Read berom Ɛzra 8 Bible Online

Ɛzra 8 - berom bible

Ɛzra 8

¹Hemo hɛ à ngyɛrɛ̂ bazâ bedanelɔ rùhup BeYuda de bá kana sè e de sesam e Babilɔn, ko yɛn a toyo na Ɛzra vey e Yɛrusalɛm e jeng de Artasɛrsɛs á sè Da vwel Pɛrsya:

²Gɛrshɔm a sé dalɔ̂ ruhûp Pinehas Danyɛl a sé wo ruhûp Itamar Hatush Shɛkaniya a sé wo ruhûp Davit Zɛkarya a sé wo ruhûp Parɔsh, yɛ na bemat mɛ naga gwining na kuru batungun (150), ko ba jɛk baza mɛn arɔng

⁴Ɛligɛhɔyɛnai Zerahiya a sé wo ruhûp Pahat-Mowap, yɛ na bemat mɛ naga beba viisis (200)

⁵Shɛkaniya Yahaziyɛl a sé wo ruhûp Zatu, yɛ na bemat mɛ naga betat viisis (300)

⁶Ɛbɛt Yɔnatan a sé wo ruhûp Adin, yɛ na bemat mɛ kuru batungun (50)

⁷Yɛshaya Ataliya a sé wo ruhûp Ɛlam, yɛ na bemat mɛ kuru bataama (70)

⁸Zɛbadya Mikayɛl a sé wo ruhûp Shefatiya, yɛ na bemat mɛ kuru rwit (80)

⁹Obadya Yɛhiyɛl a sé wo ruhûp Yowap, yɛ na bemat mɛ naga beba kuru rining na vɛ rwit (218)

¹⁰Shɛlɔmit Yɔsifiya a sé wo ruhûp Bani, yɛ na bemat mɛ naga gwining na kuru batyiimin (160)

¹¹Zɛkarya Bɛbai a sé wo ruhûp Bebai, yɛ na bemat mɛ kuru baba na vɛ rwit (28)

¹²Yohanan Hakatan a sé wo ruhûp Azgat, yɛ na bemat mɛ naga gwining na kuru rining (110)

¹³Ɛlifɛlɛt, na Yɛyiyɛl, tanga Shɛmaya ba sé vê ruhûp Adonikam, yɛn na bemat mɛn kuru batyiimin (60), ko yɛn a toyo e bama mɛn o

¹⁴Utai na Zakur ba sé vê ruhûp Bigvai, yɛn na bemat mɛn kuru bataama (70)

¹⁵Ano kwong, ma tula bemat o mwa e kwɔn hining e hagât gbɔng gwông nshi de ne tele vɔk e pomô Ahava, ko wot a ye ngyɔk e hwomo pɔlɔ tat. Ma sɛ̀ bepiris e ji regyɛng bemat o, ko vit a BeLevi.

¹⁶Ma hwo tomo be yila a me bemât nuyel vemo shabetat, yɛn à Ɛliyɛzɛr, na Ariyɛl, na Shɛmaya, na Ɛlnatan, na Yarip, na Ɛlnatan, na Natan, Zɛkarya na Mɛshulam tanga bemât misâng badu beba, yɛn à Yɔyarip na Ɛlnatan.

¹⁷Ma tomo hɛn na Ido, mwât nuyêl bemat de ba sangal e Kasifiya. Ma tɛ̀ ɛn, be rangal hɛ, yɛ na besâ fwom mɛ, bemât fwôm Gbɔng Duk Re Fongol. Ma yang ɛn yɛn a tomo a wot bemat de bê ra a Dagwi fwom e ji Gbɔng Duk o.

¹⁸Yi na sɛlɛ̂ Dagwi, yɛn a tomo a wot na Shɛrɛbiya, mwât tɔ̂k pyɛ́. A sé yi e ruhûp Mali de a sé yerê Levi Yakɔp, yɛ tanga nèy mɛ na begwa mɛ kuru na vɛ rwit (18).

¹⁹Ano arɔng, yɛn a tomo na Hashabiya na Yɛshaya vê ruhûp Mɛrari, yɛn na cáng mɛn kuru baba (20).

²⁰Yɛn a to vɔk ɛ bemât fwôm Gbɔng Duk Re Fongol naga beba na kuru baba (220). Ba jɛk baza mɛn mwa arɔng. Gbɔng Gwɔ̀m Davit na bemât nuyêl fwom mɛ bá kana tɛ̀ beda mɛn be sɛlɛ BeLevi.

²¹E hwomo e hagât gbɔng gwông nshi gwô Ahava, ma nɔng nu na wot mwa wot tik rê pyɛ́, na wot dyɛng bato mot e nuyêl Dagwi mot, yaga na wot ra won na yɛ, na a kyè e nuyel mot e ji kwɛngɛl o, na a dul ot mwa na nèy mot na pyɛ́ mot arɔng.

²²A yâng sè a me rekyen, na me rangâl Da Vwel, na a nɔng ot regyɛng bemât comô bedwa, na be gyeng ot yi e vê repugu mot e jeng kwɛngɛl o. Yaga wot a ga kana ha a yɛ wɔgɔ, Dagwi mot e gyep kawɛ mwat de e tɛ̀ gap mɛ e ra yɛ, ko shom mɛ ye hwo e ra kawɛ mwat de e doyo a yɛ ma, ko e tabak hɛ arɔng.

²³Yaga ano, wot a tik rê pyɛ́, ko wot a ra won yaga na Dagwi mot a gyeng ot e begwong, ko a wok won mot o.

²⁴E bama mo, ma kasa bemat kuru na vɛ beba yi e ji vê nuyêl bepiris, mwa na Shɛrɛbiya na Hashabiya tanga besâ fwom mɛn behak kuru.

²⁵E bayis mɛn, ma hwo masa nedirîk dyam pyɛng na dyam shinang tanga pyɛ̂ fwôm lɔ, yemo de Da Vwel, na bemât badu mɛ, na begbɔng bemât fwom mɛ tanga BeIsrayɛl ba ga kana nɔng me, yaga na be ra mɛ fwom e Gbɔng Duk Re Fongol.

²⁶Ko ma nɔng ɛn yɛ: Dyam pyɛng ya sé tɔ̂n kuru baba na vɛ beba (22), pyɛ̂ fwôm lɔ naga (100) yê dyam pyɛng de ya sé kilo kuru bataama (70), dyam shinang ya sé tɔ̂n betat na rebit o,

²⁷neshǐ dyam shinang kuru baba (20) de na sé kilo rwit, neshǐ pama nerat sizɔng neba de dyâm nɛ ya sé tyɛng na yê ne dyam shinang.

²⁸Ma hwo yang ɛn, “Sede remo de ba tik in jaram yaga Dagwi Darwey, ano arɔng, ba tik pyɛ̂ fwôm lɔ jaram. Ko dyam pyɛng na dyam shinang yemo ya sé nɔrɔ̂ yey pyɛng de ba nɔ̂ng Dagwî bedabeda min.

²⁹Gyeng in yɛ naka, na yin wɔ̀ wul mɛ Gbɔng Duk Re Fongol e Yɛrusalɛm tyang. Sede yin a wɔ̀ wul, ko yin wɔ́ na yɛ e duk hagât wo Gbɔng Duk o. E hwomo yin to masa nedirîk yɛ e bayîs bemât nuyêl bepiris, na vê BeLevi tanga vê BeIsrayɛl na yin de nára yɛ e vɔ mɛn.”

³⁰Ano kwong, bepiris na BeLevi mo ba jut nedirîk vɔ̂k dyam pyɛng na dyam shinang tanga pyɛ̂ fwôm lɔ mo mwa yɛ, na be kyè mɛ vɔk e Gbɔng Duk Re Fongôl Dagwi mot e Yɛrusalɛm.

³¹A sè e tuk hê kuru na hɛ ba hê pwɛl gwô mɛsɛng de wot a hala gbɔng gwông nshi gwô Ahava, na wot kyè vɔk e Yɛrusalɛm. Dagwi mot a sè tanga wot, a gyep ot yi e vê repugu de bê ba hwo e ra wot gobok na jugu e ji kwɛngɛl mot o.

³²Jeng de wot a wul Yɛrusalɛm, ko wot a pɔnglɔ pɔlɔ tat.

³³E tuk hê naas kwong, wot a wɔ́ e Gbɔng Duk Re Fongôl Dagwi mot. Wot a masa nedirîk dyam pyɛng na dyam shinang, na pyɛ̂ fwôm lɔ mo, ko wot a nára yɛ e vwɔ̂ Mɛrɛmɔt Uriya, piris. Yɛ á sè tanga Ɛlɛyazar Pinehas na BeLevi beba, yɛn a Yɔzabat Yɛshuwa na Nɔwadya Binuwi.

³⁴Ba basa nepyak pyɛ́ mo mwa, ba masa nedirik o, ko ba raa be jɛkɛs yɛ e ji bwok-basa.

³⁵E bama mo, mwa bemat de ba ga toyo yi e de sesam ba hwo vɛ̀sɛ na nɔrɔ̂ yas de bê rangas a Dagwi wo Israyɛl. Yɛn a nára nenɔrɔ yas burang ne bemus kuru na vɛ beba (12) yaga BeIsrayɛl mwa, na beturuk kuru shabatat na vɛ betyiimin (96) tanga byôt tyīmit kuru bataama na yɛ tyaama (77). Yɛn a to nára begam kuru na vɛ beba yaga nenɔrɔ̂ fûng banɛn. Yas yemo mwa ba nára yɛ nɔrɔ̂ rangas vɔk na Dagwi Darwey.

³⁶Ko yɛn a jut bwok-rwang gwomo de Da Vwel a ga nɔng ɛn, ko ba wɔ nɔ̂ng begelê Da Vwel o tanga begwɔmna vê bàk vwel Rwa Ta Wo Gwɔrɔt Ɛifaratɛs wɛ. Yɛn kwong ba sɛlɛ BeIsrayɛl, ko ba sɛlɛ na fwôm Gbɔng Duk Re Fongol arɔng.