Read berom Ɛzra 5 Bible Online

Ɛzra 5 - berom bible

Ɛzra 5

¹E jeng yane, Hagai na Zɛkarya Ido, bezarap Dagwi, ba hwo kyě ha e rezâ Dagwi wo Israyɛl vɔk na BeYuda de ba sangal e vwêl Yuda na e Yɛrusalɛm.

²Sede Zɛrubabɛl Shɛyaltiyɛl na Yɛshuwa Yɔzadɔk ba wok neha mo, ko yɛn a to hwo lɔ̂k Gbɔng Duk Re Fongol e Yɛrusalɛm o. Ko bezarap o yɛn beba mo ba sɛlɛ hɛn yi na neha mɛn o.

³Jeng de Tatɛnai, gwɔmna bàk vwêl Rwa Ta Wo Gwɔrɔt Ɛifaratɛs, na Shetar-Bozenai tanga besâ fwom mɛn ba wok ano, remo-remo yɛn a vey e Yɛrusalɛm, ko ba hwo ɛn, ba yang ɛn, “E wa de a nɔng in nu, na yin a to lɔk Gbɔng Duk Re Fongol womo, na yin tɛ̀ pyɛ́ e ji wɛ arɛt?”

⁴Yɛn a to rangal bazâ bemat mwa de ba sɛlɛ e de lɔ̂k Gbɔng Duk o.

⁵Ko Dagwi á sè gyeng bemât nuyêl BeYuda mo. Yaga ano, bemât fwôm Pɛrsya mo ba di a sé naka na be ra pyɛ cak wɛt, sɛ̌ ba jɛk a Da Vwel Dariyus, na be wok pyɛ de ê toyo a yɛn mɛ e ngyen.

⁶Neha de Taknai na Shetar-Bozenai tanga besa fwom mɛn ba tomo a Da Vwel e bwok-rwang a nemo:

⁷Vɔk na Da Vwel Dariyus, neken mō ne ros!

⁸À Da Vwel, wot a sé há a hwo, wot á yi e bak vwêl Yuda, ko wot á sɛ̀, ba to sé lɔk Gbɔng Duk Re Fongol wo Dagwi de a dal na nerey, na beta berey o, ko ba kyɛ̀sɛ ɛ besesêk cɔ́gɔt e varâ duk o arɔng. Ba sé ra fwom o na nerat tyɔng wɛt, ko gwa sé re nuyel naka.

⁹Wot a yâng bemât nuyêl fwom o, be ha a wot mwat de a nɔng ɛn reto, na be to hwo lɔ̂k Gbɔng Duk o, na be to tɛ̀ pyɛ́ e ji wɛ.

¹⁰Wot a to rangal hɛn baza mɛn, yaga na wot a bin ha a hwo bemât nuyêl fwom o.

¹¹Yɛn ba toyo a wot, ba ye, “Wot a sé bemât fwôm Dagwi wo lagwi na jey, ko wot a to sé lɔk Gbɔng Duk Re Fongol womo de gbɔng gwɔ̀m BeIsrayɛl de a vɔk reto sizɔng á kana lɔk wɛ, ko á tɛ̀ pyɛ́ e ji wɛ neshey pyak de na kwey.

¹²Ko yaga bedabeda mot bá ragas pyɛ́ de ya tɛ̀, Dagwi wo lagwi a vo shom, a tik Gbɔng Gwɔ̀m Nɛbukadnɛzar wo Babilɔn wo lɔ̂ negwɔm BeBabilɔn a re ɛn na como. A tɛ̀ ba wey na Gbɔng Duk o, ko ba hashe bemat o vɔk e de sesam e vwêl Babilɔn.

¹³Ko jeng de Sairus a tɛ́ ɛ Da vwel Babilɔn, e ji shey hê mɛsɛng o, yɛ a nɔng nu, na be to lɔk Gbɔng Duk Re Fongol o.

¹⁴A to toyo na pyɛ̂ fwom de ba yong na dyam shinang na dyam pyɛng yemo de Nɛbukadnɛzar á kana hashe yi e Gbɔng Duk o e Yɛrusalɛm, na a wɔ̀ tik yɛ e ji gbɔng duk re a dagwi mɛ fongol e Babilɔn. Da Vwel Sairus á nɔng pyɛ́ mo e vwɔ̂ Shɛsbazar womo de a tɛ̀ ɛ, a sè gwɔmna bak vwêl Yuda.

¹⁵Da Vwel o á yang ɛ, a jut yɛ̄, na a toyo na yɛ̄ e ji Gbɔng Duk Re Fongol e Yɛrusalɛm, e bama de yɛn a ga to lɔk wɛ e kwɔn de wá kana sè ɛ raane.

¹⁶Ano kwong, Shɛshbazar a vey, a ba bomo retîs o ko ba vɛ̌ hwo lɔ̂k wɛ yimo yi e jeng yane mo pere vey e remo. Ko ba ga ka yɛnɛ lɔk o e ngyen wɛt.”

¹⁷Yaga ano, à Da Vwel, ka sede hwà di a jam ano, ko hwo tɛ̀ be ngyɛgɛt e ji bebok-basâ pyɛ̂ bare yê Beda vwel e Babilɔn, na be di kɛ Da Vwel Sairus á kana nɔng nu, na be to lɔk Gbɔng Duk Re Fongol e Yɛrusalɛm o kɛ wey arɛt? E bama mo, hwo de ha a wot pyɛ de hwà di ya jam, na be ra e ra ha mo.