Read berom Nɛhɛmiya 4 Bible Online

Nɛhɛmiya 4 - berom bible

Nɛhɛmiya 4

¹Jeng de Sanbalat a wok, wot BeYuda wot a ga to hwo lɔ̂k jwâ-pomo, a tē puu na shom, ko a hwo tabas a wot nengyas.

²A ye e nuyêl besa mɛ na bemât comô Samariya, “E sɛ́ de berirî BeYuda vemo ba sé ra arɛt? Yɛn e simo to lɔk gbɔng repomo mo a? Yɛn e bare, bê tɔk tala fwom o tuk hining yi na nása nɔrɔ̂ yas vɔk na Dagwi a? Yɛn ê tɔk yong beta lɔ̂k duk yi e gwɔ̂t fongôl duk de kya ha ga re a?”

³Tobiya de a sé e tumal e hagat mɛ a to gwɛ̌ hanat a ye, “Kɛ̀ɛ́, e yerê wɛ̌ jwâ-pomo de yɛn ê kyɛm be lɔk ɛ? Kevu-hey zɔng wô tɔk gangas wɛ hywiri!”

⁴Ko ma ra won, ma ye, “Áaa à Dagwi mot, wok de yɛn a sé byɛs ot! Tik na ha de yɛn e haras a wot he to ɛ e ra bato mɛn. Tik na be hashe kayɛ pyɛ de yɛn a vɔk e jugu, na be to hashe hɛn sede besam vɔk e bavwel baduk.

⁵Hwo hala a yɛn neves de yɛn a ragas, kɛ hwo ye bam a banɛn mɛn wɛt, yaga yɛn a ga woros hot, wot de wot a sé lɔk jwâ-pomo.”

⁶Mwa ano, wot a rimi hot na lɔ̂k jwâ-pomo mo, sɛ̌ mwa wɛ wa wul rebit nelis o vɔk e rak o, yaga bemat o ba vɔk cwey râ fwom o.

⁷Sede Sanbalat, na Tobiya, na BeArap, na BeAmɔn tanga bemât Ashdot ba wok, wot a sé re nuyel na lɔ̂k jwâ-pomô Yɛrusalɛm, ko ba ga kyě bangas pyól de ya sé ɛ, yɛn a puu na shom tyɔng wɛt.

⁸Yɛn a yong ɛ̀ mwa hɛn na be vey hwo Yɛrusalɛm na como, na a bin sè a bemat o kpɛɛ.

⁹Ko wot a ra a Dagwi mot won, ko wot a tɛ̀ bemât bɛrɛng nekanang nagwi na naturuk na be dul ɛn.

¹⁰BeYuda ba vɔk lwɛlɛ hwak de be ra gwɛ ngan: “E tang ot jwɛɛnɛn e de torôs fongol, Fongol de wot ê hashe mo gwa kat, E rɛ̌ de wot pyɛ mot wot ê tɔk lɔk jwâ-pomo mo ɛ?”

¹¹Ko bemât repugu mot ba bare, wot ê di ɛn wɛt, kɛ wot ê tɔk pyɛ de ya sé té wɛt, sɛ̌ jeng de yɛn a ga pom e ra wot funglang, na yɛn a hwo mɔbɔs hot na be tɛ̀ fwom o gwo tumal.

¹²Ko e jeng e jeng BeYuda de ba sé sangal e tē mɛn be vɛ̀sɛ ha a wot begwong beves de yɛn a sé yong e ra wot.[2]

¹³Yaga ano, ma nɔ̂ng bemat mot bewal, na bebara, tanga begbang, ko ma tɛ̀sɛ hɛn e rùhup mɛn na be sangal e bamâ jwâ-pomo, e nekwɔn de ba rɔngɔl nà tala lɔk o.

¹⁴Bama de ma bɛrɛng pyɛ́ mo mwa, ma yang bemât nuyêl repomo, na bemât nuyêl tom, tanga bwang bemat o, “Yin wok bengyip bemât repugu mot wɛt! Bare hin na Darwey, yɛ Dagwi wo nerey, ko a sé pyɛ bengyip. Ra in como na yin sey mɛ begwa min, na nèy min, na beha min, tanga nelɔ min mwa arɔng.”

¹⁵Sede bemât repugu mot ba wok, wot a ga tɔk pyɛ de yɛn a sé yong na be ra, ko yɛn a pere wɔ̀ tɔk, Dagwi a ga dul begwong beves mɛn. Yi ano, mwa hot, wot a to ot vɔk e jwâ-pomo, ko kawɛ a re nuyel na fwom mɛ.

¹⁶Yi e tuk hane vɔk e nuyel rebit bemat hom ba ra fwôm lɔk, ko rebit o ba bɛrɛng nekanang. Yɛn vê bɛɛ nekanang ba gyiri hɛn na yɔ̀m como, ko ba vɔkɔs ɛ bebara, na beruga tanga begbang. Bemât nuyel mot arɔng ba dyɛng ɛ ma e de sɛlɛ̂ bemat

¹⁷de ba lɔk jwâ-pomo. Ano arɔng, bemât vɛ́sɛ na pyɛ̂ lɔk o ba ra fwom na vɔ vivining, ko ba vɔk pyɛ̂ como e vɔ mo vet,

¹⁸ko kawɛ e ji bemât lɔk a rɔgɔs wal mɛ e rawit. Ko mwât pɛsɛl durum na a gwɔt mɛ bemat á sè tanga me.

¹⁹Ma hwo yâng bemât nuyêl repomo, na bemât nuyêl tom tanga bwang bemat ngan: “Fwom o gwa sé rwey o, ko gwa shara hɛ sharatat; ko wot a kyě sé yikyik na bemot e ra jwâ-pomo mo.

²⁰Yaga ano, ka sede yin a wok durum, ko yin vey tula hin e kwɔn de mê se ɛ. Dagwi mot a rɔda tó como mo tanga wot!”

²¹Yi ano, kahɛ gasi rebit mot be ra fwom e ra jwâ-pomo yi e rwa hwol tuk vɔk e nawiri, ko rebit mot o ret re sè bɛrɛng nekanang na bebara mɛn e vɔ.

²²E jeng yane, ma yâng bemât nuyêl fwom wɔgɔ, yɛn na bemât sɛlɛ mɛn be pɔlɔs e ji repomô Yɛrusalɛm, yaga na yɛn a bin sɛlɛ hot e de gyeng rɛ nabwalak, ko be de hwo ragas fwôm lɔk jeng de jey ya ga ye gbey.

²³Ma ka tɔ̀k hywɛrɛm me nabwalak na me dyɛng nevwa wɛt, kɛ hwak e ji begwa hom, kɛ bemât fwom hom, kɛ bemât bɛrɛng netyang hom. Mwa hot wot a tikis pyɛ̂ como mot e vwâ gwóng.