Read berom Ɛzra 3 Bible Online

Ɛzra 3 - berom bible

Ɛzra 3

¹Jeng de ba wul pwɛl gwô netaama, BeIsrayɛl ba ga kana sangal e bapomo mɛn, ko yɛn a hwo tula hɛn mwa e Yɛrusalɛm.

²Ko Yɛshuwa Yɛhɔzadak na besâ fwom mɛ bepiris, na Zɛrubabɛl Shɛyaltiyɛl tanga cáng mɛ ba to lɔk gàgbang rangâs yas vɔk na Dagwi wo BeIsrayɛl, yaga na be bin to hwo nása ɛ nɔrɔ̂ yas de be rangas e ra hɛ, tyɛng na pyɛ de ba jɛk e ji Bwok-basa Badu Mose, mwât Dagwi.

³Mwa ano de yɛn a wokos bengyip bemat de ba ga vey sangal e vwel o, yɛn a to lɔk gàgbang rangâs yas o e kwɔn de wá kana sè ɛ raane. Ko yɛn a to hwo nása a Dagwi nɔrɔ hê nagasi tanga hê nahywegelek e ra kwɔn o kahɛ tuk.

⁴E bama mo, yɛn a ra Nzem Bǔk, sede remo de ba kana jɛk e ji Bwok-basa Badu. E kahɛ tuk e ji nepɔlɔ netaama yɛn a nása nenɔrɔ tyɛng na nepyak de ba tɛ̀ a yɛn ɛ.

⁵E ngamo nuyel, yɛn a nása nenɔrɔ̂ yas de be rangas burang kahɛ tuk, nagasi na nahywegelek, na nemo de be nása e Pwɛl Pwas, tanga ne kayɛ jeng de yɛn a man na be re a Dagwi Darwey fongol, tanga mwa nenɔrɔ̂ yey pyɛng de bemat ba vey mɛ na be nára a Dagwi Darwey nɛ.

⁶Yɛn a hwo nása a Dagwi Darwey nenɔrɔ̂ rangas e tuk hê susu mo hê pwɛl gwô netaama, mwa ano de ba ga kana to bomo retîs duk rê fongol wɛt.

⁷Ko yɛn a nɔng dyām, na be tala mɛ bemât lɔk na beta tanga bemât tsêp cɔ́gɔt. Yɛn a to nɔng pyɛ̂ re, na pyɛ̂ sɔ tanga něy pwat, na be tomo a bemât bapomô Tur na Sidɔn e tô babîm cɔ́gɔt sida yê Lɛbanɔn. Ba rɔda manas babîm cɔ́gɔt o, ko be tɛ̀ vɛ e ra gworep vey e Yafo. Ba ra pyɛ́ yemo mwa na simô Sairus, Da vwel Pɛrsya.

⁸E pwɛl gwô neba gwô shey hê neba de yɛn a toyo vey e Yɛrusalɛm e barîn Gbɔng Duk Re Fongol, yɛn a hwo fwôm lɔ̂k duk o. Zɛrubabɛl na Yɛshuwa tanga besâ fwom mɛn bepiris, na BeLevi tanga mwa bemat de ba ga toyo yi e de sesam ba tɛ̀ vɔ e de fwom o. Ba tɛ̀ BeLevi de ba wul neshey kuru baba vɔk e rak o be sè bemât bɛrɛng lɔk o.

⁹Yɛshuwa na nèy mɛ na cáng mɛ, Kadmiyɛl na nèy mɛ e lɔ mɛn hê Hɔdaviya ba wuna hɛn mwa e de bɛrɛng fwôm lɔ̂k Gbɔng Duk o, ko BeLevi vê lɔ Hɛnadat ba sɛlɛ hɛn mɛ.

¹⁰Jeng de bemat o ba bomo retîs Gbɔng Duk Re Fongol o, ko bepiris de ba tɛ̀ yɔ̀m fwom mɛn, ba tumal na bezing mɛn e vɔ, ko BeLevi vê ruhûp Asaf ba tumal bagat na yɛn na bapêy lwɛlɛ mɛn e vɔ arɔng. Yɛn a somo Dagwi Darwey na pyɛ́ mo e begwong de ba misang yimo yi e jeng Gbɔng Gwɔ̀m Davit.

¹¹Ba ra lɛlɛ̂ somô Dagwi Darwey, ba raa ba tòros na batîn ha vemo: “Dagwi Darwey e dura a wot nerat, tɛ̂ yey mɛ na BeIsrayɛl he tala hɛ wɛt!” Bemat mwa ba tē ngyat e de somô Dagwi Darwey, yaga ba ga bomo retîs Gbɔng Duk Re Fongol o.

¹²Pyak e ji bepiris na BeLevi tanga bedanelɔ rùhup, yɛn vemo de neshey mɛn na ga vey vɛ̀t, bá kana di Gbɔng Duk Re Fongol wo mɛsɛng o. Jeng de yɛn a sé bɛrɛng tɛ̂ retis o remo, yɛn a hwo tosho, ba dak sekun. Ko behak pyak de ba sé e hwomo ba gbɔ na yey pyɛng arɔng.

¹³Ba tɔk gas gbɔ̂ yey pyɛng na hê sesin wɛt, yaga remok o rá sè ding-ding, ko bá wokos rɛ yikyik.