Read berom Nɛhɛmiya 9 Bible Online

Nɛhɛmiya 9 - berom bible

Nɛhɛmiya 9

¹E tuk hê kuru baba na hɛ naas (24) hê pwɛl o, BeIsrayɛl ba tula hɛn e dem hining, ba tik rê pyɛ́, ba tɛ̀sɛ berugû sesin, ko ba tɛ̀sɛ fongol e bato mɛn yaga lashê yey yaga banɛn mɛn. Yɛn a ga kana kang bato mɛn yi e yére dyuk. Ano kwong, yɛn a tumsal, ko ba hwo kulsa banɛn de yɛn tanga bedabeda mɛn ba ga ragas.

³Ba ra dyâm gwi tyat e tumal e nekwɔn mɛn, be sè basa a yɛn bwok-basa Badu Dagwi Darwey, Dagwi mɛn, ko yɛn a to ra dyâm gwi tyat arɔng e de kulsâ banɛn mɛn tanga e de re a Dagwi Darwey, Dagwi mɛn fongol.

⁴BeLevi behak ba tumal e ra kwɔ̂n garang hê BeLevi yɛn à Yɛshuwa, na Bani, na Kadmiyɛl, na Shɛbaniya, na Buni, na Shɛrɛbiya, na Bani tanga Kenani. Yɛn a ra won na gbɔng fwɔ vɔk na Dagwi Darwey, Dagwi mɛn.

⁵BeLevi vemo, yɛn vɛ à Yɛshuwa, na Kadmiyɛl, na Bani, na Hashabneya, na Shɛrɛbiya, na Hodiya, na Shɛbaniya tanga Pɛtahiya, ba hwo yila bemat o na be re a Dagwi fongol. Yɛn a ye: “Sogo hin, na yin somo Dagwi Darwey, Dagwi min, somo hin hɛ gbak-gbak! Tik na kawɛ mwat a somo reza mɛ de ra vɔk gbɔng nerat, mwa ano de mwasi ê tɔk somo Dagwi e gwong de gwa vey wɛt.”

⁶Ano kwong, BeIsrayɛl ba ra won hemo: “À Dagwi Darwey, e hwo nju mo zɔng de hwà sé Dagwi Darwey; E hwo de hwà yong lagwi de wa sé rwey o tanga mwa netangacɛn e ji wɛ. Hwà yong vwel na berep tanga pyɛ̂ mwa de ya sé e ji yɛ. E hwo de hwà nɔ̂ng kayɛ pyɛ neken. Pyɛ́ cen mwa e lagwi ye tē guduruk na ye re a hwo fongol.

⁷E hwo, à Dagwi Darwey, Dagwi mot de hwà kasa Abram, ko hwà nusu na yɛ yi e Ur wo BeBabilɔn. Hwà sege reza mɛ re tɛ́ ɛ Abraham.

⁸Hwà sɛ̀ ɛ a sé mwât tsak o e bayis mō, ko hwà wuna hwo na sira tanga yɛ. Hwà sira a yɛ, hwô nɔng ɛ vwêl de BeKanaan, na BeHiti, na BeAmɔr, na BePɛrizi, na BeYebus, tanga BeGirgash ba sangal ɛ, na he sè vwel de yére mɛ ya rɔda sangal ɛ. Hwà sila sira mō, yaga hwà sé wo tsak o.

⁹“Hwà di yerê yɔ́m de bedabeda mot bá sɔ e Misra; hwà wok sesin mɛn jeng de yɛn á sè jama sɛlɛ e Gbɔng Rep Sere.

¹⁰“Hwà ra pyɛ̂ bes sizɔng e ra gbɔng gwɔ̀m o, na e ra bemât badu mɛ tanga e ra mwa bemât vwel mɛ, yaga hwá tɔk yerê kaa de yɛn a dak a bemat mō. Ko hwà sɛ̀ a tó mo reza remo de ba rɔɔ tɔk o na rɛ vey e remo.

¹¹Hwà wunta a bemat mō gwong e tê gbɔng rep, ko hwà ye dɔ na yɛn e ra vwel hwogot. Bemat de bá sè ró ɛn, bá tē pyɔp sede gwofwa e gbɔng rep de wo lolong.

¹²Hwà dura a yɛn gwong e ji rele nagwi, ko na turuk hwà kyè e ji relê kya na re nɔng ɛn negbey e gwong o.

¹³Hwà gyirik yi e lagwi e ra Raku Sinai, hwà ha na bemat mō, ko hwà nɔng ɛn badu barat na basa rat sizɔng.

¹⁴Hwà basa a yɛn na be gyenges Tuk Shábat yaga ha sé tuk mō, ko hwà nɔng ɛn Badu mō yi na mwat mō Mose.

¹⁵Jeng de yɛn a vɔk vyong, hwà nɔng ɛn kpam-tuk yi e lagwi, ko jeng de yɛn a vɔk yêy hwɔshɔ, hwà nɔng ɛn nshi yi e ra gwofwa. Hwà yang ɛn, yɛn a sey ɛ vɔ̂k vwel o, hemo de hwà kana sira na hwo nɔng ɛn hɛ.

¹⁶“Ko bedabeda mot o ba hwo dâk kaa, ba tɛ́ ɛn gbàrak, ko ba kyɛ́ ɛn nà gyeng badu mō.

¹⁷Yɛn a kyɛ́ ɛn nà wok ha mō, ko yɛn a ye bam a pyɛ̂ bes de hwà ga kana ra a yɛn. Yi na negbàrak mɛn, yɛn a kasa a bato mɛn mwât nuyel na a to toyo na yɛn vɔk e ji sesam e Misra. Ko hwo, hwà ye waa a hɛn wɛt, yaga hwà sé Dagwi de hwó halsa a bemat banɛn mɛn. Hwà sé wo toshô reyɔm, wo nerat. Hwó ra shom ziri wɛt, ko hwó dura a bemat nerat mō ding-ding.

¹⁸Yɛn a yong a bato mɛn pyɛ sekwit sede bwôt mus, ko ba ye, e yɛ a dagwi de a ga nusu na yɛn yi e Misra! — Káa à Dagwi Darwey, yɛn a tabas a hwo reves tyɔng wɛt!

¹⁹Ko mwa ano, hwà ye waa a hɛn e ji hey wɛt, yaga hwà vɔk toshô reyɔm vit a yere mo. Hwà ka sey ɛ rele kɛ kya, pyɛ́ de ya dura a yɛn gwong nagwi na naturuk wɛt.

²⁰Ko e ji nerat mō, hwà ha a yɛn pyɛ́ de yɛn ê ra e negya; hwà nɔng ɛn mana na be re tanga nshi na be sɔ.

²¹E ji neshey kuru banaas, jeng de ba kyě kyè e hey, hwà nɔng ɛn kayɛ pyɛ de yɛn a simo. Berugu mɛn ba kwopos, ba hama hɛn wɛt, ko bol mɛn ba pus na nepêp kwɛngɛl arɔng wɛt.

²²“Hwà tɛ̀ ɛn be re begbɔng begwɔ̀m na yére bemât jey e como, ko ba kyě re bavwel de ba gwɔrɔ hɛn vivining. Yɛn a re vwêl Hɛshbɔn, kwɔ̂n negwɔm Sihɔn na como, mwa tanga vwêl Bashan, kwɔ̂n negwɔm Ɔk.

²³Hwà nɔng ɛn nèy pyak sede nepyak netangacɛn e lagwi, ko hwà tik ɛn be re sevwel Kanaan o, na be sangal ɛ, vwel hemo de hwà kana ha a bedabeda mɛn hwô nɔng ɛn na be vɔk hɛ.

²⁴Yɛn a re vwel o na como, ko hwà tɛ̀ BeKanaan o be sè e nɛn mɛn. Hwà nɔ̂ng bemat mō reto na be ra pyɛ de ba simo na begbɔng begwɔ̀m tanga bemat mɛn o.

²⁵Bemat mō ba re bapomo de ba gwɔrɔ vɛ na jwâ-pomo, na vwel de ha siri, na nelɔ de na sila na pyɛ̂ nedanerey, na hes nshi de ba ga kana kas vɛ, na hirî anap, na ve batîn pat tanga batîn cɔ́gɔt detidetu de be mara nèy shɛrɛk arɔng. Yɛn a re pyɛ́ de yey mɛn ya simo, ko babek mɛn ba tɛ́ ɛn ferep na myɔ̀sɔ. Yɛn a wok netâ kayɛ pyɛ ryat de hwà nɔng ɛn.

²⁶“Ko mwa ano, bemat mō ba ra retek, ba kyɛ́ ɛn nà gyeng ha mō na Badu mō. Yɛn a mɔbɔs bezarap mō de ba tusa hɛn e ra neves mɛn, ko ba ha a yɛn, yɛn a to toyo vey na hwo. Yɛn a tabas a hwo reves zang pyak.

²⁷Yaga ano, hwà tik vê repugu mɛn be re ɛn na como, na be tak a yɛn reyɔm. Ko e ji reyɔm mɛn o, yɛn a tosho ba yishi na hwo sɛlɛ hɛn. Ko hwà wok won mɛn yi e lagwi yaga gbɔng toshô reyɔm mō, hwà tomo a yɛn na bemât nuyel vemo de ba sey ɛn yi e vê repugu mɛn.

²⁸Ko jeng de yɛn a to sɛ̀ pɔngɔ yi e reyɔm o, yɛn a to hwo ragas banɛn gbak. Ko hwà to tik vê repugu mɛn ba to re ɛn na como, ko yɛn a to tosho gabɔk, ba to ra won na hwo, na hwo sey ɛn, ko hwà wok yi e lagwi, hwà ga to hwo seres hɛn zang pyak yaga gbɔng toshô reyɔm mō.

²⁹Hwà tusa hɛn, yaga na yɛn a gyenges Badu mō. Ko yaga dâk kaa mɛn, yɛn a kyɛgɛs hɛn gyenges vɛ, mwa ano de be dura a mwat de e gyenges vɛ gwong de ê sɛ̀ neken. Ko yi na to ven tanga negbarak mɛn, yɛn a kyɛ́ ɛn nà gyeng Badu mō.

³⁰Neshey pyak hwà niri e de tusa hɛn, hwà nɔ̂ng bezarap mō há mō. Ko bemat o ba tɛ́ ɛn bekpey, yaga ano, hwà tɛ̀ yére bemât jey ye re ɛn e como.

³¹Ko mwa ano, hwà ye waa a hɛn, kɛ hwà wey na yɛn wɛt, yaga toshô reyɔm mō ha sé pyak. Yaga hwà sé Dagwi wo nerat, wo toshô reyɔm.

³²“Óoo à Dagwi mot, hwà sé wo nerey na reto, ko hwà sé pyɛ bengyip! Hwà wuna hwo na sira na wot, ko hwó gyeng hɛ na tsak o. Hwo kwon jut rezot de wot a ga sɔ ra sé pyɛ neshɔngɔlɔng wɛt. Begbɔng begwɔ̀m tanga bemât nuyel mot, bepiris na bezarap mot, na mwa bemat mot, mwa na bedabeda mot bá sɔ rezot yimo yi e jeng de begbɔng begwɔ̀m Asirya bá tak a wot, pere vey e jeng yemo.

³³E ji kayɛ pyɛ de ya té na wot, hwà ra tyɛng, hwà ra pyɛ́ de ya sé tsak o, mwa ano de wot a ragas a hwo banɛn.

³⁴Bedabeda mot, na begbɔng begwɔ̀m mot, na bemât nuyel mot tanga bepiris mot, ba ga gyenges badu mo wɛt. Yɛn a tɛ̀ tong na ha de hwà nɔng ɛn nu e ra hɛ kɛ e ra tusa de hwà dopse tusa hɛn wɛt.

³⁵Hwà nɔng ɛn negwɔm na pyɛ́ ryat shɛrɛk, hwà nɔng ɛn vwel de yɛn ê sangal ɛ, vwel de ha sé tes, ha siri naka arɔng. Ko yɛn a kyɛ́ ɛn nà doyo yi e banɛn mɛn, na be ra a hwo fwom.

³⁶Ko di, wot a remo, wot a sé besam e vwel de hwà nɔng bedabeda mot hemo de ha siri naka, ko yɛn a wok netâ hɛ.

³⁷Pyɛ́ de wot e sɛsɛm yi e vwel o ye kyesem na begbɔng begwɔ̀m de hwà tɛ̀ e ra wot, yaga banɛn mot. Yɛn e ra pyɛ́ de yɛn a di ya jam a yɛn na wot, mwa tanga yas mot arɔng, ko wot a sé e ji lashê yey tyɔng wɛt!”

³⁸Yaga pyɛ́ yemo mwa de ya ga té, wot BeIsrayɛl wot a sé wuna hot na sira e ra pyɛ́ yemo de wot a jɛk, ko bemât nuyel mot, na BeLevi tanga bepiris mot ba sé manas ɛ batô gwɔ̀m mɛn e ra yɛ.