Read berom Ɛzra 4 Bible Online

Ɛzra 4 - berom bible

Ɛzra 4

¹Bemât repugû BeYuda na BeBɛnyamin, yɛn bemat Samariya, ba wok, bemat vemo de ba ga toyo yi e de sesam, ba ga to hwo lɔk Gbɔng Duk Re Fongol wo Dagwi Darwey, Dagwi wo BeIsrayɛl.

²Yɛn a vey, na be di Zɛrubabɛl tanga bedanelɔ rùhup, ko yɛn a yang ɛn, “Tik wot wuna to na yin e de lɔ̂k Gbɔng Duk Re Fongol o. Wot e re a Dagwi gwining na yin fongol, ko wot á kana hwo nása a yɛ nenɔrɔ̂ yas de be rangas yimo jeng de Ɛsa-Hadɔn, Da vwel Asirya, á tomo hot vey sangal e ngamo.”

³Ko Zɛrubabɛl na Yɛshuwa tanga bwang bedanelɔ rùhup o ba toyo a yɛn, ba yang ɛn, “Wey, wot e simo sɛlɛ min e de lɔk a Dagwi Darwey, Dagwi mot, Gbɔng Duk Re Fongol wɛt. Wot ê lɔk wɛ pyɛ mot, sede remo de Sairus, Da vwel Pɛrsya, a nɔng ot nu.”

⁴Yi e jeng yane, bemat de ba sé sangal e vwel o ba hwo jama begwong de bê tɛ̀ a BeYuda mo negbɛrɛk, ko ba tɛ̀ a yɛn bengyip, na dul ɛn nà re nuyel na lɔk o.

⁵Ko yɛn a nɔ̂ng bemât fwôm gwɔmnati Pɛrsya dyām, na be dul mɛ fwom o. Yɛn a sǎ e de ra ano e neyɛnɛ̂ jeng negwɔm Sairus, Da Vwel o, pere vɔk e jeng de Dariyus a tut e ra gwofwa negwɔm o.

⁶E pɛrɛ̂ rê negwɔm Da Vwel Ahasɛrus, bemât repugu mo ba jɛk bwok-rwang, na be tɛ̀ mɛ sekûn bemat de ba sangal e vwêl Yuda na e Yɛrusalɛm.

⁷Ano arɔng, e jeng negwɔm Da Vwel Artasɛrsɛs, Bishlam, na Mitredat, na Tabeel tanga besâ fwom mɛn ba jɛk a Da Vwel o bwok-rwang arɔng. Ba jɛk gwɛ e lêm BeAram, ko ba doyo gwɛ e lêm BePɛrsya gyam na be de basa a Da Vwel o.

⁸Rehum, gwɔmna, tanga Shimshai, mwat-jɛ̂k bàk vwêl Yuda, ba jɛk bwok-rwang vɔk na Da Vwel Artasɛrsɛs e ra repomô Yɛrusalɛm. Ba jɛk gwɛ ngan:

⁹“Bwok-rwang gwomo gwa yi e vwɔ̂ Rehum, gwɔmna bàk vwêl Yuda, na Shimshai, mwat-jɛk, tanga besâ fwôm bàk vwel o, bemât shɔt tanga mwa bwang bemât fwôm gwɔmnati vemo de raane bá yi e bapomô Ɛrɛk, na Babilɔn na Susu e vwêl Ɛlam,

¹⁰mwa tanga bwang bemat de Da Vwel Ashurbanipal de á vɔk nerey na reto sizɔng á hashe hɛn yi e nelɔ mɛn, na a ba tɛ̀ ɛn be sangal e repomô Samariya, na e bwang bavwel de ba sé e bàk Rwa Ta Wo Gwɔrɔt Ɛifaratɛs.”

¹¹Pyɛ de ba jɛk e bwok-rwang o á yemo: “Vɔk na Da Vwel Artasɛrsɛs. Yi e vwɔ̂ bemât fwom mō, bemât bavwêl bak Rwa Ta Wo Gwɔrɔt Ɛifaratɛs. Neken mo ne ros!

¹²“À Da Vwel, wot e simo hwo tɔk, BeIsrayɛl de ba vey e ngamo yi e bwang bavwel mō bahak ba sé sangal e ngamo e Yɛrusalɛm. Yɛn a ga to hwo lɔ̂k gbɔng repomo reves rê sogô nehywɛ remo. Yɛn a ga yong retîs jwâ rɛ, ko yɛn a ga to hwo lɔk wɛ.

¹³À Da Vwel, ka sede ba to lɔk gbɔng repomo remo, na be to yɛnɛ lɔ̂k jwâ rɛ arɔng, ko bemat o bê tik talsâ dyâm vwel na dyâm yeles na pyɛ́. Yi ano, dyâm Da Vwel yê tɛt ɛ.

¹⁴Ko di, wot a ga sira na wot a raa hwo, wot e simo wot di de yɛn e byɛs o wɛt. Yaga ano, wot a sé vo redu wɔgɔ,

¹⁵hwo tɛ̀ be ngyɛgɛt e ji bebok-basa de beda mō bá jɛkɛs ɛ pyɛ̂ bare, ko bá tik vɛ naka. Ka sede hwà ra ano, ko hwà rɔda di wɔgɔ, bemât repomo remo be dopse sogso nehywɛ. Bemat o ba dopse nɔngɔ̂s begbɔng begwɔ̀m mwa na begwɔmna rezot. Yimo raane, á sè gbang na be re negwɔm e ra bemat o. Pyɛ ma yane de ya tɛ̀, bá wey na repomo mo.

¹⁶Yaga ano, à Da Vwel, wot e simo wot ha a hwo wɔgɔ, ka sede ba to lɔk repomo remo mo, na be to yɛnɛ lɔ̂k jwâ rɛ, e ngamo nuyel hwô kyɛm hwo vɔk reto e ra bàk vwêl Rwa Ta Wo Gwɔrɔt Ɛifaratɛs wɛt.”

¹⁷Da Vwel a tomo na toyo hemo: “Vɔk na Rehum, gwɔmna, na Shimshai mwat-jɛ̂k bàk vwel, tanga besâ fwom mɛn de ba sé na sangal e Samariya na e bwang vwêl bàk Rwa Ta Wo Gwɔrɔt Ɛifaratɛs. Me tang in show pyak.

¹⁸“Bwok-rwang de yin a tomo, ba ga doyo gwɛ e lem hom, ko ba ga basa a me gwɛ.

¹⁹Ma nɔng nu, na be ngyɛgɛt a me ha mo, ko ba ga sɛ̀ mwin wɔgɔ, yimo raane, bemât repomô Yɛrusalɛm ba ga sǎ e de sogsô nehywɛ e ra badu de begbɔng begwɔ̀m ba nɔngɔs. Ko repomo mo ra sila na bemât sogsô nehywɛ na vê jamâ cɛk.

²⁰Begbɔng begwɔ̀m bà kana sè de bà vɔk reto pyak, bà ga re negwɔm e mwa bàk vwêl Rwa Ta Wo Gwɔrɔt Ɛifaratɛs, ko bà ga seres dyâm vwel na dyâm yeles na pyɛ́.

²¹Yaga ano, nɔng in bemat vane mo nu, na be tik lɔ̂k repomo mo, sɛ̌ ma to gwɛ̌ nɔng nu e ra fwom o.

²²Ra in ano ziri. Pyɛ cak ye to gwɛ̌ lashe nerât negwɔm hom e hwomo wɛt.”

²³Ras de ba basa a Rehum, na Shimshai na besâ fwom mɛn bwok-rwang Da Vwel o, yɛn a vɛ̌ nára hɛn dey-dey vɔk e Yɛrusalɛm, ko ba wɔ̀ tɛ̀ BeYuda mo na retek be tik fwôm lɔk o.

²⁴Ba ga kana tumal na fwôm lɔ̂k Gbɔng Duk Re Fongol arɔng, ko gwa ga nàra diring sɛ̌ shey he neba hê negwɔm Da Vwel Dariyus wo Pɛrsya.