Read berom Ɛzra 7 Bible Online

Ɛzra 7 - berom bible

Ɛzra 7

¹E bamâ neshey pyak, jeng de Artasɛrsɛs á sè Da vwel Pɛrsya, mwat hwak á sè de ba tang ɛ à Ɛzra. A raa bazâ yére mɛ pere vɔk e Aharon, darwêy bepiris wo mɛsɛng o, ko a sɛ̀ vɛ ngan: Sɛraya Azarya Hilkiya Shalum Zadɔk Ahitup Amariya Azarya Mɛrayɔt Zerahiya Uzi Buki Abishuwa Pinehas na Ɛlɛyazar hwêy Aharon.

⁶Ɛzra a sè gbɔng kaan-tɔ̂k badu de Dagwi Darwey, Dagwi wo Israyɛl, á kana nɔ̂ng Mose. Dagwi Darwey á dura a Ɛzra nerat mɛ. Yaga ano, Da Vwel á nɔng ɛ kayɛ pyɛ de a rangal yɛ. Ko e ji shey hê netaama hê negwɔm Artasɛrsɛs, Ɛzra a hwo sogo yi e vwêl Babilɔn vɔk e repomô Yɛrusalɛm, yɛ tanga regyɛng BeIsrayɛl de ra wuna na bepiris, na BeLevi. Bemat o behak ba sè bemât lwɛlɛ, na bemât gyêng ri, na bemât fwom, mwa hɛn vê Gbɔng Duk Re Fongol.

⁸Yɛn a hala vwêl Babilɔn tuk hê mɛsɛng hê pwɛl gwô mɛsɛng arɔng, ko yi na sɛlɛ̂ Dagwi, yɛn a wɔ̀ wul Yɛrusalɛm tuk hê mɛsɛng hê pwɛl gwô netungun.

¹⁰Ɛzra a ga nɔng to mɛ e de fwôm ngyɛgɛ̂t badu Dagwi Darwey, e de râ pyɛ́ de badu mo ba ha, na e de basa a BeIsrayɛl badu mo tanga begwong de yɛn a rɔda ra pyɛ́ mo mwa.

¹¹Da Vwel Artasɛrsɛs a nɔ̂ng Ɛzra, piris de a to sé kaan-tɔ̂k badu de Dagwi Darwey a nɔ̂ng BeIsrayɛl, bwok-rwang gwomo ngan:

¹²Bwok-rwang yi e vwɔ̂ Gbɔng Gwɔ̀m wo Begbɔng Begwɔ̀m Artasɛrsɛs vɔk na Ɛzra, piris de a to sé kaan-tɔ̂k badu Dagwi wo lagwi. Show pyak.

¹³Ma nɔng nu na kawɛ WoIsrayɛl de a sé e ji neyɛnɛ̂ bavwêl segwɔm hom, mwa tanga bepiris na BeLevi, mwa vemo de be simo be raa hwo vɔk e repomô Yɛrusalɛm, yɛn a tɔk ra ano.

¹⁴Me tanga bemât badu hom betaama, ma sé tomo hwo, na hwo wɔ̀ ngyɛgɛt negwɔn sangal e Yɛrusalɛm na vwêl Yuda, yaga na hwo bin di begwong de bemat o ba sé gyenges badu Dagwi mō, vemo de ba tik vɛ e vɔ mō.

¹⁵Hwà rɔda vɔk ɛ nɔrɔ̂ dyam shinang na dyam pyɛng yemo de me tanga bemât badu hom wot a simo nɔng yaga Dagwi wo Israyɛl, de ba lɔk Gbɔng Duk Re Fongol mɛ e Yɛrusalɛm.

¹⁶Ano arɔng, hwà rɔda vɔk ɛ mwa dyam pyɛng na dyam shinang yemo de hwà rɔda tula e yɛnɛ̂ bàk vwêl Babilɔn mwa tanga nenɔrɔ̂ yey pyɛng de BeIsrayɛl, na bepiris mɛn ba rɔda nɔngɔs yaga Gbɔng Duk wo Dagwi mɛn e Yɛrusalɛm.

¹⁷Hwà rɔda ra fwom na dyām o hywɛ, na hwo seres mɛ bemus, na beturuk, na byôt tyīmit, na pyɛ́ de be simo yaga nenɔrɔ̂ nemuk na ne pyɛ̂ sɔ, ko hwà rɔda nása a Dagwi yɛ e ra gàgbang rangâs yas de ba lɔk e Gbɔng Duk o.

¹⁸Hwô tɔk ra fwom na bwang dyam pyɛng na dyam shinang de ya pɔl yaga kayɛ pyɛ de hwo tanga besâ fwom mō ba di ya sé naka, tyɛng na pyɛ de Dagwi min e simo.

¹⁹Hwà rɔda kyè na mwa pyɛ̂ fwôm lɔ de ba ga nɔng o yɛ yaga râ fwom e jeng rê fongol, na hwo tɛ̀ yɛ e ji Gbɔng Duk wo Dagwi mō e Yɛrusalɛm.

²⁰Ko bwang kayɛ pyɛ de hwo simo yaga Gbɔng Duk o hwô tɔk sɛ̀ yɛ yi e gban Da Vwel.

²¹Me, Da Vwel Artasɛrsɛs, ma sé nɔ̂ng mwa bemât nuyêl gban hom wo bavwêl bak Rwa Ta Wo Gwɔrɔt Ɛifaratɛs nu hemo: Nɔng in Ɛzra, piris de a to sé kaan-tɔ̂k badu Dagwi wo lagwi, kayɛ pyɛ de a rangal hin yɛ dey-dey.

²²Yin nɔng ɛ pyɛ de ya wul nepyak pyɛ́ yemo ngan, tɔ̂n betat na rebit o vê dyam shinang, na tɔ̂n kuru na vɛ betyiimin vê alkama, na neshǐ masa gu baba (2,000) nê nshî anap, na neshǐ masa gu baba (2,000) nê něy pwat, tanga nepyak nevwashe de yɛ a simo.

²³Tē in naka na yin nɔng kayɛ pyɛ de Dagwi wo lagwi a simo yaga Gbɔng Duk Re Fongol mɛ. Rá in naka, na yɛ a sang wok shom na me kɛ na yere hom wɛt.

²⁴Wot a to sé ha a yin: a sé kyiri, na yin seres kayɛ yerê dyâm vwel yi na bepiris, na BeLevi, mwa tanga bemât lwɛlɛ, na bemât gyeng ri, na bemât fwom tanga kawɛ mwat de e ra yerê kagwɛ fwom e Gbɔng Duk Re Fongol wo Dagwi.

²⁵Ko hwo, à Ɛzra, hwà rɔda ra fwom na netsitsɛng de Dagwi mō a nɔng o, na hwo tɛ̀sɛ bemât bɛrɛng netyâng vwel na bemât shɔt. Ba rɔda yɛt a bemat mwa de ba sé e bavwêl bak Rwa Ta Wo Gwɔrɔt Ɛifaratɛs, vemo de ba sé bemât gyeng badu Dagwi mō shɔt. Basa hin a kawɛ mwat de a tɔk badu mo wɛt vɛ.

²⁶Ka sede mwat de a tik nà gyeng badu Dagwi mō, kɛ badu bavwêl segwɔm hom, ko be tabak hɛ dey-dey na cak e ji pyɛ́ yemo, be mɔrɔ hɛ, kɛ be row ɛ na a tɛ́ ɛ sam, kɛ be sey ɛ̀ kayɛ pyɛ de a vɔk, kɛ be tɛ̀ ɛ e ngyang ayi.

²⁷Ɛzra a ye, “Be somo Dagwi Darwey, Dagwi wo bedabeda mot! E yɛ de a tɛ̀ e yêy Da Vwel, na a simo a nɔ̂ng Gbɔng Duk Re Fongol wo Dagwi Darwey e Yɛrusalɛm nerey e yerê gwong gwomo.

²⁸A to tɛ̀ ma ga sɛ̀ nerat e bayîs Da Vwel na bemât badu mɛ tanga mwa bemât nuyel mɛ vemo de ba vɔk reto sizɔng. Ko Dagwi Darwey, Dagwi hom, a ga nɔng me yey ting, ko ma ga tɔk tɛ̀ bedanelɔ rùhup BeIsrayɛl pyak, be toyo vey e sevwêl Yuda tanga me.”