Read berom Nɛhɛmiya 1 Bible Online

Nɛhɛmiya 1 - berom bible

Nɛhɛmiya 1

¹Neha e ra pyɛ́ de Nɛhɛmiya Hakaliya a ra a nemo: A sè e ji pwɛ̂l Kislef,[1] e ji shey hê kuru baba de Artasɛrsɛs á sè Da vwel Pɛrsya, de me Nɛhɛmiya ma sè e lɔ Da Vwel o e ji gbɔng repomô Shushan.

²Hanani, hwak e ji begwa hom á vey yi e sevwêl Yuda, yɛ tanga bemat o behak. Ma hwo rangal hɛn rehâ gbɔng repomô Yɛrusalɛm tanga rê bemat mot BeYuda de ba ga to ɛn yi e de sesam.

³Yɛn a yang me, bemat vemo de ba dal e de sesam, ko ba ga toyo vey e sevwêl Yuda ba sé e ji gbɔng reyɔm, ko yére dyuk de ya gwɔrɔ hɛn yé byɛs ɛn arɔng. Yɛn a to ha a me wɔgɔ, jwâ-pomô Yɛrusalɛm wa rɔngɔl e gabsa, ko ba ga ka to yong ri rùhup pomo mo wɛt yimo de kya há kana re vɛ.

⁴Bama de ma wok pyɛ́ yemo mwa, ma vɛ̌ sangal, ko ma hwo tosho. Ma ra sesin nepɔlɔ pyak sana re pyɛ́, ko ma ra a Dagwi won ma ye,

⁵“À Dagwi Darwey, Dagwi wo lagwi! Hwà sé Dagwi wo nerey, wot e wok bengyip mō. Hwó gyeng wuna-na-sira mō na yey mō mwa na vemo de ba tɛ̀ yey na hwo, ko be gyeng badu mō.

⁶À Dagwi Darwey, bɛrɛng me, wet betong mō na hwo wok won de me ra nagwi na nabwalak yaga bemat mō BeIsrayɛl. Ma sé kulu banɛn de wot BeIsrayɛl wot a ga ra. Me na bedabeda hom wot a ga ra banɛn arɔng.

⁷Wot a ga ra pyɛ́ de ya sé a hwo vyes, ko wot a ga ra yemo de hwà nɔng ot nu e ra yɛ wɛt. Wot a ga gyeng Badu de hwà nɔng ot yi na Mose, mwat mō wɛt.

⁸Ko bare na pyɛ de hwà kana ha a Mose wɔgɔ, ka sede wot BeIsrayɛl wot a raa hwo na yey mot wɛt, ko hwà rɔda shara hot e ji yére detidetu.

⁹Ko ka sede wot a toyo vey na hwo, na wot gyeng badu de hwà nɔng ot nu, mwa ano de hwà ga kana shara hot vɔk e neyɛnɛ̂ jey mwa, hwà rɔda tula hot, na hwo toyo na wot vɔk e kwɔn de hwà kana kasa, na be re a hwo ɛ fongol.

¹⁰“Di wot a sé bemât fwom mō, wot a to sé bemat mō vemo de hwà ga viri hɛn na gbɔng reto na vwɔ̂ gap mō.

¹¹Áaa, à Darwey, wok won hom, tanga hê mwa bwang bemat mō, vemo de be simo be nɔng o nerey. Nɔng me wɛng yunung, ko hwo tɛ̀ Da Vwel a dura a me nerat me.” E jeng yane, má sè mwât nɔngɔ̂s Da Vwel nshî sɔ.