Read berom Ɛzra 9 Bible Online

Ɛzra 9 - berom bible

Ɛzra 9

¹Bama de ba ga yɛnɛ râ pyɛ́ yemo mwa, behak e ji bemât nuyêl BeIsrayɛl ba vey, ko ba ha a me wɔgɔ, bemat o, na bepiris tanga BeLevi, ba ga gas ɛn yi e bwâng bemat de ba sé sangal e vwel o wɛt. Yɛn a sé raa negwɔn neves sizɔng ne BeKanaan, na BeHiti, na BePɛrizi, na BeYebus, na BeAmɔn, na BeMowap, na BeMisra tanga BeAmɔr arɔng.

²Berâs BeYuda ba ragas weneng na behâ yére mo, yi ano bemât Dagwi vê jɛrɛ ba ga suk ɛn na bemât yére dyuk. Ko a sé e bemât nuyel tanga bemât nuyêl fwom de ba dal mɛ na râ renɛn o.

³Ras de ma wok ano, ma hama berugu hom, ma luyu setôt rato hom na sê negyɛk hom, ko ma sangal e vwel, a yang me dɛ̄ɛm.

⁴Ma saa e hwomo dɛ̄ɛm, sɛ̌ jeng de be nára nɔrɔ̂ nahywegelek. Ko bemat ba hwo tula hɛn e ra me, yɛn vemo de ba tɛ̀ bengyip yaga pyɛ de Dagwi wo Israyɛl a ga kana ha e ra banɛn de bemat de ba ga toyo yi e de sesam ba ragas.

⁵Sede jeng narâ nɔrɔ he nahywegelek ya pom, ma sogo yi e kwɔn de má gà sè sangal ɛ e de lashê yey. Ma sè rɔngɔl na cɛ̂k rugu e bek hom, ko ma hwo ye guduruk na me ra won, ma nára vɔ hom e gwi vɔk na Dagwi Darwey, Dagwi hom.

⁶Ma ye, “À Dagwi hom, a sé a me rekyen sizɔng, na me yâng rato hom ganga e rak o vey na hwo. Banɛn mot ba sé pyak, ba ga ye ship à hot, ba ras sede bê wɔ̀ wul lagwi.

⁷Yimo yi e jeng bedabeda mot vey e remo, wot bemat mō wot a sê bûm ragas a hwo banɛn sizɔng. A sé yaga banɛn mot o de wot, na begwɔ̀m mot na bepiris mot ba gabsa e vɔ begwɔ̀m yére dyuk. Ba mɔbɔs hot, ba hashe pyɛ́ mot, ko ba to hashe hot, ba kyè mɛ sede bemât ngyang, ko wot a vo rekyen vit à yere mo. Ba teshe na wot ano yimo yi e raane pere vey e jeng yemo.

⁸Ko di, à Dagwi Darwey, Dagwi mot, hwà ga dura a wot nerat mō kejeng tyɔng, hwà ga tɛ̀ behak mot be hywit ɛn yi e de sesam, na wot ba sangal e ji netyang e kwɔn mō hê jɛrɛ hemo. E gwong gwomo, hwà ga tɛ̀ bayis mot be sè wɛng-wɛng, hwà ga to turu hot arɔng e ji sesam mot.

⁹Ey, à Dagwi hom, wot á kana sè besam, ko hwà tik ot e ji sɛ wɛt. Hwà tɛ̀, wot sɛ̀ nerat e bayîs Beda vwel Pɛrsya, ko yɛn a simo a wot, wot re nuyel na sangal e ngamo, na wot to lɔk Gbɔng Duk Re Fongol mō womo de wa ga kana gabsa, wo tɛ́ ɛ barin. Hwà ga tik ot, na wot to sɛ̀ sangâl netyang e ngamo e vwêl Yuda na e Yɛrusalɛm arɔng.

¹⁰“A remo, à Dagwi mot, wot ê ye ala e ra pyɛ́ yemo mwa de ya ga té arɛt? Wot a ga to kyɛ́ ot nà gyeng badu

¹¹de hwà nɔng ot yi na bemat mō, bezarap de be yís na ha yi na hwo. Yɛn á kana ha a wot wɔgɔ, vwel de wot a rɔda wɔ̀ re hɛ ha sé ligis, yaga bemat de bá sè sangal e ji hɛ ba ga pɔrɔk kawɛ bàk hɛ na neves ding-ding yi na tomong mɛn de ba sé kyèlem.

¹²Yɛn a to ha a wot wɔgɔ, ka sede wot e simo wot wok netâ vwel o, na wot ba tik a yére mot hɛ gbak-gbak, ko wot sang wuna hot e weneng na yɛn, kɛ wot sɛlɛ hɛn e gwong hwak de gwô tɛ̀ ɛn be sangal shɛrɛk, na be sɛ̀ nedanerey wɛt.

¹³À Dagwi mot, a sé yaga tomong mot ves o na gbɔng banɛn mot de rezot remo ra hwo e ra wot. Ko mwa ano, hwà ga ka tabak hot na tabak de ha vey nevês pyɛ́ de wot a ga ra mo wɛt, ko hwà ga to tik ot wot bwang o gwomo, na wot nàra beken.

¹⁴Yi e rɛ̌ kwong de wot ê to kyɛ́ ot nà to gyeng badu mō, na wot hwo ragas weneng na bemat beves vane arɛt? Ka sede wot a to ra ano, shom mō yê tē puu e ra wot, ko hwô wey na wot hywiri, hwô tik hwak e ji mot a hywit ɛ wɛt.

¹⁵À Dagwi Darwey, Dagwi wo Israyɛl, hwó ra pyɛ de ya sé cik, ko mwa ano, hwà ga tik bwang mot, na wot nàra beken. Wot a sé e nuyel mō na buru mot, ko wot a vɔk gwong hwak de wot ê dal wɛt.”