Read berom Nɛhɛmiya 3 Bible Online

Nɛhɛmiya 3 - berom bible

Nɛhɛmiya 3

¹Gwong a gwomo de ba to lɔk jwâ-pomo Yɛrusalɛm: Ɛliyaship, darwêy bepiris tanga besâ fwom mɛ ba to lɔk Ruhup Tyīmit. Yɛn a tik gwɛ jaram yaga Dagwi, ko yɛn a to tɛ̀sɛ ri ruhup o mwa gyat. Yɛn a tik jwâ-pomo mo yi e hwomo pere vɔk e Tyɔ̌n Naga tanga ye Hananɛl jaram yaga Dagwi.

²Bemât Yeriko ba lɔk regap de re raa. Zakur Imri a lɔk regap de re raa mɛn o.

³Belɔ Hasena ba lɔk Ruhup Betɔk. Yɛn a tɛ̀sɛ sesêk ri mo mwa na ri ruhup o, ko ba tɛ́s ɛ begbɔng bekpɛk tanga bewɔ́rɔ dyam vê manâs ri rùhup o.

⁴Mɛrɛmɔt Uriya Hakɔs a lɔk regap de ra raa. Mɛshulam Bɛrɛkya Mɛshɛzabɛl a lɔk regap de ra to raa. Zadɔk Baana a lɔk regap de ra to raa arɔng.

⁵Bemât Tekowa ba lɔk regap de ra raa, ko begbɔng bemât repomo mo ba kyɛ́ ɛn nà ra fwom de bemât bɛrɛng fwom ba nɔng ɛn.

⁶Yɔyada Paseya na Mɛshulam Bɛsɔdɛya ba lɔk Ruhûp Yɛshana. Yɛn a tɛ̀sɛ sesêk ri mo mwa na ri ruhup o, ko ba tɛ́s ɛ begbɔng bekpɛk tanga bewɔ́rɔ dyam vê manâs ri rùhup o.

⁷Melatiya wo Gibɛyɔn, na Yadɔn wo Mɛrɔnɔt tanga BeGibɛyɔn na bemât Mizpa ba lɔk regap de ra raa, pere wɔ e lɔ gwɔmna wo Bak Vwêl Tā Na Gwɔrɔt Ɛifaratɛs.

⁸Uziyɛl Harhaya, zu dyam shinang, a lɔk regap de ra raa. Hananiya, mwât yông něy nesang hyɔɔlɔl, a lɔk regap de ra to raa. Yɛn a yong Yɛrusalɛm pere vɔk e Jwâ-pomo Twes.

⁹Refaya Hur, dagwɔm rebit repomô Yɛrusalɛm a lɔk regap de ra raa rere mo.

¹⁰Yɛdaya Harumaf a lɔk regap de ra raa, remo de ra sé e nuyel lɔ mɛ. Hatush Hashabneya arɔng a lɔk regap de ra raa.

¹¹Malkiya Harim na Hashup Pahat Mowap ba lɔk regap de ra raa mwa na Tyɔ̌n Bapik.

¹²Shalum Halohesh, dagwɔm rebit repomô Yɛrusalɛm o ret a lɔk regap de ra raa. Behwóng mɛ ba sɛlɛ hɛ e de fwom o.

¹³Hanun na bemât repomô Zanowa ba to lɔk Ruhup Nɛk. Yɛn a tɛ̀sɛ ri ruhup o, ba tɛ́s ɛ begbɔng bekpɛk tanga bewɔ́rɔ dyam vê manâs ri ruhup o. E bama mo, yɛn a re nuyel na yông jwâ-pomo, ko nelîs fwom o nà wul sede mita naga betungun (500) yi e hwomo pere vɔk e Ruhup Gwɔt Fongol.

¹⁴Malkiya Rekap, dagwɔm Bet-Hakɛrɛm, a to lɔk Ruhup Gwɔt Fongol, a tɛ̀sɛ ri ruhup o, ko a tɛ́s ɛ begbɔng bekpɛk tanga bewɔ́rɔ dyam vê manâs ri ruhup o.

¹⁵Shalum Kɔlhɔzɛ, dagwɔm Mizpa, a to lɔk Ruhup Jɔt Nshi. A sɔ̄rɔ gwɛ, a tɛ̀sɛ ri ruhup o, ko a tɛ́s ɛ begbɔng bekpɛk tanga bewɔ́rɔ dyam vê manâs ri ruhup o. E Didêng Shela a lɔk jwâ-pomo de wa sé bagat na bwî lɔ gbɔng gwɔ̀m, pere vɔk e nekwɔn bɔrɔs de na gyirik yi e Repomo Davit.

¹⁶Nɛhɛmiya Azbuk, dagwɔm rebit repomô Bet-Zur, a lɔk regap de ra raa, pere vɔk e sak Davit, na dideng o tanga nelɔ bemât como.

¹⁷BeLevi de ba lɔk bagâp jwâ-pomo de ba raa a vemo: Rehum Bani a lɔk regap de ra raa rane mo. Hashabiya, dagwɔm rebit repomô Keyila a lɔk regap de ra raa e tô bemât repomo mɛ.

¹⁸Bavai Hɛnadat, gwɔ̀m rebit repomô Keyila mo ret a lɔk regap de ra to raa arɔng.

¹⁹Ɛzɛr Yɛshuwa, dagwɔm Mizpa, a lɔk regap de ra raa, remo de ra sé e nuyêl nekwɔn turus vɔk e duk bâng pyɛ̂ como, pere vɔk e to-kwɔng jwâ-pomo.

²⁰Baruk Zabai a ye ngyɛ́k e de lɔ̂k regap de ra raa pere vɔk e ra rwi gùng lɔ Ɛliyaship, darwêy bepiris.

²¹Mɛrɛmɔt Uriya Hakɔs a lɔk regap de ra raa arɔng, pere vɔk e yɛnɛ̂ lɔ Ɛliyaship o.

²²Bepiris de ba lɔk bagâp jwâ-pomo de ba raa vere ma vemo: Bepiris de ba gwɔrɔ Yɛrusalɛm na sangal ba lɔk regap de ra raa.

²³Bɛnyamin tanga Hashup ba lɔk regap de ra raa, e rɛ de ra sé e nuyêl lɔ mɛn. Azarya Maaseya Ananiya a lɔk regap de ra to raa, e rɛ de ra sé e hagât lɔ mɛ.

²⁴Binuwi Hɛnadat a lɔk regap de ra raa, a jut yi e lɔ Azarya vɔk e to-kwɔng jwâ-pomo.

²⁵Palal Uzai a jut yi e regap de re bɛrɛng to-kwɔng o na yi e tyɔ̌n de ya nusu e majey yi e lɔ gbɔng gwɔ̀m hê rak o bagat na lalâ bemât bɛrɛng nekanang. Pedaya Parɔsh

²⁶tanga bemât fwôm Gbɔng Duk Re Fongol vemo de ba sangal e rahwol Ɔfɛl, ba lɔk regap de ra raa rane mo pere wɔ e rwa rak bagat na Ruhup Nshi tanga tyɔ̌n de ya nusu e jey.

²⁷Bemât Tekowa ba lɔk regap de ra raa, lɔk o mɛn he neba a hemo. Yɛn a jut yi e bak de wo bɛrɛng gbɔng tyɔ̌n de ya nusu e jey vɔk e jwâ-pomo de wa sé bagat na Ɔfɛl.

²⁸Regyɛng bepiris ba lɔk regap de ra raa, ba kyè mɛ vɔk e rwa rak yi e Ruhup Bedwa. Kawɛ e ji mɛn a lɔk bak o wo nuyêl lɔ mɛ.

²⁹Zadɔk Imer a lɔk regap de ra raa, e rɛ de ra sé e nuyêl lɔ mɛ. Shemaya Shɛkaniya, lwêk Ruhup Rak, a lɔk regap de ra raa arɔng.

³⁰Hananiya Shɛlɛmiya tanga Hanun, hwey hê netyiimin hê Zalaf, ba lɔk regap de ra raa. Lɔk o mɛn hê neba a hemo. Mɛshulam Bɛrɛkya a lɔk regap de ra raa, e rɛ de ra sé e nuyêl duk mɛ.

³¹Malkiya, zu dyam shinang hwak, a lɔk regap de ra raa pere vɔk e lɔ de bemât fwôm Gbɔng Duk Re Fongol tanga bejik be sangsal ɛ. Lɔ mo hɛ de ha sé e nuyel Ruhup Tulâ Bemât Como. A re nuyel vɔk e duk rak o de wa sé e to-kwɔng hê rwa bato wɔ̄ rak hê jwâ-pomo.

³²Bezu dyam shinang na bejik vɛ de ba lɔk regap rê yɛnɛ mo, remo de ra yi e duk wo to-kwɔng pere vɔk e Ruhup Tyīmit.