Read berom Nɛhɛmiya 6 Bible Online

Nɛhɛmiya 6 - berom bible

Nɛhɛmiya 6

¹Sanbalat, na Tobiya, na Gɛshɛm na bwang bemât repugu mot ba wok, wot a ga yɛnɛ lɔ̂k jwâ-pomo, ko vit a pyól cak de ya tɛt ɛ e bak hwak — mwa ano de wot ga kana tɛ̀sɛ ri rùhup o e ngyen wɛt.

²Ko Sanbalat na Gɛshɛm ba tomo a me na ha, ba vo a me redu wɔgɔ, wot man na yɛn e kehak e ji nebapomô tyɛl Ono. Ko yɛn a sé jama gwong na be bin mǎ me.

³Ma tomo betom vɔk na yɛn, na be wɔ̀ yang ɛn, “Ma sé ra gbɔng fwom hwak, ko mê tɔk vey na yin wɛt. Mê tɔk tik fwom o gwo tumal, yaga na me ba man na yin zɔng wɛt.”

⁴Yɛn a tomo a me ha hining o zang naas, ko e kahɛ tomo, ma toyo a yɛn na ha hining o arɔng.

⁵E bama mo, Sanbalat a tomo hwak e ji bemât fwom mɛ vey na me na tomo hê netungun. Hemo kwong, a tomo hɛ e jɛk e bwok rwang de a hala gwɛ pyot.

⁶A jɛk ɛ ngan: “Gɛshɛm a ha a me wɔgɔ, bemât yére dyuk ya sé kyě gwɔrɔng wɔgɔ, hwo tanga BeYuda yin a sé yóng in na yin sogo nehywɛ; pyɛ ma yemo de ya tɛ̀, yin a to sé lɔk jwâ-pomo. A to ye, hwà sé yong ɛ̀ na hwo tɛ́ o gbɔng gwɔ̀m,

⁷ko hwà ga yong ɛ̀ na behak e ji bezarap Dagwi, na yɛn a bin mok e Yɛrusalɛm wɔgɔ, e hwo à gbɔng gwɔ̀m Yuda. Ko di, Da Vwel ê tik nà wok ha hemo wɛt. Yaga ano, tik na hwo vey sɛ̀ me na wot tɔrɔng e ra ha mo.”

⁸Ma toyo a yɛ, ma ye, “Vit a cak e ji pyɛ́ de hwà ha de ya sé mwin. Hwà sé kwònɛ yɛ na to mo pyɛ mo zɔng.”

⁹Yɛn a sé ra ano na be tɛ̀ a wot bengyip na wot tik fwom o. Ko ma ye, “À Dagwi, gwɛ̌ a me yey ting!”

¹⁰E rwa jeng yane, ma wɔ̀ di Shemaya Delaya Mɛhɛtabɛl womo de pyɛ cak ya dul ɛ nà nusu yi e lɔ mɛ. A yang me, “Tik na me tanga hwo, wot wɔ̀ lɛrɛ hot e ji Gbɔng Duk Re Fongol, na wot bang ri mo, yaga ba sé kyè vey mɔrɔ hwo. Yɛn ê vey e ji nabwalak na be mɔrɔ hwo.”

¹¹Ma toyo a yɛ, ma ye, “Kéy-kaa! Mwat sede me ê tele wɔ̀ lɛrɛ hɛ wɛt. Hwó bare, mwat sede me ê tɔk wɔ yel e ji Gbɔng Duk Re Fongol na a sey neken mɛ a? Wey gyà, mê ra ano wɛt.”

¹²Ko ma de di a sé e Dagwi de a tɛ̀ a yɛ ha hemo e nu wɛt. Mwa ano de a ha sede zarap Dagwi, ko a sé e Tobiya na Sanbalat de ba bang a yɛ nu na dyām na a vey tusa me ano.

¹³Ba tala hɛ byɛ na a vey shira me, yaga na a tɛ̀, me ra banɛn. Yi ano, yɛn a sɛ̀ gwông lashê reza hom, na be bin tabas a me nengyas arɔng.

¹⁴Ma ye, “À Dagwi, bare na pyɛ de Tobiya tanga Sanbalat ba ga ra na hwo tabak hɛn. Ano arɔng, bare na Nowadiya, hwā de a sé zarap Dagwi, yɛ tanga bwang mɛn de ba jama begwong de bê tɛ̀ a me bengyip.”

¹⁵Ba yɛnɛ lɔ̂k jwâ-pomo mo mwa wɛ e pɔlɔ hê kuru baba na hɛ tungun (25) e ji pwɛ̂l Ɛlul. Ba ra fwom o mwa e ji nepɔlɔ kuru batungun na nɛ neba (52).

¹⁶Sede bemât repugu mot vê yére dyuk de ba gwɔrɔ hot ba wok ano, yɛn a tɛ̀ bengyip, ko yɛn a to re nuyel na toros bato mɛn wɛt yaga kawɛ e ji mɛn a tɔk, ba ra fwom o yi na sɛlɛ̂ Dagwi.

¹⁷E ji jeng yane mwa, bemât nuyêl BeYuda bá kyě jɛkɛs a Tobiya bebok-berang pyak, ko yɛ a to jɛkɛs a yɛn arɔng.

¹⁸Bemat pyak e ji BeYuda bá sè besâ gafiri mɛ, yi na tya mɛ WoYuda de ba tang ɛ à Shɛkaniya Ara, ko Yohanan, hwêy Tobiya a ra wenêng hwông Mɛshulam Bɛrɛkya arɔng.

¹⁹Ko bemat ba kyě ha a me rehâ tomong rat de Tobiya a ga ra, ko yɛn a to kyese ha a yɛ kayɛ pyɛ de ma ha arɔng. Ko yɛ a kyě tomsal a me na bebok-berang na a bin tɛ̀sɛ a me mɛ bengyip.