Read berom Nɛhɛmiya 12 Bible Online

Nɛhɛmiya 12 - berom bible

Nɛhɛmiya 12

¹Bazâ bepiris tanga BeLevi de ba toyo yi e de sesam tanga Zɛrubabɛl Shɛyaltiyɛl na Yɛshuwa, darwêy bepiris, à vemo de ba ngyɛrɛ vɛ e ngamo: Bepiris: Sɛraya, na Yirmiya na Ɛzra;

²Amariya, na Maluk na Hatush;

³Shɛkaniya, na Rehum na Mɛrɛmɔt;

⁴Ido, na Ginɛtɔn[6] na Abiya;

⁵Miyamin, na Maadya na Bilga;

⁶Shɛmaya, na Yoyarip na Yɛdaya;

⁷Salu, na Amɔk, na Hilkiya tanga Yɛdaya. Yɛn bemat vemo vɛ de ba sé bemât nuyêl bepiris e jeng Yɛshuwa.

⁸BeLevi: Yɛshuwa, na Binuwi, na Kadmiyɛl, na Shɛrɛbiya, na Yuda tanga Mataniya, yɛn vɛ de ba vɔk nedirîk râ lɛlɛ̂ feng a Dagwi.

⁹Ko Bakbukiya, na Uni na bwâng bemɛn behak ba toysa a bemɛn vere na lɛlɛ de yɛn a hashe vɛ.

¹⁰Yɛshuwa a sé dâ Yɔyakim, Yɔyakim a sé dâ Ɛliyaship, Ɛliyaship a sé dâ Yɔyada;

¹¹Yɔyada a sé dâ Yɔnatan, ko Yɔnatan arɔng a sé dâ Yaduwa.

¹²Jeng de Yɔyakim á sè darwêy bepiris, ko bepiris vemo bá sè bedanelɔ rùhup mɛn: Mɛraya a sé dalɔ̂ ruhûp Sɛraya, Hananiya a sé dalɔ̂ ruhûp Yirmiya,

¹³Mɛshulam a sé dalɔ̂ ruhûp Ɛzra, Yɛhɔhanan a sé dalɔ̂ ruhûp Amariya,

¹⁴Yɔnatan a sé dalɔ̂ ruhûp Mɛliku, Yɔsɛf a sé dalɔ̂ ruhûp Shɛbaniya,

¹⁵Adna a sé dalɔ̂ ruhûp Harim, Helkai a sé dalɔ̂ ruhûp Merayɔt,

¹⁶Zɛkarya a sé dalɔ̂ ruhûp Ido, Mɛshulam a sé dalɔ̂ ruhûp Ginɛtɔn,

¹⁷Zikri a sé dalɔ̂ ruhûp Abiya na Miniyamin, Piltai a sé dalɔ̂ ruhûp Mowadiya,

¹⁸Shamuwa a sé dalɔ̂ ruhûp Bilga, Yɛhɔnatan a sé dalɔ̂ ruhûp Shɛmaya,

¹⁹Matɛnai a sé dalɔ̂ ruhûp Yoyarip, Uzi a sé dalɔ̂ ruhûp Yɛdaya,

²⁰Kalai a sé dalɔ̂ ruhûp Satai, Ɛbɛr a sé dalɔ̂ ruhûp Amɔk,

²¹Hashabiya a sé dalɔ̂ ruhûp Hilkiya, ko Nɛtanɛl a sé dalɔ̂ ruhûp Yɛdaya.

²²E jeng de Ɛliyaship, na Yɔyada, na Yɔnatan tanga Yaduwa bá sè bedarwêy bepiris, ba jɛk bazâ bedanelɔ BeLevi tanga vê bepiris o. Bá yɛnɛ jɛ̂k baza mo e jeng de Dariyus á sè Da vwel Pɛrsya.

²³Bá to jɛk bazâ bedanelɔ BeLevi e bwok-basâ pyɛ̂ bare de ya té vɔk e jeng Yɔnatan zɔng, yɛ womo de da mɛ kunat à Ɛliyaship.

²⁴Ba gas BeLevi bagyɛng o bagyɛng o e nɛ̂n bemât nuyel mɛn Hashabiya, na Shɛrɛbiya, na Yɛshuwa, na Binuwi[7] tanga Kadmiyɛl. Ko bagyɛng o baba ba segsa na bemɛn e ragas lɛlɛ̂ somô Dagwi na feng a yɛ. Regyɛng o remo ré jut lwɛlɛ mo ko rere re toyo a yɛn mɛ. Yɛn e ragas ano tyɛng na pyɛ de Gbɔng Gwɔ̀m Davit, mwât Dagwi, á tɛ̀ be misang a yɛn.

²⁵Bemât gyeng ri Gbɔng Duk Re Fongol vɛ à, Mataniya, na Bakbukiya, na Obadya, na Mɛshulam, na Talmɔn tanga Akup ba vɔk nedirîk bɛrɛng begban de ba sé bagat na rùhup Gbɔng Duk o.

²⁶Bemat o mwa ba ra fwom mɛn e jeng Yɔyakim Yɛshuwa Yɔzadak, na ye Nɛhɛmiya, gwɔmna, tanga ye Ɛzra, piris de a to sè kaan tɔ̂k-tɔ̂k Badu Dagwi.

²⁷Nɛhɛmiya a re nuyel na ha mɛ: E jeng de wot a simo tik a Dagwi jwâ-pomô Yɛrusalɛm jaram, bá vey na BeLevi yi e kahɛ kwɔn de yɛn a sangal ɛ yaga na yɛn a ra lɛlɛ̂ feng a Dagwi na bapêy lwɛlɛ, na yōm waya, na yōm shi e jeng nzem o.

²⁸Bemât lwɛlɛ yi e nelɔ BeLevi mo ba tula hɛn. Ba yi e bebak de ba gwɔrɔ Yɛrusalɛm de yɛn a sangal ɛ, yi e bapomo de ba gwɔrɔ Netofa arɔng, mwa na yi e Bet-Gilgal, na Geba tanga Azmavɛt.

²⁹

³⁰Bepiris na BeLevi ba tɛ̀ bato mɛn, na BeIsrayɛl, na ruhup o mwa na jwâ-pomo mo haalal.

³¹Ma tɛ̀ bemât nuyêl BeYuda be tula hɛn e ra rak jwâ-pomo, ko ma tɛ̀ bagbɔng bagyɛng baba vê bemât lwɛlɛ ba tula hɛn arɔng. Regyɛ̂ng rê susu mo ra raa vwɔ yege, ko ra kyè e ra jwâ-pomo vɔk e Ruhup Gwɔt Fongol.

³²Hoshaya a raa bamâ bemât lwɛlɛ, yɛ na rebit bemât nuyêl BeYuda.

³³Bepiris ba raa hɛn, yɛn vɛ à Azarya, na Ɛzra, na Mɛshulam,

³⁴na Yuda, na Bɛnyamin, na Shɛmaya tanga Yirmiya. Ba kyě pɛsɛl bedurum. Bemat de ba raa hɛn vɛ à Zɛkarya Yɔnatan Shɛmaya Mataniya Mikaya Zakur wo yerê Asaf,

³⁵

³⁶na cáng mɛ Shɛmaya, na Azarɛl, na Milalai, na Gilalai, na Maai, na Nɛtanɛl, na Yuda tanga Hanani. Mwa hɛn ba vɔk pyɛ̂ lwɛlɛ yerê yemo de Gbɔng Gwɔ̀m Davit, mwât Dagwi, á kana ra yɛ. A sé e Ɛzra, kaan-tɔ̂k Badu Dagwi, de a sé mwât nuyêl regyɛng o remo e ji kwɛngɛl mɛn.

³⁷E Ruhûp Jɔt Nshi bemat o ba gyirik yi e jwâ-pomo, ko ba tút e ra nekwɔn turus nemo de na kyè cik vɔk e Repomô Davit. Ba kwey lɔ̂ negwɔm Davit, ko yɛn a to ɛn vey e ra jwâ-pomo mo pere vey e Ruhûp Nshi, e bak rwa rak wo gbɔng repomo mo.

³⁸Regyɛng bemât lwɛlɛ rê neba ra raa vwɔ mwɛlɛng e ra jwâ-pomo, ko me má raa hɛn. Wot a kyè wot kwey Tyɔ̌n Duk Kyeres pere vɔk e Jwa-pomo Twes.

³⁹Yi e hwomo, wot a kwey Ruhûp Ɛfrayim, na gwô Yɛshana, tanga gwô Betɔk. Ano arɔng, wot a kwey Tyɔ̌n Hananɛl, na ye Naga pere vɔk e Ruhup Tyīmit. Wot a wɔ̀ yɛnɛ kwɛngɛl mot o bagat na Ruhup Bemat Gyeng Repomo.

⁴⁰Ano kwong, mwa bagyɛng baba de ba kyě ra lwɛlɛ̂ feng a Dagwi ba wɔ̀ man e bàk Gbɔng Duk Re Fongol. Me tanga bemât nuyel de bá sè na me e de kwɛngɛl o, wot á tumal e hwomo arɔng.

⁴¹Bepiris de bá sè e ji regyɛng o arɔng, yɛn à Ɛliyakim, na Maaseya, na Miniyamin, na Mikaya, na Ɛlɔyɛnai, na Zɛkarya tanga Hananiya. Yɛn á kyě pɛsɛl bedurum mɛn.

⁴²Maaseya, na Shɛmaya, na Ɛlazar, na Uzi, na Yɛhɔhanan, na Malkiya, na Ɛlam, tanga Ɛzɛr ba raa hɛn. Yɛzrahiya á sè mwât nuyêl bemât lwɛlɛ, ko yɛn a ra lɛlɛ mo ngyat-ngyat.

⁴³E tuk hane, ba nása nenɔrɔ̂ yas pyak vɔk na Dagwi, ko bemat o bá vɔk yey pyɛng vit à yere mo, yaga Dagwi á tɛ̀ yey mɛn ye pɛngɛ sizɔng. Beha na nèy bá wuna hɛn na beras e de râ nzem o, ko bá wokos remôk yey pyɛng mɛn o yikyik.

⁴⁴E jeng yane, bá tɛ̀ bemat de bá vɔk reto e ra begban de bá tikis ɛ pyɛ́ de bemat bá nɔngɔs yaga fwôm Gbɔng Duk Re Fongol. Pyɛ́ mo yá wuna na pyɔlɔ, na pyɛ̂ mɛsɛng yê hiri tanga yê nèy cɔ́gɔt. Bemat o bá vɔk nedirîk tulâ pyɛ́ yi e hiri ve bagat ve bapomo yaga bepiris tanga BeLevi tyɛng na pyɛ de Badu Dagwi ba ha. Mwa BeYuda ba vɔk yey pyɛng na bepiris tanga BeLevi mo,

⁴⁵yaga yɛn a ra fwôm tɛ́sɛ bemat haalal na bwang yerê tom ve re a Dagwi fongol. Bemât lwɛlɛ̂ Gbɔng Duk Re Fongol tanga bemât gyeng ri wɛ bá ra tom mɛn tyɛng na badu de Gbɔng Gwɔ̀m Davit na hwey mɛ Sɔlɔmɔn bá kana nɔng ɛn arɔng.

⁴⁶Yimo raane, yi e jeng Gbɔng Gwɔ̀m Davit na ye Asaf, mwât lwɛlɛ, ba vɔkɔs bemât nuyêl bemât lwɛlɛ e jeng ragas lɛlɛ̂ somo tanga ve feng a Dagwi.

⁴⁷Ko e jeng Zɛrubabɛl na ye Nɛhɛmiya, mwa BeIsrayɛl ba nɔngɔs nɔrɔ kahɛ tuk yaga bemât lwɛlɛ̂ Gbɔng Duk o tanga vê gyêng ri wɛ. Ba tik nu mo mɛn hê BeLevi jaram, ko BeLevi mo arɔng ba tik nu mo mɛn hê bepiris jaram.