Read berom Nɛhɛmiya 2 Bible Online

Nɛhɛmiya 2 - berom bible

Nɛhɛmiya 2

¹Tuhak, e bamâ pɛl naas, gwɛ a pwɛl Nisan jeng de Da Vwel Artasɛrsɛs á sè re pyɛ́, ko ma wɔ̀ nɔng ɛ nshî anap. Ma sè lashe yey, ko a ga sang di bayis hom ba lashe hɛn ano wɛt.

²Yaga ano, a rangal me, a ye, “Yaga sɛ́ de bayis mō ba lashe hɛn ano ɛ? Hwó rō o arɛt? Wey, ê sè e pyɛ cak de ya lashe a hwo yey.” Ras de a hanat ano, nemi na gaba a me e yey.

³Ko ma toyo a yɛ ma ye, “Nekên Da Vwel ne nàra gbak-gbak! Di, bayis hom bê lashe hɛn yaga gbɔng repomo de ba lɛsɛ ɛ bedabeda hom ha ga tɛ́ ɛ barin, ko kya ha ga re ri rùhup rɛ.”

⁴Ano kwong, Da Vwel a rangal me, a ye, “Ko sɛ̌ e sɛ́ de hwó simo ɛ?” Ma pe ra a Dagwi wo lagwi won e yey hom,

⁵ko ma yâng Da Vwel o, “Ka sede yey mō ya pɛngɛ na me, na hwo simo wok won hom, ko tik na me kyè vɔk e sevwêl Yuda, vɔk e gbɔng repomo de ba lɛsɛ ɛ bedabeda hom, yaga na me to wɔ̀ lɔk rɛ.”

⁶Ko Da Vwel, na derwey mɛ e sangal e vwara mɛ, a rangal me nepyak jeng de mê jut na jeng de mê ba toyo, ma ha a yɛ. Ko a simo won hom.

⁷E bama mo, ma rangal hɛ, ka sede a simo ko a nɔng me bebok-berang vɔk na begwɔmna vê Bak Vwêl Tā Na Gwɔrɔt Ɛifaratɛs, be nɔng ɛn nu na be tik me, me kwey tyang vɔk e sevwêl Yuda.

⁸Ma to rangal bwok-rwang vɔk na Asaf, mwât bɛrɛng bahwôt cɔ́gɔt Da Vwel be nɔng ɛ nu na a nɔng me cɔ́gɔt yaga yông rùhup kwɔn bemât gyêng Gbɔng Duk Re Fongol, na yê jwâ-pomo, tanga yê lɔ de mê sangal ɛ. Da Vwel o a nɔng me mwa pyɛ́ de ma rangal, yaga Dagwi á sè tanga me.

⁹Da Vwel a tomo bemât nuyêl como tanga bemât comô bedwa na be gyep me, ko ma kaba gwong vɔk e Bak Bavwêl Tā Na Gwɔrɔt Ɛifaratɛs. Ma pe nɔngɔ̂s begwɔmna mo bebok-berang Da Vwel o.

¹⁰Ko Sanbalat wo Bet-Hɔrɔn, na Tobiya, mwât nuyêl wo Bak Vwêl Amɔn, ba wok, mwat hwak a ga vey na a ba ra fwom de gwô vey a BeIsrayɛl na sangâl netyang. Ko pyɛ mo ya bɔrɔk a yɛn yey reza wɛt.

¹¹Jeng de ma pom e Yɛrusalɛm, ma ra nepɔlɔ netat,

¹²ma ka ha a mwat hwak pyɛ de Dagwi a tɛ̀ e yey hom na me ra yaga repomo mo wɛt. Ko nakabadem, ma sogo, ma nusu vɔk e majey, ma vɔk ɛ bemât fwom hom tyɔng. Wot a vɔk bedwa wɛt, sɛ̌ madung de ma laga zɔng.

¹³Turuk há sè rɔngɔl ɛ̀ kyɔ́n jeng de ma nu me yi e repomo e Ruhup Nɛk de gwa sé e rwa tā, ko ma kyè vɔk e rwa batin. Ma kwey Jɔt Nshî Gwalwel, ma pere vɔk e Ruhup Gwɔt Fongol. Jeng de ma sé kyè, ma raa me bɛrɛng yɛɛlɛl jwâ-pomo mo de wa ga gabsa, tanga ri rùhup o de kya ha ga re.

¹⁴E bama mo, ma toyo, ko ma to raa bak bato wɔ̀ sɛ̀ Ruhup Jɔt Nshi tanga Didêng Gwɔ̀m. Ko madung de ma laga wa tɔk sɛ̀ gwông kwey wɛt, yaga gwofongôl jwâ-pomo de wa gabsa gwa bang gwɛ̄.

¹⁵Yaga ano, ma kwey vɔk e nɛk Rɔt Kidrɔn, ma raa nɛk o, me raa me bɛrɛng jwâ-pomo mo. E bama mo, ma to toyo e gwong de má gà kana raa, ko ma wɔ̀ yel e ji repomo e Ruhup Nɛk.

¹⁶Vit a hwak e ji bemât nuyêl tom repomo mo de á tɔk kwɔn de ma yi ɛ, kɛ pyɛ de má ga ra. Yaga pere vey e jeng o, ma ga kana ha a hwak e ji bemat hom BeYuda pyɛ cak wɛt. Ko a remo, ma hwo ha a bepiris, na bemât nuyêl repomo, na bemât nuyêl tom, na mwa bemat de ba rɔda ba vɔk nedirik fwom o. Ma yang ɛn, “Di in yerê reyɔm de wot a sé e ji mo. Yɛrusalɛm wa ga tɛ́ ɛ barin, ko kya ha ga re ri rùhup o! Tik na wot sogo na wot to lɔk jwâ-pomo mo, na bemat be re nuyel na byɛs ot wɛt!”

¹⁸Ko ma ha a yɛn gwong de Dagwi á sè tanga me, na a sɛlɛ me, tanga ha de Da Vwel á ha a me. Bemat o ba toyo a me, ba ye, “Tik na wot sogo wot pɛrɛ lɔk o!” Ko yɛn a sɛ̀ gap râ fwom rwat gwomo mo.

¹⁹Sede Sanbalat, na Tobiya tanga Gɛshɛm WoArap ba wok pyɛ de wot a sé yong ot na wot ra, yɛn a shɛgɛsh hot, ko ba ye, “E sɛ́ de yin e bare, yin a sé ra arɛt? Yin a sé kyè wɔ̀ ra a Da Vwel sogô nehywɛ arɛt?”

²⁰Ma toyo a yɛn, ma ye, “Dagwi wo lagwi a rɔda nɔng ot wɛng. Wot a sé bemat mɛ, ko wot a rɔda to pɛrɛ fwôm lɔ̂k repomo mo. Ko di yin kē, yin a vɔk nap e Yɛrusalɛm wɛt, ko yin a vɔk reto e ra repomo mo arɔng wɛt.”