Read berom Nɛhɛmiya 5 Bible Online

Nɛhɛmiya 5 - berom bible

Nɛhɛmiya 5

¹A vane ano, pyak e ji bemat, beras mwa na beha, ba hwo tosho na begwa mɛn BeYuda.

²Behak ba tē, “Wot na nèy mot wot a sé hyɔt, yaga ano, wot e simo pyɛ̂ yeneng na wot re, wot dalas mɛ.”

³Behak ba tē, “A ga tɛ́ ɛ a wot gbing-gbing na wot nɔngɔs cāp mot, na hirî anap mot, tanga nelɔ mot e lek na wot sɛ̀ mɛ pyɛ̂ yeneng de yê dul ot nà re vyong.”

⁴Behak gbak ba tē, “A ga tɛ́ ɛ a wot gbing-gbing wot hwɔp dyām e nû cāp mot tanga hirî anap mot, na wot tala mɛ dyâm vwel.

⁵Wot a sé yere jining na begwa mot BeYuda, ko nèy mot na sé tyɛng na nemɛn wɛt a? Ko di, a sé a wot gbing-gbing na wot tɛ̀sɛ nèy mot e sesam, ko ba ga hashe behwóng mot o behak e de sesam. Ko vit à pyɛ de wot ê tɔk ra, yaga ba ga kana seres ɛ cāp mot mwa na hirî anap o.”

⁶Jeng de ma wok sesin mɛn o, pyɛ mo ya beseng a me yey tyɔng wɛt.

⁷Ma tɔrɔng ha mo hywɛ, ko ma hwo bemât nuyêl repomo tanga bemât nuyêl tom o, ma yang ɛn, “Yin e seres ndi na begwa min!” E bama mo, ma yila gbɔng tulâ bemat e dúra na be ra badu e ra pyɛ́ de ba sé ra,

⁸ko ma yang ɛn, “Wot a ga ye ngyɛ́k e yɛnɛ̂ gap mot na wot vibis begwa mot BeYuda de ba ga kana rɛsɛl bato mɛn na yére dyuk. Ko di, a remo, yin e simo begwa min be rɛsɛl a BeYuda bato mɛn, yaga na wot vibis hɛn arɛt?” Bemât nuyel o ba nàra yúu-yùu-yūu, ba bidɛ pyɛ de bê ha.

⁹Ma re nuyel, ma yang ɛn, “Pyɛ de yin a sé ra ya sé tyɛng wɛt! A dal naka yin sap Dagwi, na yin ra pyɛ de ya sé tyɛng. Yi ano, yin a rɔda nɔ̂ng vê repugu mot, bemât yére dyuk, gwong de bê tabas a yin nengyas wɛt.

¹⁰Me pyɛ hom, na begwa hom tanga bemât fwom hom, wot a ga hwɔpɔs a bemat dyām na pyɛ̂ yeneng. Wot to rangal hɛn be tala hot ndi wɛt.

¹¹Hala hin a yɛn badu kɛ ndi de yin e rangal hɛn — kɛ vê dyām, kɛ vê pyɛ̂ yeneng, kɛ vê nshî anap, kɛ vê něy pwat ayi. Ko toyo hin a yɛn cāp mɛn, na hirî anap mɛn, na batîn pat mɛn, mwa na nelɔ mɛn yunung!”

¹²Ko bemât nuyel o ba toyo a me, ba ye, “Wot ê ra tyɛng pyɛ de hwà ha. Wot ê toyo a yɛn pyɛ́ mɛn, ko wot ê to wɔ̀ seres badu kɛ ndi de wot e rangal hɛn wɛt.” Ano kwong, ma yila bepiris, ko ma tɛ̀ bemât nuyel o be sira e nuyel mɛn wɔgɔ, ba rɔda gyeng sira de ba ga ra.

¹³E bama mo, ma hwo pat radîng gèy wo gworugu hom kayɛ pyɛ de ya sé e ji wɛ ma zagat e jey, ko ma ye, “A sé ano de Dagwi a rɔda zagat kawɛ e ji min de a tik nà gyeng sira mo yi e lɔ mɛ tanga yi e kayɛ pyɛ de a vɔk, ko a hala hɛ vɔ sǎn.” Kawɛ mwat de a sé e hwomo a ye, “Ano!” Ko yɛn mwa ba somo Dagwi Darwey. Bemât nuyel o ba gyeng sira mɛn o.

¹⁴E ji mwa neshey kuru na nɛ neba de ma sè gwɔmna wo vwêl Yuda, yi e shey hê kuru baba pere vɔk e shey hê kuru batat na nɛ neba de Artasɛrsɛs a sè Da Vwel, me, kɛ belɔ hom, wot e re pyɛ́ de a sé naka be nɔngɔs me remo de ma sé gwɔmna wɛt.

¹⁵Kawɛ gwɔmna de á ra fwom gyam jeng hom á sè a bemat pyɛ nedirik, ko á tɛ̀ be nɔngɔs hɛ shɛkɛl dyam pyɛng kuru banaas[3] kahɛ tuk yaga pyɛ̂ re na nshî anap. Bemât fwom mɛn arɔng bá gwɛ̌ tak a bemat o. Ko me, me ragas sede yɛn wɛt, yaga me sap Dagwi.

¹⁶Ma tɛ̀ gap hom mwa e ra fwôm lɔ̂k jwâ-pomo e negya, ko ma jāma a tó hom cāp wɛt. Bemât fwom hom mwa ba wuna vɔ mɛn e ra lɔk o arɔng.

¹⁷Kahɛ tuk bemât nuyêl BeYuda naga gwining na kuru batungun (150) be reres pyɛ́ e vwɔ hom, sana tɛ̀ bemat de be vɛ̀sɛ na me yi e yére dyuk de ya gwɔrɔ hot.

¹⁸Kahɛ tuk be yongos a me hywàrak gwining, na tyīmit ryat o tyiimin tanga cóngot pyak. Ko e kahɛ tuk hê kuru, be vɛ̀sɛ na nezap nshî anap pyak. Ko yaga ma tɔk nedirik de bemat be ra mɛ zìzɛ́rɛk, ma ka simo na me seres yi na yɛn dyâm pyɛ́ de ya sé naka na gwɔmna a seres wɛt.

¹⁹À Dagwi, me ra won na hwo bare na pyɛ́ ryat de ma ra yaga bemat vemo.