Read berom Nɛhɛmiya 8 Bible Online

Nɛhɛmiya 8 - berom bible

Nɛhɛmiya 8

¹E tûk susû pwɛl o, BeIsrayɛl myak ba tula hɛn e Yɛrusalɛm, e majey de wa sé bagat na Ruhup Nshi. Yɛn a ra won na Ɛzra, piris de a to sé kaan-tɔ̂k badu de Dagwi Darwey á kana nɔng ɛn e vwɔ̂ Mose, na a vey na bwok-basâ Badu mo.

²Ano kwong, Ɛzra a vey na gwɛ e dem de bemat o ba ga kana tula hɛn ɛ. Bemat o ba sé beras na beha na nèy de na ga vey na ne tɔk pyɛ de be basa.

³E hwomo e majey o Ɛzra a hwo basa a yɛn badu mo yi e nagasi bop vɔk e tê-gwi, ko mwa bemat o ba wet betong naka.

⁴Ɛzra a tumal e ra kwɔ̂n garang de ba yong na cɔ́gɔt yaga jeng o. Ko bemat de ba tumal e vwɔ yege mɛ vɛ à Matitiya, na Shema, na Anaya, na Uriya, na Hilkiya na Maaseya, ko vê vwɔ mwɛlɛng mɛ à Pedaya, na Mishayɛl, na Malkiya, na Hashum, na Hashbadana, na Zɛkarya tanga Mɛshulam.

⁵Remo de Ɛzra a tumal e ra kwɔ̂n garang yi na bwang bemat o, ko mwa hɛn ba tɔk di ɛ. Ras de a wunta bwok-basa mo, ko mwa hɛn ba sogo e tumal.

⁶Ɛzra a hwo somo Dagwi Darwey, Dagwi wo nerey, ko bemat o mwa ba nára vɔ mɛn e gwi, ba ye, “Ano! A sè ano!” Ba ye guduruk, ba tɛ̀ bato mɛn e vwel na be re a Dagwi fongol.

⁷E bama mo ba to sogo e tumal, ko BeLevi behak ba hwo misang a yɛn badu mo, yɛn à Yɛshuwa, na Bani, na Shɛrɛbiya, na Yamin, na Akup, na Shabetai, na Hodiya, na Maaseya, na Kɛlita, na Azarya, na Yozabat, na Hanan, tanga Pelaya.

⁸Yɛn a doyo a yɛn na lem mɛn[4] Badu Dagwi o, ko yɛn a to misang a yɛn cap-hâ vɛ, yaga na bemat o be tɔk vɛ kyɛrɛng.

⁹Sede bemat o ba wok pyɛ de Badu mo ba simo a yɛn na yɛn a ra, pyɛ mo ya ra ɛn sizɔng, yɛn mwa ba pere hwo tosho. Ko Nɛhɛmiya, yɛ gwɔmna, na Ɛzra, piris de a to sé kaan-tɔ̂k badu, tanga BeLevi de be misang a bemat Badu mo ba yang ɛn, “Tuk hemo ha sé hê Dagwi Darwey, Dagwi min. Yaga ano, yin ra sesin, kɛ yin tosho wɛt!

¹⁰Ko a yang ɛn, kyè in vɔk e lɔ na yin wɔ̀ ra nzem rê pyɛ́. Nɔt in vemo de ba vɔk wɛt pyɛ̂ re na nshî anap min o. Yunung a sé hê Darwey mot. Yin lashe yey wɛt. Yey pyɛng de Dagwi Darwey e nɔngɔs hin e yɛ de yê gwɛ̌ a yin gap.”

¹¹BeLevi ba kyě kyè e ji bemat o, ba wɔrɔk hɛn arɔng, ko ba tang ɛn, yɛn lashe yey e tûk Dagwi hemo wɛt.

¹²Ano kwong, bemat o ba shara hɛn wɛrɛn e nelɔ mɛn, ba wɔ̀ re, ba sɔ, ko ba nɔ̂t vemo de ba vɔk wɛt pyɛ́ mo arɔng, ko ba vɔk yey pyɛng sizɔng yaga yɛn a tɔk neha de ba ga misang a yɛn.

¹³Nusu hwol, bedanelɔ rùhup, yɛn na bepiris tanga BeLevi ba wɔ̀ sɛ̀ Ɛzra, yaga na be ngyɛgɛt batîn basâ Badu detidetu:

¹⁴ko e Badu mo de Dagwi Darwey a kana nɔng yi na Mose, yɛn a sɛ̀ kwɔn de ba nɔ̂ng BeIsrayɛl nu na be sangal e bǔk e jeng Nzem Bǔk.

¹⁵Yaga ano, yɛn a yong ha, ko ba tomo, ba shara hɛ e Yɛrusalɛm tanga e neyɛnɛ̂ bapomo mɛn, ba ye, “Ci in e berahwol na yin wɔ̀ tow nelang cɔ́gɔt raku na yê bě pàt, na cɔ́gɔt hades na tyét, na ne bwang cɔ́gɔt cak de ya vɔk berang na yin yong mɛ bǔk tyɛng na pyɛ de ba jɛk e ji Badu.”

¹⁶Ano kwong, bemat ba wɔ̀ tow nelang cɔ́gɔt o, ba yong mɛ bǔk e ra beragyip nelɔ mɛn, kɛ e bemajêy nelɔ mɛn, kɛ e nelalâ Gbɔng Duk Re Fongol, kɛ e majêy Ruhup Nshi tanga wo Ruhup Ɛfrayim.

¹⁷Mwa bemat de ba ga toyo yi e de sesam ba yong bǔk, ko ba sangal e ji vɛ. A sé a kawɛ mwat wɛng-wɛng, ko a vɔk yey pyɛng, yaga yimo e jeng Yɔshuwa Nun BeIsrayɛl ba ga to ra nzem nemo mo wɛt.

¹⁸Yɛn a basa bak bwok-basâ Badu Dagwi kahɛ tuk yi e tuk he susû nzem o vɔk e tuk hê yɛnɛ mo. Yɛn a ra nzem o pɔlɔ taama, ko e tuk hê rwit, yɛn a man mwa na be ra Nzem Bǔk o, tyɛng na pyɛ de Badu mo ba dura.