yɛrɛmɔt yi e ruhûp Bani.

³⁰Adna, na Kɛlal, na Bɛnaya, na Maaseya, na Mataniya, na Bɛzalɛl, na Binuwi tanga Manase yi e ruhûp Pahat-Mowap.

³¹Ɛliyɛzɛr, na Ishiya, na Malkiya, na Shɛmaya, na Simɛyɔn, na Bɛnyamin, na Maluk tanga Shemariya yi e ruhûp Harim.

³³Matɛnai, na Matata, na Zabat, na Ɛlifɛlɛt, na Yɛrɛmai, na Manase tanga Shimei yi e ruhûp Hashum.

³⁴Maadai, na Amram, na Uyɛl, na Bɛnaya, na Bɛdɛya, na Kɛluhi, na Vaniya, na Mɛrɛmɔt, na Ɛliyaship, na Mataniya, na Matɛnai tanga Yaasu yi e ruhûp Bani.

³⁸Shimei, na Shɛlɛmiya, na Natan, na Adaya, na Maknadebai, na Shashai, na Sharai, na Azarɛl, na Shɛlɛmiya, na Shemariya, na Shalum, na Amariya tanga Yɔsɛf yi e ruhûp Binuwi.

⁴³Yɛyɛl, na Matitiya, na Zabat, na Zɛbina, na Yadai, na Yɔwɛl tanga Bɛnaya yi e ruhûp Nebo.

⁴⁴Mwa bemat vemo mo ba vɔk behâ yére dyuk. Yɛn a gas weneng na yɛn, ko ba tɛ̀ ɛn na nèy mɛn e gwong.